Mathai 20 - Caekäcai Kangthae (Lemi)

Cäpje angkhaw üng kälu sa saite na hai mätae pa

¹ “Säthaw ma pre pyng saite lä Cäpje angkhaw kung üng äphüng hai aetawng vi. Äma lä kälu sa saite na bung vang hethang kädang thawde-a tho jaw dy.

² Äni lä äma üng kälu sa saite khimi na tea känitä-a kälu sa te vang phawisae pjaetä py hethang bälung aedü kha äni ce bung Cäpje angkhaw-a mätaw ö dy.

³ Kädang naeri täkawtä-a vyngjaw saite mityng-a ly ea khimi phütä na lä aedaw kha awng aetütü te nung dy.

⁴ Tukha angkhaw kung ma äni ce tea ‘Nang ce ly kha Cäpje angkhaw thung-a kälu sa by dylä, kälu sa te ävang kaeteng-a kai py ai mang’ näkha näpa.

⁵ Tukätephüng-a äni ce lä ly ö dy. Tupyng-a angkhaw kung lä käni anghung-a, hai kädüng naeri thungtä-a, lä vyngjaw te mityng-a ly haile tyng be kha kälu sa hethang khimi ce bung vang be dy.

⁶ Kädüng naeri bangawtä awng te kätü-a vyngjaw saite mityng äni ly ea khimi phütä na lä ho-a aedaw kha awng te nung dy. Tukha äni ma honi na tea ‘Ätephüng-a nang ce lä hi-a äte lä sa y käla känini rui awng aetütü ö te vi mei’ näkha düng pa.

⁷ Äni ce ma ‘Kai ce bung lä ämi la kälu sa hethang vang y vi’ näkha mäthang pa ö dy. Angkhaw kung ma äni ce tea ‘Nang ce lä kai üng Cäpje angkhaw thung-a ly kha kälu sa ö’ näkha näpa.

⁸ “Kädüng mang-a angkhaw kung ma kälu sa saite mätawngky tea ka ea ‘Kälusämae na tea ävang py pa lawi. Kai ma kangkhüng-a vang saite tähang py pa mang. Kai ma angcü-a vang saite tähang lä kangkhüng-a py pa’ näkha näpa.

⁹ Tukha kälu sa saite mätawngky ma kädüng naeri bangawtä-a vang saite kälu sa te na tähang phawisae pjaetä py pa dy.

¹⁰ Angcü-a vang saite kälu sa saite na lä äkälang na qawng-a awng mang-a dang hethang aepö ö te vi. Tungaila äni ce tea lä phawisae pjaetä py qi pa kae vi.

¹¹ Kälusämae na lä phawisae pjaetä dang pyng-a angkhaw kung tea bälung hawi y te phüng thui ö dy.

¹² Angkhaw kung tea kälu sa saite na ma ‘Äni ce lä naeritä kälu sa te kae. Tungaila äni ce tea kai ce hai mangtä kaengi-a py vi. Kai ce lä känini rui khöbi thung-a kälu sa te mäsae qyng ö te vi’ näkha näpa.

¹³ “Tungaila angkhaw kung ma kälu sa saite lawngtä tea ‘Änang ä, kai lä nang tea kaeling sa te y. Känitä-a phawisae pjaetä hai kälu sa hethang nang lä bälung aedü pyng te vi dy.

¹⁴ Nang ma üng kälu vang la kha ing-a vawi lawi cü. Kangkhüng-a vang saite kälu sa saite na tähang nang tea py te kätyng kai lä py he ngai te vi.

¹⁵ Kai ma üng phawisae bung kai ma ngai te kätyng sa haw te vi. Kai üng angcing khu y käla py saite tea nang lä pä-e te vi mei’ ” näkha näpa.

¹⁶ Tukha Isu ma “Angcü-a kälengky-a awng saite khimi na lä kangkhüng-a lä cäpiky-a awng ö vi ai. Vaihi cäpiky-a awng saite khimi na lä kangkhüng-a lä kälengky-a awng ö vi ai” näkha näpa.

Isu ma äma dü ai te phüng ämäthung thui pa

¹⁷ Isu lä äkähui lawng hawlai netä na hai Jerusalem märü mang-a khölawng tho ö dy. Tukha Isu lä äkähui lawng hawlai netä xyng na bung ka pa dy.

¹⁸ Isu ma äkähui na tea “Tängai ö, mä-ai lä vaihi Jerusalem märü mang-a khölawng tho ö te vi. Honi märü-a khimi lawngtä lä Kai, Khimi üng Cäpaw, bung mäthykung käleng na hai Ubädi särae na üng kö thung-a a ö vi ai. Äni ce ma kai bung lä bädü hethang tärae cei ö vi ai.

¹⁹ Tupyng-a ceng kälang na üng kö thung-a a ö vi ai. Khimi ce ma Kai bung mänui hai ö vi ai. Ry kha kai bung lä äni ce ma thinglang qawng-a bädü ö vi ai. Tungaila ämäthung käni-a Säthaw ma kai bung mäning haile tyng pa vi ai” näkha näpa.

Änä-awi lawngtä üng mäkai saite na

²⁰ Tupyng-a Zebede üng nawngpui lä äcaw lawng netä hai mangtä Isu tea ly kha khokhö didü ea äma üng cäpaw ni tähang äkähawi sa hethang mäkai pa dy.

²¹ Isu ma nawngmädi tea “Nang lä äte sa hethang ngai hai te mei” näkha düng pa. Nawngmädi ma Isu tea “Nang ma Sanphrang sa kha pre pyng saite kätü-a kai cäpaw lawng netä bung nang üng bangtang mang-a lawngtä, bangrawi mang-a lawngtä aety nae py jo ba ä” näkha mäkai pa.

²² Isu ma änini tea “Nang ni mäkai saite tea nang mani lä mäny hawi te y vi. Kai mätangbälai te kätyng nang ni lä khang haw ai mang mei” näkha düng pa. Änini ma “Kai ni lä mätangbälai saite na aeting vawng haw ai mang” näkha näpa.

²³ Isu ma änini tea “Nang ni lä Kai üng kätyng mätangbälai hawi tätang vi ai. Tungaila kai üng bangrawi bangtang mang-a aety hethang lä kai py haw y lyng. Hini lä Säthaw ma äma re saite khimi na tähang py hethang kae vi” näkha näpa.

²⁴ Hini phüng äkähui kälang lawng hawtä na ma thai ea Jaeko ni Johan tea kädawtho pa ö vi dy.

²⁵ Tukätephüng-a Isu lä äkähui angxynglyng na bung ka kha äni ce tea “Ceng kälang üng pre pyng saite khimi na lä äma ce üng khimi na qawng-a säri aenae hai pyng ö te hai, mätawngky na lä khimi ce tea aenae hai pyng ö saite nang ce lä mäny ö dy.

²⁶ Tungaila nang ce lä hokä awng ö hang. Nang ce thung-a mätawngky sa hethang ngai saite khimi lä nang ce üng mawsawng-a sa ngece hethang kae.

²⁷ Äkälengky-a sa he ngai saite khimi lä nang ce üng mawsawng tangnae-a sa ngece hethang kae.

²⁸ Kai, Khimi üng Cäpaw, tea khimi ce ma mawsawng sa hai hethang ly te y vi. Kai lä khimi ce üng mawsawng-a awng hethang hai khimi ce bung awng mang-a aeqang hethang hai Kai üng hing saite khaisö hethang ly te kae vi” näkha näpa.

Isu ma ämi kangjö lawng netä bung hawi sa pa

²⁹ Isu hai äkähui na lä Jerikhaw märü üng tho ö ea khimipui na lä äni ce leithung hui pa ö vi.

³⁰ Ämi kangjö lawng netä lä lolang teng-a aety kha awng ea Isu tyng te angthang thai hawi ea “Sanphrang Davidae üng Cäpaw Isu ä, kai ni tea bäheng kü jo” näkha ätüng käleng hai hang hawi pa dy.

³¹ Khimipui na ma änini tea jawsi kha sitäri-a awng hethang mäkhang pa ö dy. Tungaila änini lä “Sanphrang Davidae üng Cäpaw Isu ä, kai ni tea bäheng kü jo” näkha ätüng käleng hai-a rae pa vi dy.

³² Isu lä aenawng kha änini tea ka ea “Nang ni tähang kai lä äte sa pa ai mei” näkha düng pa dy.

³³ Änini ma Isu tea “Areng ä, kai ni lä ämi aevang haile tyng hethang ngai vi” näkha näpa hawi dy.

³⁴ Isu lä bäheng phi te hai änini üng ämi tea äkö hai aela pa dy. Änini lä ämi aevang hawi praw kha Isu leithung hui hawi vi dy.