Mathai 15 - Caekäcai Kangthae (Lemi)

Kangsi kangjaw na üng reitae

¹ Pharisai na hai Ubädi särae phütä na lä Jerusalem märü mang üng Isu tea ly pa ö dy.

² Äni ce ma Isu tea “Ätephüng-a nang üng äkähui na lä kangsi kangjaw na üng reitae tea bäjui ö y te mei. Äni ce lä hini reitae kätyng äkö aese y käla ca nei ö vi mei” näkha näpa.

³ Isu ma ätephüng-a “Nang ce lä Säthaw üng särilo tängai y käla nang ma ce üng reitae tea bäjui ö te kae y mei.

⁴ Älo käbawng-a Säthaw ma ‘Nang nä-awi ni nang pä-ai tea tämö khai. Nang nä-awi ni nang pä-ai tea käsi thui dylä, dü hethang kae näkha näte vi.’

⁵ Tungaila nang ce ma khimi lawngtä lä äpä-ai, änä-awi tea ‘Säbawng hethang nang ni tea khai pa saite lä Säthaw tea py pyng vi dy nä haw vi’ näkha näpa.

⁶ Khimi lawngtä hikä sa dylä, änä-awi ni äpä-ai tea tämö khai hethang ngai y dy. Honi kätyng-a nang ce lä nang mäce reitae bäjui hethang Säthaw üng särilo tea tängai ö y.

⁷ Nang ce lä käjüng aesa saite khimi na vi. Nang ce phüng buisaw Isaia ma thui rüng te lä hini kätyng vi.

⁸ ‘Hini khimi ce lä kai tea täbawng hai lä tämö khai ö. Tungaila äni ce üng bälung lä kai hai hanglaw bärai vi.

⁹ Äni ce ma kai tea cäphaw saite lä aetütü kae. Äni ce lä äma ce üng raitae tea Kai üng särilo kätyng mätu ö vi’ näkha näpa.”

Khimi tea känüng hai y saite na

¹⁰ Tupyng-a Isu lä khimipui na bung kähyng kha äni ce tea “Tängai kha kähawi-a aedawng ö khü ba.

¹¹ Khimi tea Säthaw maw-a nüng hai saite lä täbawng khaw-a kung saite amäjy na y. Tungaila täbawng mang tho saite lä khimi ce tea nüng hai te vi” näkha näpa.

¹² Tupyng-a äkähui na lä Isu tea ly kha “Nang üng thui saite lo thai kha Pharisai na kädawtho te mäny mei” näkha düng pa.

¹³ Isu ma “Känipre üng kai üng Pä-ai ma e y saite äkung angxynlyng na lä äni ma angjüng aephawi king vi ai.

¹⁴ Äni ce tähang bälungbi hang. Äni ce lä mikangjö na tea lolang mätü saite ämi kangjö hai aetawng vi. Mikangjö lawngtä ma äkälang mikangjö tea lolang mätü dylä, änini lawng netä lä angrawng thung-a aeqa hawi vi ai.”

¹⁵ Tupyng-a Peterae ma Isu tea “Honi mätae saite phüng kai ce tea thui mäcai kü” näkha näpa.

¹⁶ Isu ma äni ce tea “Nang ce lä vaihi khytä mäny ö y rawng mei.

¹⁷ Täbawng hai ca saite amäjy lä äjo thung-a tyng kha deithae aely ea tho pang te nang ce mäny ö te be.

¹⁸ Tungaila hawi y saite älo lä bälung thung üng tho te vi. Honi lä khimi tea Säthaw maw-a nüng hai vi.

¹⁹ Khimi bälung thung üng tho saite na lä käsi dawng saite na, khimi bädü saite na, täkübäjang sa saite na, nawngpui nawngpaw y käla mangtä i saite na, bäru saite na, älo bälai saite na, khimi üng säri tea täphra saite na vi.

²⁰ Hini na lä khimi ce tea känüng hai te vi. Äkö aese y käla ca nei te lä khimi tea Säthaw maw-a nüng hai te y” näkha näpa.

Nawngmädi lawngtä üng yng saite phüng

²¹ Isu lä honi mityng üng tho kha Taira hai Sidon märü üng püngkhe dawngpa-a ly pa dy.

²² Tu-a awng saite nawngmädi lawngtä lä Isu tea ly pa dy. Äni lä Kanan ceng nawngmädi vi. Äni ma “Areng, Sanphrang Davidae üng Cäpaw ä, kai tea bäheng kü. Kai cänung lä angra kung kha tengxyng y mätang phi vi dy” näkha hang pa dy.

²³ Tungaila Isu lä nawngmädi tea älo bälangtä lä mäthang pa y. Tukha äkähui na lä “Hini nawngmädi bung mätaw ja la, äni lä mä-ai leithung hui kha hang te vi” näkha näpa.

²⁴ Tupyng-a Isu ma nawngmädi tea “Säthaw ma kai bung la saite beram kätyng Isrelae khimi na tähang ma qaitä mätaw te kae” näkha näpa.

²⁵ Nawngmädi lä cäphaw kha Isu tea “Areng ä, kai tea säbawng kü” näkha näpa.

²⁶ Isu ma “Nade na üng täkaw la kha ui na tea kädesö hethang aeteng te y vi” näkha näpa.

²⁷ Nawngmädi ma Isu tea “Areng ä, älawng mang. Tungaila äcaw na ma ca saite kaebang na lä böloka teng üng ui na mäteng ma ca ö te kae vi” näkha näpa.

²⁸ Tukätephüng-a Isu ma äni tea “Nang üng yng te lä lengphi vi. Nang ma üng mäkai te kätyng lawng sy” näpa. Honi kätü-a ma äcänung lä naw te hawi pa vi dy.

Isu ma khimi ce tea känaw käsaw hawi sa pa

²⁹ Isu lä honi mityng üng tho kha Kalile tuilipui mang-a ly dy. Tupyng-a äni lä me anghung-a paw ea aety kha awng pa dy.

³⁰ Khimipui na lä Isu tea ly pa ö dy. Äni ce lä äkho kangbai, ämi kangjö, khimi kaeqa, lo-ae na, hai äkälang känaw käsaw awng saite na bung nähai kha Isu üng khokung-a khai pa ö dy. Tukha Isu ma hini känaw angxynlyng na bung hawi sa pa dy.

³¹ Khimipui na lä cangxei ö vi dy. Äni ce lä lo-ae älo aepe te, khimi kaeqa hawi te, kho kangbai aeke te, mikangjö mi aevang te na tea nung pa ö dy. Tukha khimipui na lä Isrelae ceng üng Säthaw tea bälaw ö dy.

Isu ma khimi sang bälitä na tea mäcaw pa

³² Isu ma äkähui na tea kähyng kha äni ce tea “Hini khimi ce lä kai hai mangtä käni thungtä tütü awng ö te vi dy. Vaihi äni ce lä ca nei hethang äte la awng y. Tukätephüng-a äni ce tea kai lä bäheng phi vi dy. Kai lä äni ce tea mäcaw y käla mätaw dylä, äni ce lä lolang säla-a baiphi kha aetüng ö he kae dy” näkha näpa.

³³ Äkähui na ma Isu tea “Hini daithung kärang-a khimipui tea mäcaw haw hethang khytä käcakänei ma üng dang haw ai mei” näkha näpa.

³⁴ Isu ma äni ce tea “Nang ce tea täkaw phe majetä awng mei” näkha düng pa. Äni ce ma “Täkaw phe säritä hai mawi cäpi äje cäcawtä awng” näkha näpa.

³⁵ Isu ma khimipui na bung älawng qawng-a aety hethang thui pa dy.

³⁶ Tupyng-a äni lä täkaw phe säritä hai mawi bung süng kha Säthaw tea bälaw pa dy. Tupyng-a täkaw hai mawi na täpe kha äkähui na tea py pa dy. Äkähui na ma täkaw hai mawi na khimi ce tea bäri pa dy.

³⁷ Khimipui angxynlyng na lä äjo käkawi-a ca ö dy. Tupyng-a äkähui na lä käca kaebang na mäküng kha tawng säritä kawi pre-a dang ö vi rawng.

³⁸ Ca saite nawngmäcaw na lä lawng sang bälitä awng vi. Nawngmädi na hai nade na lä qa be vi rawng.

³⁹ Tupyng-a Isu lä khimipui bung mätaw haile pa dy. Isu lä bälawng qawng-a paw kha Makadan khö-a ly dy.