Mathai 1 - Caekäcai Kangthae (Lemi)

Isu Khrista üng ärui ceng na

¹ Hini lä Isu Khrista üng ärui äceng phüng tärü te cae vi. Isu lä sanphrang Davidae üng kaesui kaebeng vi. Sanphrang Davidae lä Abraham üng kaesui vi.

² Abraham lä Isaika üng pä-ai vi. Isaika lä Jaeko pä-ai vi. Jaeko lä Judae hai kangby jä-ai na üng pä-ai vi.

³ Judae lä Pere hai Jera üng pä-ai vi. Änini üng nä-awi lä Tamar vi. Pere lä Heron pä-ai vi. Heron lä Ram pä-ai vi.

⁴ Ram lä Anminade pä-ai. Anminade lä Nason pä-ai vi. Nason lä Salamon üng pä-ai vi.

⁵ Salamon lä Boaz pä-ai. Äni üng nä-awi Raha vi. Obe üng pä-ai lä Boaz vi. Äni üng nä-awi lä Rutha vi. Obe lä Jese üng pä-ai vi.

⁶ Jese lä sanphrang Davidae üng pä-ai vi. Davidae lä Solomon üng pä-ai vi. Solomon üng nä-awi lä Uria üng nawngpui-a aelawng vai vi.

⁷ Solomon lä Rehobon üng pä-ai vi. Rehobon lä Abija üng pä-ai vi. Abija lä Asa üng pä-ai vi.

⁸ Asa lä Jehosafae üng pä-ai, Jehosafae lä Jehoran üng pä-ai, Jehoran lä Uzia üng pä-ai vi.

⁹ Uzia lä Jothan üng pä-ai, Jothan lä Aha üng pä-ai. Aha lä Hezekia üng pä-ai vi.

¹⁰ Hezekia lä Manase üng pä-ai, Manase lä Amon üng pä-ai. Amon lä Josia üng pä-ai vi.

¹¹ Josia lä Jekonia hai äni üng kangby na üng pä-ai vi. Honi kätü-a Babilon khimi na lä Judae na bung Babilon pre-a aethaw paitae hai nähai pa vi.

¹² Babilon pre-a Judae khimi na bung nähai pyng-a Jekonia lä Sete üng pä-ai, Sete lä Zerubabel üng pä-ai vi.

¹³ Zerubabel lä Abi üng pä-ai. Abi lä Eliakim üng pä-ai. Eliakim lä Azo üng pä-ai vi.

¹⁴ Azo lä Zado üng pä-ai vi. Zado lä Akin üng pä-ai vi. Akin lä Elin üng pä-ai vi.

¹⁵ Elin lä Eliaza üng pä-ai vi. Eliaza lä Mathan üng pä-ai vi. Mathan lä Jaeko üng pä-ai vi.

¹⁶ Jaeko lä Josefae üng pä-ai vi. Josefae lä Maeri üng nawngpaw vi. Maeri ma Isu bung aepeng pa te vi. Khimi ce lä Isu tea Mesia näkha kähyng ö vi.

¹⁷ Abraham üng hai sanphrang Davidae khytä dung hawlai bälitä awng vi. Babilon khimi na ma Isrelae khimi na bung äni ce pre-a nähai te khytä sanphrang Davidae üng hai dung hawlai bälitä awng be rawng. Honi üng hai Mesia aepeng te khytä lä dung hawlai bälitä vi.

Isu Khrista aepeng saite

¹⁸ Hini lä Isu Khrista makä aepeng ai mei näte äphüng vi. Äni üng nä-awi Maeri lä Josefae hai aepawng hethang aedo pyng vi dy. Änini mangtä awng y te kälang-a Muilaw Käcai ma Maeri tea äjopawng hai te Maeri lä mäny vi.

¹⁹ Josefae lä cüng saite khimi lawngtä vi te phüng-a Maeri tea khimi ce maw-a kaejae py hethang ngai y. Khimi ce mäny y rungtä Maeri bung aekhai hethang näkha aedawng pa vi dy.

²⁰ Tungaila hini kätyng äni aedawng te kätü-a Säthaw üng angtawtha lawngtä lä äni tea aemang-a aetüng kha “Davidae cäpaw Josefae ä, Maeri bung nang lä nawngpui kätyng la hethang aenaw hang. Makäte phüng-a mei nädylä Muilaw Käcai ma äni tea äjopawng hai te vi.

²¹ Äni lä cäpaw lawngtä aepeng ai. Nang lä Äni tea ‘Isu’ näkha ämüng mäthi ba. Ätephüng-a mei nädylä Äni lä Äma üng khimi na bung hunghö thung üng aeqang vi ai” näkha näpa.

²² Hini äphüng na lä Säthaw ma jangni-a buisaw Isaia te mang thui saite lo tea cungrü hai hethang vi.

²³ Buisaw Isaia ma “Anglaw käcai lä äjopawng ea cäpaw aepeng ai. Khimi ce ma Emanuela näkha ka ö ai.” Honi älawngsai lä “Säthaw lä mä-ai hai mangtä awng” näte vi näkha näpa.

²⁴ Josefae i aelaw kha äni tea Säthaw üng angtawtha ma thui te kätyng Maeri bung ing-a nähai ea nawngpui kätyng bälawng vi dy.

²⁵ Tungaila äni lä nawngpui äby aepeng y rytä mangtä i hai y. Tukha äni lä äby tea “Isu” näkha ämüng mäthi dy.