Marka 6 - Caekäcai Kangthae (Lemi)

Nazare märü khimi ce ma Isu tea tämö khai pa y

¹ Isu lä äkähui na hai mangtä honi mityng üng tho kha äma awng vai saite Nazare märü-a tyng dy.

² Aehae te Käni-a, Isu lä Judae na üng ingkäcai thung-a Säthaw lo mätu pa dy. Äni üng lo thai saite khimi awng mang te na lä cangxei ö bawi vi. Äni ce ma “Äni lä hini lo na mamang üng aetu te mei. Ämi ma äni tea hini bälungkähae py pa te mei. Äni lä cangxei saite na mäteng sa na ly.

³ Äni lä lasämae kae be. Maeri üng cäpaw y vi nang mei. Jaeko, Josefae, Judae, hai Simon ce üng jä-ai y vi mei. Äni üng ticaw na lä mä-ai hai hi-a awng te y mei” näkha näpa. Tukätephüng-a äni ce lä Isu tea tämö khai pa ö y dy.

⁴ Isu ma äni ce tea “Buisaw lawngtä bung lä mityng qütä-a khimi ce ma tämö khai pa vi. Tungaila äma üng märü hai äma üng amäjy na hai ingthung na ma äma ce üng mityng qaitä-a lä tämö khai pa y vi” näpa.

⁵ Isu lä honi märü-a naw saite khimi äjecäcaw na tea äkö thyng kha hawi sa pa te kae. Cangxei saite kälang na lä sa haw pa y.

⁶ Khimi ce lä Isu tea yng y te phüng-a, äni lä cangxei pa vi dy. Tupyng-a Isu lä äteng äpa üng vang na mang-a ly kha Säthaw üng Angthang Kähawi khimi ce tea mätu pa.

Äkähui lawng hawlai netä na bung Isu ma mätaw pa

⁷ Äkähui lawng hawlai netä na bung äma tea ka pyng-a lawng netä lawng netä täbawi kha mätaw pa dy. Tukha angra na bung mätho hethang aenae py pa.

⁸ Isu ma “Nang ce lä khölawng-a pawngpai qaitä pyng dylä äte haetä la nähai ö y ma. Käcakänei, cawngkö, tangkae phawisae na nähai ö y ma.

⁹ Kho painai aecö ö. Kä-o kaeqai la nähai ö y ma hang.

¹⁰ Honi märü üng tho y rytä lä nang ce bung lady saite ing-a ma aehae ö kae.

¹¹ Märü haetä-a khimi ce ma nang ce bung lady ö y dylä, nang ce lo tängai ö y vi dylä, nang ma ce honi mityng üng tho te kätü-a lä, nang ma ce üng khodi na täkhy pang ö. Nang ce hikä sa te hai-a Säthaw ma äni ce tea kädawtho te phüng khimi ce tea mätü ai” näkha täru khi pa dy.

¹² Äkähui na lä tho kha khimi ce hunghö üng ae-ui hethang tähang Säthaw lo thui pa ö dy.

¹³ Angra awng mang te na bung la mätho ö dy. Känaw käsaw awng saite na tea lä situi hai bäjö kha naw te na tea hawi sa pa ö dy.

Baptismae Johan dü te

¹⁴ Isu üng angthang lä mityng qütä aepreng pa te phüng-a sanphrang Herodae la äni üng äphüng thai vi dy. Khimi phütä na ma “Baptismae Johan lä kädü thung üng aetha haile tyng te vi. Tukätephüng-a äni lä cangxei saite na sa haw te vi” näpa.

¹⁵ Kälang phütä na ma “Äni lä Elijae vi” näkha nä ö vi. Kälang phütä na ma lä “Äni lä vaicaw üng buisaw na kätyng buisaw lawngtä by vi” näkha näpa.

¹⁶ Khimi ce ma thui te lo Herodae ma thai te kätü-a lä “Kai ma älö byng hai saite Baptismae Johan lä hing haile tyng te vi müng” näkha nä dy.

¹⁷ Herodae äma khekhe ma Baptismae Johan bung ne kha thawng thung-a bäla pa te vi. Herodae lä äkangby Philip üng nawngpui Herodia bung aepawng kha änawngpui üng kängai-a Johan tea sa pa te vi.

¹⁸ Ätephüng-a mei nädylä Baptismae Johan ma Herodae tea “Nang lä nang kangby üng nawngpui bung la te lä Mosi üng Ubädi hai aebäla te y vi” näkha pring jawjaw pa te vi.

¹⁹ Tukätephüng-a Herodia lä Johan tea bälungkae-i khai kha bädü hethang ngai pa te vi. Tungaila Herodae phüng-a äni lä Johan bung bädü haw pa te y vi.

²⁰ Baptismae Johan lä khimi cüng saite hai käcai vi näte Herodae lä mäny pa te phüng-a Johan tea ri kha kähawi-a rui pa te vi. Tukha Herodae ma Johan üng älo na thai ea lä bälung hawi y phi ngaila äni lä Johan üng lo tea ngai kha tängai jawjaw te vi.

²¹ Kangkhüng-a lä Herodia lä Johan bung bädü hethang älang dang pa vi dy. Honi lä Herodae üng aepeng saite pawi käni-a vi. Honi käni-a Herodae lä Kalile khö üng mätawngky na, reisae mätawngky na, tämö khai he hawi saite mätawng käleng käsai na bung ka kha pawi käleng sa pa dy.

²² Honi pawi-a Herodia üng cänung lä kung kha lang pa ea lä Herodae hai äma üng angvüng angxynlyng na la anghawtho kha bälung aevaw phi pa ö vi. Tukätephüng-a sanphrang Herodae ma lä anglaw tea “Nang ngai saite amäjy mäkai ba. Kai py ai mang.

²³ Kai üng pre kaehütä mäteng ma nang mäkai saite khytä kai py ai mang” näkha täking ea älo aedo khü pa dy.

²⁴ Honi anglaw lä tho kha änä-awi tea “Kai lä äte ta mäkai ai mei” näkha düng pa. Änä-awi ma “Baptismae Johan üng älö tea mäkai” näkha mäthang pa.

²⁵ Anglaw ma lä sanphrang Herodae tea ly dawde kha “Baptismae Johan üng älö vaihi ma pangkae qawng-a khai kha py hethang kai lä ngai te vi” näkha näpa dy.

²⁶ Tukha sanphrang Herodae lä bälung hawi y phi pa vi dy. Tungaila angvüng angvaw na lä äni üng älo aedo saite thai ö bawi kha anglaw üng mäkai saite tea lä e haw pa y vi dy.

²⁷ Tukätephüng-a Johan üng älö la hethang äma üng reisae lawngtä bung mätaw praw dy. Reisae la thawng thung-a ly kha Johan üng älö byng po pa dy.

²⁸ Tudylä pangkae qawng-a Johan üng älö thyng kha nähai ea anglaw tähang py pa. Anglaw la änä-awi tea py pa dy.

²⁹ Hini angthang Johan üng äkähui na ma thai dylä Johan üng äro bung la kha ö pa vi dy.

Isu ma khimi lawng sang bangawtä na tea mäcaw pa

³⁰ Angtawtha na lä Isu tea vawi haile kha äma ce sa saite angxynlyng na hai Säthaw lo mätu saite na phüng thui pa ö dy.

³¹ Kung tho saite khimi na lä awng mang pa te phüng-a Isu hai angtawtha na lä bö ca hethang kätü mäteng ma dang pa ö y. Tukätephüng-a Isu ma äni ce tea “Khimi awng y saite mityng-a Aehae hethang ly ö si co” näkha näpa dy.

³² Tukätephüng-a äni ce lä khimi awng y saite mityng-a bälawng hai aekae ö dy.

³³ Tungaila khimipui na lä äni ce tho te nung kha Isu hai äkähui na näte mäny ö vi. Tukätephüng-a märü, vang na mang üng khimi awng mang te na lä Isu ly saite mityng mang-a mepui mang hui kha Isu hai äkähui na tyng y te kälang-a ma tyng ö rüng pa vi dy.

³⁴ Isu lä bälawng üng aerung kha paw te kätü-a lä, khimipui na tea nung dy. Beram rui te kung awng y saite beram na kätyng awng pa te phüng-a Isu lä äni ce tea bäheng vi dy. Tukätephüng-a Säthaw lo äni ce tea mätu mang pa.

³⁵ Ving aetawng te kätü-a lä äkähui na ma Isu tea ly kha “Hini lä vang, märü na hai hanglaw saite mityng kae vi.

³⁶ Kätü lä mätü te vi dy. Käcakänei na ca haw hethang khimi ce bung lä särawng dawngpa vang na mang-a mätaw kae” näkha näpa.

³⁷ Tungaila Isu ma äni ce tea “Nang ce lä äni ce tea käcakänei na mäcaw pa ö” näpa. Tukha äni ce ma Isu tea, “Hini khimi angxynlyng na tea mäcaw hethang lä khimi lawngtä law täjaetä kälu sa te vang jetä ngai vi ai” näkha näpa.

³⁸ Isu ma “Nang ce tea ca nae majetä awng mei. Kheng ö re” näpa. Äni ce kheng ea lä “Täkaw phe bangawtä hai mawi käcei me netä awng kae” näkha näpa.

³⁹ Isu lä khimi angxynlyng na bung aeca qawng-a äly äly-a aety hai ö hethang äkähui na tea thui pa.

⁴⁰ Tukha khimi ce lä lawng cungvaitä, lawng rui bangtä äly äly-a aety ö pa dy.

⁴¹ Tupyng-a Isu lä täkaw phe bangawtä hai mawi me netä tea la ea käni khösang mang-a kheng tähang kha Säthaw tea kawng te lo thui pa dy. Tukätephüng-a täkaw tea täpe kha khimi ce tea bäri hethang äkähui na tähang py pa dy. Hini kätyng mawi me netä tea la täphü kha äni ce tähang py bawi pa dy.

⁴² Khimi angxynlyng äjo käkawi-a ca ö dy.

⁴³ Tupyng-a äkähui na lä täkaw hai mawi na ca te kaebang mäküng ea lä tawng hawlai netä kawi tynglyng pa vi rawng.

⁴⁴ Täkaw ca saite khimi nawngmäcaw na lä lawng sang bangtä tingtang awng ö te vi.

Isu lä tui qawng-a aeke pa

⁴⁵ Isu lä qengtäma äkähui na bung bälawng qawng-a paw hai ea tuilipui üng rei mang-a awng saite Besaida märü mang-a aekae hai rüng pa dy. Äni ma khimi angxynlyng na bung lä ing-a mätaw pa vi dy.

⁴⁶ Isu lä khimi angxynlyng na tea “Kähawi-a vawi ö lawi ba ä” näkha thui pa pyng ea lä aetang hethang me anghung mang-a paw pa vi dy.

⁴⁷ Kärung thung-a lä äkähui na üng bälawng lä tuilipui säla ung-a tyng pa vi dy. Hokä ea Isu lä äma qaitä mepui-a awng pa te kae vi.

⁴⁸ Aelipui hai aesimu kha äkähui na lä bälawng haw hethang rae bärai ö te tea Isu lä nung pa vi dy. Khö aevang y kälang-a äma lä tui qawng-a aeke kha äni ce tea ly pa dy. Tukha Isu lä äni ce teng mang cäqeng kha ly he sa pa.

⁴⁹ Äkähui na lä Isu tui qawng-a aeke te tea nung te kätü-a lä seisi käthi kha täpe ö pa vi dy.

⁵⁰ Äni ce lä Isu bung nung te kätü-a ri ö bawi pa vi dy. Tukha Isu ma äni ce tea “Aethaw aela ö. Kai kae ecy. Ri ö hang” näkha näpa.

⁵¹ Tupyng-a Isu lä äni ce awng saite bälawng qawng-a paw pa dy. Tudylä aeli lä ding pa kha äni ce la tengxyng y cangxei ö vi dy.

⁵² Ätephüng-a mei nädylä Isu ma täkaw mäcaw te thüng-a äma ce nung pyng saite na üng älawngsai lä äni ce mäny ö y te phüng-a vi. Äni ce üng bälung lä tangkö ö te phüng-a vi.

Kenesare märü-a khimi känaw bung Isu ma hawi sa pa

⁵³ Isu hai äkähui na lä tuilipui rei mang-a aekae ö dy. Kenesare khö-a tyng kha bälawng mäkhing ö dy.

⁵⁴ Äni ce bälawng üng aerung kha paw te hai khimi ce lä Isu tea mae praw pa ö te vi.

⁵⁵ Tukätephüng-a khimi ce lä äma ce üng khöri-a aehui kha khimi känaw na bung aejawng nae hai aejawng kha Isu awng saite mityng-a nähai pa ö dy.

⁵⁶ Tukha Isu ly saite märü, vang qütä, lolang qütä-a khimi känaw na bung khai ö dy. Isu üng kä-o tawng bung khimi känaw na tea aela hai pa hethang mäkai ö pa dy. Aela hethang dang saite khimi känaw angxynlyng na lä naw te hawi ö pa vi dy.