Marka 5 - Caekäcai Kangthae (Lemi)

Isu ma angra na kung saite khimi bung hawi sa pa

¹ Isu hai äkähui na lä Kalile tuilipui rei mang-a awng saite Kerasene khö-a tyng ö dy.

² Isu lä bälawng üng aerung praw te hai angra kung saite khimi lawngtä lä täprawng mang üng tho kha Isu tea aeting pa vi.

³ Hini khimi lä täprawng-a awng jawjaw te vi. Ämi lawngtä ma la äni bung lä singqy rui hai mäteng mäkhing kha khai haw te y vi.

⁴ Khimi ce ma äni üng äkö hai äkho-a singqy rui hai mäkhing leilae ngaila singqy rui na tea lä aethobae vävawi te kae vi. Ämi lawngtä ma la äni tea bäja hethang aethaw awng pa y.

⁵ Tukha kärung käni qütä äni lä täprawng säla hai anghung na-a awng pa vi. Äma ma tea la kälung na hai ae-ae kha awng pa te vi.

⁶ Äni ma Isu bung kähanglaw mang nung te kätü-a lä aehui kha ämaw-a aebo pa dy.

⁷ Tukha äni ma “Aesangky Säthaw üng Cäpaw Isu ä, kai tea nang lä äte sa hethang ngai hai te mei. Kai tea mätang bälai-a sa y hethang Säthaw üng ämüng hai älo aedo khü jo” näkha ätüng käleng hai hang pa vi dy.

⁸ Hikä äni thui te lä Isu ma “Angra ä, hini khimi thung üng tho la” näkha näpa pyng te phüng-a vi.

⁹ Isu ma äni tea “Nang ämüng lä ämi mei” näkha düng pa. Tukha äni ma “Kai üng ämüng lä angra kanghö vi. Kai ce lä awng mang te vi” näpa.

¹⁰ Tukha äni ce bung honi khö üng mäthoja y hethang Isu tea äni lä aebai leilae pa vi dy.

¹¹ Me anghung teng-a o kanghö käleng lä raca ca te awng pa vi.

¹² Angra na ma Isu tea “Kai ce bung o na thung-a kung hethang py kü jo” näkha mäkai pa.

¹³ Isu lä äni ce mäkai te kätyng kung hethang py pa dy. Angra na lä khimi te üng tho kha o na thung-a kung ö dy. Sang netä tingtang awng saite o kanghö na lä täkha mang-a aehui käthu kha tuilipui thung-a aesänung ea dü king ö pa vi dy.

¹⁴ O bung rui saite khimi na lä aehui kha märü hai särawng dawngpa na-a awng saite khimi na tea hini phüng thui pa ö dy. Tukha khimi ce lä ha-a makä mei näte na kheng hethang ly pa ö dy.

¹⁵ Äni ce lä Isu tea tyng te kätü-a angra kung vai saite khimi lä bälung cüng haile kha kä-o aelawng ea aety te nung ö dy. Tukha äni ce lä ri ö phi vi dy.

¹⁶ Nung khe saite khimi na ma lä angra kung vai saite khimi tea makä sa kha hawi haile te mei näsaite hai o na phüng khimi ce tea thui pa ö by dy.

¹⁷ Tudylä khimi ce lä Isu tea äma ce khö üng tho hethang mäkai pa ö dy.

¹⁸ Isu lä bälawng qawng-a paw ea angra kung vai saite khimi ma äni leithung hui hethang mäkai pa dy.

¹⁹ Tungaila Isu ma äni tea äma leithung hui y hethang mäkhang pa vi. Isu ma äni tea “Ing-a phai vawi kha nang üng engthung na tea Areng ma nang tea kähawiky sa saite na phüng thui pa ba. Nang tea Areng ma bäheng phi saite na phüng äni ce tea thui” näpa.

²⁰ Tukätephüng-a äni lä ly kha Isu ma äni tea kähawiky sa saite na phüng Dikapoli khö angxynlyng na-a thui pa dy. Tukha thai saite khimi angxynlyng lä cangxei ö vi dy.

Jairae cänung hai Isu üng kä-o aela saite nawngmädi

²¹ Isu lä tuilipui rei mang-a bälawng hai aekae haile dy. Tuilipui teng-a khimipui awng mang saite na lä äni tea aekäcüng ö dy.

²² Jairae näsaite Judae na üng ingkäcai mätawngky lä tyng pa vi. Äni lä Isu bung nung te kätü-a ämaw-a aebo ea,

²³ “Kai üng cänung anglaw cäpi lä dü ai dy. Ly kha äni qawng-a nang üng äkö thyng pa kü. Tudylä kai cänung lä naw te hawi kha hing haile ai” näkha mäkai pa.

²⁴ Tukha Isu lä äni hai mangtä hui pa dy. Awng mang saite khimi na lä Isu tea hui ea ae-e kha aenui ö vi dy.

²⁵ Khösäning hawlai netä äthi märaw kha naw mätang saite nawngmädi lawngtä la hani mityng-a awng pa by.

²⁶ Äni tea latang awng mang te na ma aesi sa kha mätangbälai hai mang pa te vi. Awng saite tangkae na la byng king pa vi dy. Tungaila naw saite lä hawi y käla si rae pa vi.

²⁷ Äni lä Isu üng angthang thai te phüng-a khimipui thung mang Isu leithung-a tyng kha äni üng kä-o tea aela pa vi dy.

²⁸ Äni lä “Kai lä Areng üng kä-o na tea aela dylä, kai üng naw saite lä hawi king vi ai” näkha aedawng dy.

²⁹ Tukha nawngmädi lä Isu üng kä-o tea aela te hai äni üng äthi märaw saite lä khae praw pa vi dy. Äni üng ätabung thung-a naw saite lä hawi te äma la aemäny vi dy.

³⁰ Isu lä äma üng haidae tho te aemäny praw pa vi dy. Tukätephüng-a khimipui na tea aehawi ea “Kai üng kä-o tea ämi aela te mei” näkha düng pa.

³¹ Äkähui na ma “Khimipui na ae-e kha aenui te nang ma mäny ea ma makäte phüng-a kai tea ämi aela te mei näkha düng te vi mei” näkha mäthang pa.

³² Tungaila Isu lä äma tea aela saite khimi bung aeting hethang kheng prei pa vi dy.

³³ Tupyng-a Isu üng kä-o-a aela saite nawngmädi lä äma üng nawsaw hawi saite phüng mäny kha ri te hai käsawtho ea Isu üng ämaw-a aebo kha angxynlyng kätüng khaw-a thui pa dy.

³⁴ Isu ma äni tea “Cänung ä, kai tea yng te phüng-a Säthaw ma nang tea hawi hai te vi dy. Awneng te hai ly lawi ba. Nang lä naw mätang te üng hawi te dy” näpa.

³⁵ Hikä Isu ma thui te thüng-a Ingkäcai mätawngky Jairae ing üng khimi phütä na lä tyng ö ea “Nang üng cänung lä dü vi dy. Särae tea xhu hai vi hang lawi” näpa.

³⁶ Isu lä äni ce üng lo tea dawngcang y käla “Bälung mawng y ma. Yng jawjaw ba” näkha Jairae tea näpa.

³⁷ Tupyng-a Isu lä Peterae, Jaeko hai Jaeko üng kangby Johan ce tea ma qaitä äma leithung hui hai kha kälang na tea lä hui hai pa y vi.

³⁸ Äni ce lä Jairae ing-a tyng te kätü-a, khimi awngmang-a ätüng käleng hai tünglung-a raw ö sung te Isu lä thai pa dy.

³⁹ Isu lä engthung-a kung kha äni ce tea “Nang ce lä raw ö sung näpi y ma. Nade lä dü te y. I te kae ecy” näpa.

⁴⁰ Hokä thui pa ea lä khimi ce ma Isu tea mänui hai pa ö dy. Isu lä äni ce bung ing ärang mang-a mätho kha nawngmädi nade üng nä-awi pä-ai hai äkähui lawng thungtä na bung ka kha nade awng saite mityng-a kung ö dy.

⁴¹ Isu lä nade üng kö süng ea “Taltha, Koum” näkha näpa. Thui te älawngsai lä “Anglaw ä, aetha lawi” näte vi.

⁴² Tänaetäma anglaw lä aetha kha aeke praw pa vi dy. Hini anglaw lä khösäning hawlai netä awng pa dy. Tukätephüng-a khimi ce lä tengxyng y cangxei ö vi dy.

⁴³ Isu lä äni ce tea “Hini phüng ämi tea la thui ö hang. Anglaw tähang ca nae py pa ba” näkha täru khi pa.