Marka 2 - Caekäcai Kangthae (Lemi)

Isu ma kökho dü saite khimi lawngtä bung hawi sa pa

¹ Käni ne, thungtä pyng-a Isu lä Kapernawm märü thung-a kung haile kha khimi ce lä Isu vawi haile te angthang thai ö vi dy.

² Isu awng te ing-a mityng aekawng y rung khytä khimi ce lä aekäcüng ö vi. Ing maw-a mäteng ma mityng awng pa y vi dy. Isu ma äni ce tea Säthaw lo thui pa.

³ Khimi lawng bälitä na lä kökho kädü khimi lawngtä bung aejawng kha Isu tea ly hai hethang ngai ö dy.

⁴ Khimi awng mang te phüng-a äni ce lä kökho kädü khimi bung Isu tea nähai haw pa ö y. Tukätephüng-a äni ce lä ingphö qawng-a paw ea älawng ngang hai lawi kha aebu saite ingphö tea khawng ea äkhaw sa ö dy. Tukha äkhaw mang i nae qawng-a aesawng saite kökho kädü khimi bung Isu üng ämaw-a bäla käthu pa ö dy.

⁵ Isu lä kökho kädü hai äni bung nähai saite khimi na üng yng ö phi te tea nung dy. Tukha Isu ma kökho kädü khimi tea “Änang ä, nang üng hunghö bung kai ma bälawi vi dy” näpa.

⁶ Ingthung-a Ubädi särae phütä na lä aety ö dy.

⁷ Äni ce ma “Ätephüng-a hini khimi lä hakä thui vawng te vi mei. Äni lä Säthaw kätyng aesa te vi to. Säthaw lawngtä xyng ni hunghö bälawi haw te kae be” näkha äni ce lä aedawng ö dy.

⁸ Äni ce üng bälung thung-a aedawng saite tea Isu lä mae praw kha äni ce tea “Ätephüng-a nang ce lä tukäti na dawng ö te vi mei.

⁹ Kökho dü saite khimi tea ‘Nang üng hunghö bälawi dy’ näte jaky mei y käla ‘Aetha ea nang üng i nae la kha aeke lawi’ näte jaky mei.

¹⁰ Tungaila Kai, Khimi üng Cäpaw, lä älawng qawng-a hunghö na bälawi hethang aenae awng näte kai ma mätü ai” näpa. Tukha Isu lä kökho kädü khimi te mang-a aehawi pa dy.

¹¹ Äni ma “Tängai ba. Aetha ea i nae süng kha ing-a vawi lawi cü” näpa.

¹² Tudylä äni lä aetha ea äma üng i nae süng kha khimi angxynlyng na maw mang ly ja pa vi dy. Tukha khimi angxynlyng na ma “A, hini kätyng cangxei saite mä-ai lä qengtä la nung vai te y vi ly” näkha Säthaw tea bälaw ö vi dy.

Angko cawng saite khimi lawngtä bung Isu ma ka pa

¹³ Tupyng-a Isu lä Kalile tuilipui pyng-a ly haile be dy. Khimipui lä Isu tea ly kha äni ce tea Isu ma Säthaw üng lo mätu pa.

¹⁴ Isu lä aeke te thüng-a Alphai üng cäpaw Levi bung nung dy. Levi lä Rom aecörae na tähang angko cawng saite khimi vi. Äni lä äma üng jung-a aety kha awng te vi. Isu ma äni tea “Kai leithung hui lawi” näkha näpa. Tukha Levi la aetha praw ea Isu leithung hui pa dy.

¹⁵ Honi kädüng-a ma Isu lä äkähui na hai mangtä Levi üng ing-a kädüngbö ca dy. Angko cawng saite na hai khimi hunghö na lä äni ce hai mangtä bö ca ö te by vi. Ätephüng-a mei nädylä honi thung üng awng mang saite khimi na lä Isu leithung hui ö te vi.

¹⁶ Tukha Pharisai lawng saite Ubädi särae phütä na ma angko cawng saite khimi na, khimi hunghö na hai Isu lä bö mangtä ca te nung ö ea äni ce ma Isu üng äkähui na tea “Makäte äni lä angko cawng saite na, khimi hunghö na hai mangtä bö ca te vi mei” näkha düng pa ö dy.

¹⁷ Isu ma hokä thui te lo thai kha äni ce tea “Känaw käsaw awng y saite na lä, latang bung ngai y lyng. Tungaila naw saite khimi lä ngai vi. Kai lä khimi cüng saite na bung ka hethang ly te y. Khimi hunghö na bung ka hethang ly te kae” näkha mäthang pa.

Isu tea böjae saite phüng düng pa

¹⁸ Baptismae Johan üng äkähui na hai Pharisai na lä böjae saite kätü khai ö te vi. Khimi phütä na ma Isu tea ly kha “Baptismae Johan üng äkähui na hai Pharisai na üng äkähui na lä böjae ö be. Nang üng äkähui na lä makäte phüng-a böjae ö y te vi mei” näkha düng pa vi.

¹⁹ Isu ma “Aepawng saite särai üng rawijae na lä äma hai mangtä awng te kätü-a, böjae te awng bi y. Aepawng saite särai awng te thüng-a lä böjae te awng bi y.

²⁰ Tungaila aepawng saite särai lä äni üng rawijae na hai aeprei kha awng te kätü lä tyng ai rawng. Hini kätü-a lä äni ce la böjae ö vi ai.

²¹ “Kä-o kangrüng ngang tea kangthae ngang hai bang kha hui te lä, awng vai y. Hokä hui dylä, kä-o kangthae ngang lä aeje kha kangrüng ngang lä aesä-ei rae vi ai baw.

²² Khimi ce lä mawiphö bung kangrüng thung-a Cäpje tui kangthae mäkawi vai te y vi. Honi kätyng mäkawi dylä, Cäpje tui kangthae phüng-a mawiphö bung lä aesä-ei hai kha, Cäpje tui hai mawiphö bung la pra vi ai. Cäpje tui kangthae lä mawiphö bung kangthae-a ni mäkawi saite kae vi” näkha mäthang pa.

Aehae saite käni üng Areng

²³ Aehae te Känitä-a Isu lä äkähui na hai mangtä lai mang-a aeke prei ö dy. Äma üng äkähui na lä caw me khei kha ca hethang lai caw vui na sädy pa ö vi.

²⁴ Tukätephüng-a Pharisai na ma Isu tea “Kheng kae-e, nang üng äkähui na lä Aehae te Käni-a aesyng y saite kälu sa ö vi” näkha näpa.

²⁵ Isu ma “Sanphrang Davidae lä äma üng äpy phütä hai äjo aelang te kätü-a makä sa mei näte phüng nang ce lä Caekäcai-a qengtä la phai vai y vi nang mei.

²⁶ Mäthykung kälengky Abitha üng kätü-a, Davidae lä Säthaw üng Taipung thung-a kung kha Säthaw tea a saite täkaw la kha ca vi. Tukha äni lä äma üng äpy na tea phütä py pa te by vi. Honi täkaw lä Mosi üng Ubädi kätyng mäthykung na ma ca saite kae vi” näkha mäthang pa.

²⁷ Tupyng-a Isu ma äni ce tea “Säthaw ma khimi ce tähang Aehae te Käni sa te kae. Säthaw ma khimi ce bung lä Aehae saite Käni tähang sa te y vi.

²⁸ Tukätephüng-a Kai, Khimi üng Cäpaw, lä Aehae te Käni üng Areng la vi” näpa.