Marka 16 - Caekäcai Kangthae (Lemi)

Isu lä kädü thung üng aetha haile tyng pa

¹ Aehae te Käni pyng-a Makadala märü üng Maeri, Jaeko üng nä-awi Maeri hai Salome ce lä Isu üng äro tea kälo hethang rimui äxainai na rang ö dy.

² Käni säritä üng angcü käni kädang thawde käni tho te kätü-a äni ce lä täprawng-a ly ö dy.

^3-4 Lolang-a äni ce lä “Täprawng khaw üng kälung tea lä mä-ai tähang ämi ma käsü pa ai mei” näkha äma ce tingtawi aethui ö dy. Tupyng-a äni ce kheng ea lä tengxyng y leng saite kälung käleng lä aethuija te nung ö dy.

⁵ Tudylä äni ce lä täprawng thung-a kung ea lä bangtang mang-a caiping te kä-o kanglung hai aelawng saite särai lawngtä aety te tea nung ö pa vi. Tukätephüng-a äni ce lä aethüng ö dy.

⁶ Honi lawngtä ma äni ce tea “Aethüng ö hang. Nang ce lä thinglang qawng-a täheng kha bädü saite Nazare märü üng Isu bung mäqang ö te kai lä mäny dy. Äni lä hini mityng-a awng y dy. Kädü thung üng Säthaw ma äni bung mätha haile tyng pa pyng vi dy. Hini mityng lä äni üng äro bung bäsawng saite mityng kae ecy.

⁷ Nang ce lä Peterae hai äkähui kälang na tea ly kha ‘Areng lä Kalile khö-a nang ce maw-a ly mang dy. Jangni nang ce tea äni ma thui pyng te kätyng äni bung lä honi mityng-a nung ö ai mang’” näkha thui ö näpa.

⁸ Nawngmädi na lä aethüng te hai käsawtho kha täprawng üng haita aehui ö pang dy. Äni ce lä ri ö phi te phüng-a ämi la nung saite na phüng thui haw ö y dy.

Makadala märü üng Maeri tea Isu lä aetüng pa

⁹ Käni säritä üng angcü käni kädang thawde-a Isu lä kädü thung üng aetha haile tyng pyng ea, angcü-a Makadala märü üng Maeri tea aetüng mang pa. Isu lä angra me säritä hini nawngmädi te üng mätho vai pa te vi.

¹⁰ Äni lä Isu üng äpy na tea ly kha honi angthang thui pa dy. Honi kätü-a äni ce lä bälungsi kha raw ö dy.

¹¹ Isu lä hing haile tyng te phüng hai äma ma nung khe te phüng Maeri ma thui te lo tea äni ce lä yng ö pa y vi.

Äkähui lawng netä tea Isu lä aetüng pa

¹² Tupyng-a äkähui lawng netä lä vang mang-a ly hawi te thüng-a Isu lä äma üng ämaw äcae kälang hai änini tea aetüng pa.

¹³ Änini lä äkähui kälang na tea ly hawi haile kha honi angthang thui hawi ngaila äni ce yng ö pa be y vi.

Isu lä äkähui lawng hawlai haetä na tea aetüng pa

¹⁴ Tupyng-a äkähui lawng hawlai haetä na lä bö ca ö te thüng-a Isu lä äni ce tea aetüng pa dy. Äni ce lä yng ö y te phüng-a hai Isu lä kädü thung üng aetha pyng-a äni bung nung saite khimi na üng älo na tea yng haw y rung khytä bälung tangkö ö te phüng-a Isu ma äni ce tea pring pa dy.

¹⁵ Isu ma äni ce tea “Nang ce lä älawngpre qütä-a ly kha khimi angxynlyng na tea Angthang Kähawi thui ö.

¹⁶ Yng kha baptismae la saite khimi qütä bung lä Säthaw ma aeqang vi ai. Yng y saite khimi qütä tea lä Säthaw ma dungtäsa dengpy vi ai.

¹⁷ Yng saite khimi na lä cangxei saite kamarae na mätü haw ö ai. Äni ce lä kai üng ämüng thui kha angra na bung mätho ö vi ai. Äni ce lä älo kangthae na aepe ö vi ai.

¹⁸ Äni ce lä bärui na bung süng ngaila sy, dü hai saite aesi nei ö te läsy, äni ce tea lä äte käsi la tyng haw y lyng. Känaw käsaw awng saite khimi na qawng-a äni ce üng äkö na thyng kha känaw käsaw na lä hawi ö vi ai” näkha näpa.

Säthaw ma Isu bung Känipre-a nähai pa

¹⁹ Areng Isu lä hokä äkähui na tea thui pyng dylä, Säthaw ma äni bung Känipre mang-a nähaija pa vi dy. Tukha Isu lä Säthaw üng bangtang mang-a aety pa vi dy.

²⁰ Tupyng-a äkähui na lä mityng qütä-a ly kha Angthang Kähawi na thui ö dy. Areng lä äni ce hai mangtä awng pa te vi. Tukha äni ce thui ö saite älo na tüng te phüng mätü hethang tähang-a äni ce tea kamarae na sa hethang haidae na py pa vi dy.