Marka 15 - Caekäcai Kangthae (Lemi)

Pilata mätawngky tea Isu bung tha pa

¹ Kädang thawde-a mäthykung käleng na lä Ubädi särae na, mätawngky na hai Sanhendrin kawngci üng khimi angxynlyng na hai aeting dawde kha älo aedüng ö dy. Tupyng-a äni ce lä Isu bung mäkhing rang pa. Tukha äni bung Pilata mätawngky tea tha pa ö dy.

² Pilata mätawngky ma Isu tea “Nang lä Judae na üng Sanphrang tätang vi nang mei” näkha düng pa. Isu ma “Nang ma thui te kätyng kae dy” näkha mäthang pa.

³ Mäthykung käleng na ma Isu lä sa tämang saite awng mang vi näkha käsi prawng pa ö vi dy.

⁴ Tukätephüng-a Pilata ma Isu tea “Nang lä äni ce tea äte älo bälangtä la mäthang y mei. Äni ce ma nang tea tengxyng y käsi prawng ö te thai y vi nang mei” näkha düng haile pa dy.

⁵ Isu lä älo bälangtä la aepe pa y kha Pilata lä cangxei vi dy.

Isu tea bädü hethang tärae cei pa

⁶ Pilata lä Cäqengja te pawi tyng te qütä khimi ce ma mäkai saite thawngsae lawngtä bung bälawi te lä awng vävawi te vi.

⁷ Honi kätü-a Baraba näsaite khimi lawngtä lä thawng thung-a pä-ung te vi. Äni lä aepuilung hai saite khimi na thung-a qa te vi. Äni lä khimi la bädü saite lawngtä vi.

⁸ Khimipui na lä pawi kätü-a reitae awng te kätyng khimi lawng lawngtä bung bälawi hethang Pilata tea mäkai pa ö dy.

⁹ Pilata ma äni ce tea “Hini Judae na üng Sanphrang bung nang ce tähang bälawi pa ai mei” näkha düng pa.

¹⁰ Mäthykung käleng na ma Isu tea pä-e te phüng-a Isu bung Pilata tea a pa ö dy. Hokä sa te tea Pilata lä kähawi-a mänysy pa vi.

¹¹ Mäthykung käleng na ma mäcü pa te phüng-a khimi angxynlyng na lä Isu jüng-a Baraba bung bälawi hethang mäkai ö pa dy.

¹² Pilata ma khimipui na tea “Kai lä Judae na üng Sanphrang näsaite lawngtä hai makä sa ai mei. Nang ce lä äni bung kai tea makä sa hethang ngai hai ö te mei” näkha düng pa haile be dy.

¹³ Äni ce ma “Äni bung lä thinglang qawng-a täheng kha bädü la” näkha hang pa ö dy.

¹⁴ Pilata ma “Ätephüng-a mei. Äni lä äte sa tämang te awng vi nang mei” näkha düng pa. Tungaila äni ce lä “Äni bung lä thinglang qawng-a täheng kha bädü la” näkha ätüng käleng hai hang rae ö pa vi.

¹⁵ Pilata lä khimipui na üng kängai sa hethang Baraba bung bälawi pa dy. Tukha Isu tea kharui angre hai bo hai kha thinglang qawng-a täheng kha bädü hethang a pa vi dy.

Isu tea Rom reisae na ma mänui hai pa

¹⁶ Rom reisae na lä Isu bung Rom aecörae kälengky üng baesung thung üng leikung-a nähai pyng-a reisae kangkawng angxynlyng na tea aekäcüng hai bawi pa dy.

¹⁷ Tupyng-a Isu tea kä-o kangthing bälawng kha angling cangpre na täkawng ea sa saite lökhu hai khu pa vi.

¹⁸ Tukha äni ce lä “Judae na üng sanphrang lä khö sa hawi sy” näkha mänui hai ea cäphaw te kätyng sa pa ö vi.

¹⁹ Isu üng älö-a säbö kung hai mäkhae pa ö dy. Isu tea mäce hai la mäthawi pa. Äni ce lä Isu üng maw-a khokhö didü kha cäphaw te kätyng sa ö pa vi.

²⁰ Hikä mänui hai pyng dylä äni ce ma kä-o kangthing tea bäling kha Isu üng kä-o bälawng haile tyng pa ö dy. Tupyng-a thinglang qawng-a täheng kha bädü hethang äni ce lä Isu bung nähai ö dy.

Isu bung thinglang qawng-a täheng pa

²¹ Honi kätü-a Sarene märü üng Simon, Alesanda hai Rufu ni üng pä-ai lä vang mang üng ly pa vi. Reisae na ma aethaw paitae hai äni bung ka kha Isu üng thinglang tea aepö hai pa ö dy.

²² Äni ce lä Isu bung Kolakota näsaite mityng-a nähai pa. Kolakota näte lä älökorö hai aetawng saite mityng tea thui te vi.

²³ Äni ce lä mura näsaite aesi rang hai aeqo saite Cäpje tui Isu tea mätyng pa. Tungaila Isu lä nei pa y.

²⁴ Tupyng-a äni ce lä Isu bung thinglang qawng-a täheng pa. Isu üng kä-o na tea lä phui sa kha aeri pa ö vi.

²⁵ Isu bung thinglang qawng-a täheng te kätü lä kädang naeri täkawtä-a vi.

²⁶ Äni ce lä cae hai Isu üng sa tämang te näkha thingphei-a tärü pa ö dy. Hokä tärü te lä “Hini lä Judae na üng Sanphrang vi” näkha näte vi.

²⁷ Isu hai mangtä damarae lawng netä bung la thinglang qawng-a täheng pa hawi by dy. Lawngtä bung lä bangtang mang-a khai kha lawngtä bung lä bangrawi mang-a khai pa dy.

²⁸ Caekäcai-a tärü te lä “äni lä hunghö käsa na thung-a qa vi” näsaite awng te vi.

²⁹ Cäqeng kha ly saite khimi na ma lä älö thu hai ea “Hei, nang lä Ingkäcai tea mäne kha käni thungtä säla ma sa haile tyng ai nä be.

³⁰ Thinglang qawng üng haita aerung lawi by. Nang ma tea nang ma aeqang lawi baw” näkha Isu tea mänui hai pa ö dy.

³¹ Honi kätyng mäthykung käleng na hai Ubädi särae na la Isu tea mänui hai pa ö by vi. Tukha äni ce ma “Äni lä khimi kälang na bung lä aeqang ngaila äma ma tea lä aeqang haw y ta ma.

³² Isrelae khimi ce üng Sanphrang, Mesia, lä thinglang qawng üng vaihi ma aerung lawi sy. Hokä mä-ai nung dylä äni tea yng ö ai cy” näkha äma ce tingtawi aethui ö dy. Isu hai mangtä thinglang qawng-a täheng saite khimi ni ma la mänui hai pa dy.

Isu lä dü pa

³³ Käni anghung üng hai aetawng kha naeri thungtä khytä älawng angxynlyng lä ving pa vi dy.

³⁴ Naeri thungtä-a Isu lä “Eli, Eli, lama sabathani” näkha ätüng käleng hai hang pa dy. Hakä näte üng älawngsai lä “Kai üng Säthaw ä, Kai üng Säthaw ä, ätephüng-a nang lä kai bung khaisö te mei” näte vi.

³⁵ Äteng-a aedaw saite khimi phütä na ma honi lo thai te kätü-a lä “Kheng e, äni lä Elijae bung ka te dy” näkha aethui ö dy.

³⁶ Khimi lawngtä lä aehui ea tui bäjaw hai saite libyng kämawng säbö kung mawng-a mäkhing kha Cäpje tui käthaw thung-a üng pa dy. Tukha honita la kha Isu tea nei hethang py pa ö dy. Honi khimi ma lä “Äni bung aeqang hethang Elijae ma ly pa jo mei kheng ö si” näkha näpa dy.

³⁷ Isu lä ätüng käleng hai hangrang kha dü pa vi dy.

³⁸ Ingkäcai üng jaeky saite känih käsa lä honi kätü-a äqawng üng hai khotang khytä aesä-ei phung pa vi dy.

³⁹ Isu üng maw-a aedaw saite reisae cungvaitä na bung pyng te mätawngky lä Isu hang te tüng thai kha dü te nung ea lä “Äni lä Säthaw üng Cäpaw tätang vi” näkha nä kae dy.

⁴⁰ Nawngmädi phütä na lä hanglaw mang aedaw kha kheng ö dy. Honi na thung-a Makadala märü üng Maeri, säning na ky saite Jaeko hai Josefae ni üng nä-awi Maeri hai Salome ce la qa vi.

⁴¹ Äni ce lä Kalile khö-a awng te thüng-a Isu üng leithung hui kha Isu tea säbawng saite nawngmädi na vi. Äni ce cang y Isu hai Jerusalem märü-a hui saite nawngmädi kälang na la honi mityng-a awng ö te by vi.

Isu ro bung ö pa

⁴² Honi käni lä aerü rüng saite käni vi. Kädang mang dylä Aehae saite käni vi dy.

⁴³ Kädüng mang-a lä Arimathia märü üng Josefae lä tyng pa dy. Josefae lä Sanhendrin kawngci thung üng khimi lawngtä vi. Khimi ce ma äni tea lä tämö khai ö bärai vi. Äni lä Säthaw üng pre pyng saite tea aedawng rüng saite khimi vi. Äni lä ri y te hai ma Pilata tea ly kha Isu üng äro bung mäkai dy.

⁴⁴ Pilata mätawngky la Isu lä dü pyng te phüng thai kha cangxei te hai ma thinglang üng khokung-a awng saite reisae cungvaitä käpyng mätawngky bung ka ea “Isu dü te lä majetä qae dy mei” näkha düng pa.

⁴⁵ Pilata la reisae käleng üng thui saite lo thai pyng-a ni Isu üng ro bung la hethang Josefae tea py pa dy.

⁴⁶ Josefae lä libyng kanglung rang kha Isu ro bung thinglang qawng üng bäla ea honi libyng kanglung hai säve pa dy. Honi pyng-a kälung tea täko saite täprawng thung-a Isu bung ö kha täprawng äkhaw tea lä kälung käleng hai qeng pa vi dy.

⁴⁷ Isu üng äro ö saite mityng tea Makadala märü üng Maeri hai Josefae üng nä-awi Maeri ce lä nung ö te by vi.