Marka 14 - Caekäcai Kangthae (Lemi)

Isu bung bädü hethang aeceng pa

¹ Cäqengja te pawi hai täkaw aepae saite aesi qa y te pawi tyng hethang käni netä ngai kae dy. Tukha mäthykung käleng na hai Ubädi särae na lä Isu bung kangru-a ne kha bädü hethang älang mäqang ö dy.

² Äni ce ma “Pawi käni-a mä-ai lä äni bung ne te dang y lyng. Khimipui na aepuilung ö vi ai” näkha näpa.

Bethani vang-a Isu üng älö-a situi bälawng pa

³ Isu lä Bethani vang-a ängang käsi mang vai saite Simon üng ing-a awng. Äni ca te kätü-a nawngmädi lawngtä lä kung kha ävang ting bärai saite nadu näte rimui kähawi kälung kanglung pilang tea süng pa vi. Honi rimui bung mäkhawi kha nawngmädi ma Isu üng älö-a bälawng pa dy.

⁴ Khimi phütä na lä kädawtho kha “Ätephüng-a hikä rimui tea täpang aetütü te mei.

⁵ Hini rimui tea phawisae cungvai thungtä cang y hai jaw kha dang saite phawisae hai khimi kangtang na tea py te lä hawiky” näkha äma ce tingtawi aethui ö dy. Tukha äni ce lä nawngmädi tea jawsi pa ö vi.

⁶ Isu ma “Awng kae sy. Nawngmädi tea käbi py ö hang. Kai tea äni ma sa saite lä hawi te kae ecy.

⁷ Mätang saite na lä nang ce hai mangtä awng jawjaw te kae be. Nang ce ngai te kätü qütä äni ce tea säbawng ö haw vi. Kai lä nang ce hai mangtä awng jawjaw ngang y lyng.

⁸ Hini nawngmädi lä äma sa haw saite hai kai tea sa dy. Kai üng äro bung ö hethang äni lä aerü rüng kha kai üng ätabung qawng-a rimui tui hai bälawng te vi dy.

⁹ Tängai ö. Khimi ce ma Angthang Kähawi thui saite älawngpre qütä-a lä, hini nawngmädi ma sa saite phüng thui kha äni ce lä sämai jaw ö vi ai” näpa.

Judae lä Isu bung a hethang bälung aedü pa

¹⁰ Tupyng-a äkähui lawng hawlai netä na thung üng Judae Iskriota lä Isu bung a hethang phüng aedüng he mäthykung käleng na tea ly pa dy.

¹¹ Äni ce lä hini phüng thai kha tengxyng y kawngphi te hai ma Judae tea tangkae py hethang älo aedo pa ö dy. Tukätephüng-a Judae lä Isu bung a hethang älang kähawi mäqang pa dy.

Areng üng Kädüngbö

¹² Täkaw aepae saite aesi qa y te pawi üng angcü käni-a Judae khimi na lä cäqengja te pawi tähang beram caw bädü hethang reitae awng te vi. Tukha äkähui na ma Isu tea “Areng ä, nang üng Cäqengja te pawi kädüngbö ca hethang kai ce lä mani mityng-a aerü rüng pa ai mei” näkha düng pa.

¹³ Isu ma äkähui lawng netä tea “Nang ni lä märü thung-a ly hawi ba. Awikaw aepawi saite khimi lawngtä tea nang ni lä aeting hawi ai mang. Honi khimi leithung nang ni lä hui hawi ba ä.

¹⁴ Äni kung saite üng ingkung tea ‘Särae ma “Kai üng äkähui na hai kai ce lä mangtä Cäqengja te pawi-a kädüngbö ca hethang mityng lä ma-a mei nä vi” näkha düng ba’ näpa.

¹⁵ Äni ma sa rüng saite ing qawng üng teithung käleng haetä nang ni tea mätü pa ai mang. Honi mityng-a nang ni lä mä-ai kädüngbö ca hethang aerü hawi rüng ba ä” näkha täru pa.

¹⁶ Honi äkähui lawng netä lä tho kha märü thung-a kung pa hawi dy. Märü thung-a tyng te kätü-a lä Isu ma thui te kätyng aeting khaw kha Cäqengja te pawi üng kädüngbö tähang sa hawi rüng pa dy.

¹⁷ Kädüng tyng te kätü-a, Isu lä äkähui lawng hawlai netä na hai mangtä ly ö dy.

¹⁸ Äni ce lä bö aw kha ca ö te thüng-a, Isu ma “Tängai ö. Nang ce thung üng kai hai mangtä bö ca saite khimi lawngtä ma kai bung lä täre na kö thung-a a vi ai” näkha näpa.

¹⁹ Äkähui na lä bälung hawi y phi te hai ma “Hini lä kai mei” näkha lawngtä pyng-a lawngtä ma Isu tea düng pa ö dy.

²⁰ Isu ma äni ce tea “Hini khimi lä nang ce lawng hawlai netä thung üng vi. Kai hai mangtä täkaw hai pangkae-a täpaw kha ca saite khimi vi.

²¹ Caekäcai ma tärü te kätyng Kai, Khimi üng Cäpaw, lä dü vi ai. Tungaila Kai, Khimi üng Cäpaw, bung täre na kö thung-a a saite khimi lä tähang si. Honi khimi aepeng y khyry dylä äni tähang lä hawiky” näpa.

Areng üng kädüngbö phüng

²² Isu hai äkähui na lä kädüngbö ca ö te thüng-a Isu lä täkaw la kha Säthaw tea kawng te lo thui pa dy. Tupyng-a täkaw tea täpe kha äkähui na tea “Hini täkaw lä kai üng ätabung vi. La kha ca ö” näkha thui pyng-a py pa dy.

²³ Tukha cäpje tui bynglyng tea la kha Säthaw tea bälaw pyng-a äni ce tähang py pa ea äni ce angxynlyng na lä nei ö dy.

²⁴ Isu ma “Hini cäpje tui lä awng mang saite khimi na tähang bälawng te kai üng äthi vi. Hini äthi lä Säthaw hai khimi ce säla-a aenai saite vi.

²⁵ Tängai ö. Säthaw üng pre-a cäpje tui kangthae kai nei te kätü tyng y rytä lä, kai lä hini cäpje tui tea nei haile tyng bi y ai dy” näkha näpa.

²⁶ Tupyng-a Isu lä äkähui na hai ae-awi haetä thui pyng-a, Olive kung na awng saite me anghung mang-a ly ö dy.

Peterae üng aephae ai te phüng thui rüng pa

²⁷ Isu lä äni ce tea “Caekäcai thung-a tärü saite lä, ‘Kai lä beram rui saite kung bung bädü vi ai. Tukha beram na lä aehui sangxang ö vi ai’ näkha awng. Honi kätyng nang ce angxynlyng na ma kai bung lä khaisö kha aehui ö pang vi ai.

²⁸ Tungaila kai lä kädü thung üng aetha haile tyng pyng-a, Kalile khö-a nang ce üng maw-a ly mang vi ai” näkha näpa.

²⁹ Peterae ma Isu tea “Khimi kälang angxynlyng na ma nang bung khaisö ngaila kai lä nang bung khaisö y lyng” näkha näpa.

³⁰ Isu ma Peterae tea “Tängai khü Peterae ä, Vaidüng kärung ae qengnetä khawng y te kälang-a nang lä ‘Äni tea kai lä mäny y’ näkha qengthungtä aephae ai to” näkha näpa.

³¹ Tungaila Peterae lä Isu tea “Kai lä nang hai mangtä dü hethang ea mäteng ma nang bung mäny y näkha aephae y lyng” näkha cüngtang khü-a ma thui tyng pa dy. Tukha äkähui kälang angxynlyng na la hini kätyng thui ö bawi pa by dy.

Kesamani angkhaw thung-a Isu aetang pa

³² Isu hai äkähui na lä Kesamani ämüng awng saite angkhaw haetä-a ly ö dy. Isu lä äkähui na tea “Kai aetang te thüng-a nang ce lä hini mityng-a aety ö ba” näkha täru pa.

³³ Tupyng-a Isu lä Peterae, Jaeko hai Johan ce bung äma hai mangtä ka pa. Isu lä tengxyng y ri te hai bälungbi phi pa vi dy.

³⁴ Tukha Isu ma äni ce tea “Kai lä dü aenai te khytä bälungbi phi vi dy. Nang ce lä hini mityng mang awng kha kähawi-a aering ö ba” näpa.

³⁵ Tupyng-a Isu lä äjecäcaw äni ce maw mang ly kü kha älawng qawng-a aebo pa dy. Hini mätang saite aeting y käla aehi haw hethang tähang-a äma lä aetang vi dy.

³⁶ Isu ma “Ä-ai ä, nang lä äte angxynlyng na tea sa haw te kae. Hini mätangbälai saite kai aeting y hethang säbawng kü jo. Tungaila kai üng ngai te kätyng hang sy. Nang ma üng ngai te kätyng kae sy ba” näkha aetang pa dy.

³⁷ Tupyng-a Isu lä äkähui lawng thungtä na tea aekö haile tyng kha äni ce lä i ö qu ea awng te nung pa. Tukätephüng-a Isu ma Peterae tea “Simon ä, nang lä i kha awng te kae dy mei. Tänaeritä mäteng ma i y käla aering haw y vi dy nang mei” näkha düng pa.

³⁸ Tukha Isu ma äni ce tea “Nang ce lä hunghö bärawi bäleng saite thung-a qa y hethang aetang kha aering ö baw. Bälung hai lä hunghö sa hethang ngai y ngaila ätabung lä aethaw awng y” näpa.

³⁹ Isu lä ly haile tyng kha äma angcü üng thui te kätyng-a aetang haile tyng be dy. Tupyng-a Isu lä

⁴⁰ äkähui lawng thungtä na tea aekö haile tyng be ea lä äni ce lä ämi aemö ö phi te phüng-a i ö te nung tynglyng pa be vi dy. Äni ce lä Isu tea makä thui haile ai mei näte mäny pa ö y dy.

⁴¹ Isu ma äni ce tea ämäthung ly haile tyng be te kätü-a lä, äni ce tea “Nang ce lä vaihi khytä i kha aehae ö te vi rawng mei. Hawi ö dy cy. Kai üng kätü lä byng ai dy baw. Khimi lawngtä ma Kai, Khimi üng Cäpaw, bung lä hunghö sa te na üng kö thung-a a te vi dy.

⁴² Aetha ö lawi baw. Co, mä-ai ly ö si dy. Kai bung täre na üng kö thung-a a hethang khimi lä tyng dy” näpa.

Isu bung ne pa

⁴³ Hokä Isu ma thui te thüng-a äkähui lawng hawlai netä na thung üng Judae Iskriota lä tyng pa vi dy. Äni hai mangtä aekei sawngseng, thingbyng na süng saite khimipui na la qa by. Honi khimi ce lä mäthykung käleng na, Ubädi särae na hai mätawngky na ma mätaw ö saite khimi na vi.

⁴⁴ Isu bung täre na kö thung-a a hethang Judae ma “Kai ma mänang saite khimi lä Isu dy mang ba. Äni bung ne kha rui saite khimi hai nähai ö kae” näkha äni ce tea äsäny thui rüng pa te vi.

⁴⁵ Judae lä Isu tea ly praw kha “Särae ä” näkha Isu tea mänang pa khaw dy.

⁴⁶ Tukätephüng-a äni ce lä Isu bung ne pa ö dy.

⁴⁷ Tungaila äteng-a aedaw saite khimi lawngtä lä aekei aebäju ea mäthykung kälengky mawsawng lawngtä üng känawkhing tea saibawng pa dy.

⁴⁸ Isu ma äni ce tea “Nang ce lä damarae bung ne te kätyng kai bung ne hethang aetu aekei, thingbyng na hai süng kha ly hethang ngai ö te vi ae.

⁴⁹ Kai lä nang ce tea käni qütä Säthaw üng Ingkäcai baesung thung-a aety kha Säthaw lo mätu te be. Hokä ea nang ce lä kai bung ne ö y. Tungaila Caekäcai ma thui te kätyng lä kai tea tyng hethang kae te vi” näpa.

⁵⁰ Tupyng-a äkähui angxynlyng na lä Isu bung khaisö kha aehui ö pang pa dy.

⁵¹ Känih haetä xyng aekhu saite särai lawngtä lä Isu üng leithung hui pa. Khimi phütä na ma äni bung mätawng hethang sa ö vi.

⁵² Tungaila äni lä känih byng bung kädesö kha kä-o awng y käla ma büngqaitä aehuija pa vi dy.

Judae na üng Sanhendrin kawngci-a Isu tea tärae cei pa

⁵³ Tupyng-a äni ce lä Isu bung mäthykung kälengky üng ing-a nähai pa. Ha-a lä mäthykung käleng na hai mätawngky na hai Ubädi särae na lä aekäcö kha awng ö bawi te vi.

⁵⁴ Peterae lä kähanglaw mang mäthykung kälengky üng ing baesung thung khytä Isu üng leithung hui pa. Äni lä mäthykung kälengky üng mawsawng reisae na hai mangtä mai ae-awng kha awng pa dy.

⁵⁵ Mäthykung käleng na hai mangtä Judae na üng Sanhendrin kawngci üng khimi angxynlyng na lä Isu bung bädü haw hethang sa tämang saite älang hae haetä ha ngaila äte haetä la dang pa ö y vi.

⁵⁶ Ätete lo tho mang saite na ma lä aesyng y te sasi na hai ma Isu tea käsi thui pa ö dy. Tungaila äni ce üng tho saite älo na lä aedü pa ö y.

⁵⁷ Khimi phütä na ma lä aetha kha Isu tea käsi thui pa.

⁵⁸ Äni ce ma “Isu lä ‘Khimi üng kö hai sa saite hini Ingkäcai tea lä kai ma täphra ai. Käni thungtä säla-a lä khimi kö hai sa y saite Ingkäcai kai ma sa haile tyng ai’ näkha äni lä thui te kai ce lä thai ö bawi te vi dy” näkha näpa.

⁵⁹ Tungaila äni ce ma tho saite älo na lä lawng lawngtä aeba pa ö y vi.

⁶⁰ Mäthykung kälengky ma lä khimipui na üng ämaw-a aedaw kha Isu tea “Honi khimi ce ma nang tea käsi thui saite na tea nang lä ätemakä la mäthang y käla ma awng te vi mei” näkha düng pa dy.

⁶¹ Tungaila Isu lä sitäri-a awng pa kae vi. Älo bälangtä la mäthang haile tyng pa y vi. Tukha mäthykung kälengky ma “Nang lä khimi ce ma bälaw saite Säthaw üng Cäpaw Mesia dy mei” näkha düng haile pa be dy.

⁶² Isu ma “Tukä cy. Kai, Khimi üng Cäpaw, lä haidae lengky saite Säthaw üng bangtang mang-a aety kha awng te hai khö angnüng qawng mang ly te tea nang ce lä nung ö vi ai rawng” näkha näpa.

⁶³ Mäthykung kälengky lä äma üng kä-o tea sä-ei kha “Mä-ai lä äte älo kälang na ngai bälai be y dy.

⁶⁴ Äma ma tea Säthaw kätyng aesa saite lo nang ce lä thai ö bawi dy tu la. Nang ce lä ätemakä dawng ö mei” näpa. Äni ce angxynlyng na lä Isu lä dü sang vi näte bälung aedü ö bawi dy.

⁶⁵ Khimi phütä na ma lä Isu tea mäce hai mäthawi pa ö dy. Ämi mai-a libyng hai bang kha bo pa ö dy. Tukha “Nang tea ämi ma bo te mei, buisaw lo hai thui lawi by” näpa. Mäthykung kälengky üng mawsawng reisae na lä Isu bung nähai kha äni üng tangbeng-a äkö hai täbeng pa dy.

Isu bung mäny y näkha Peterae ma aephae pa

⁶⁶ Peterae lä mäthykung kälengky baesung thung üng ing maw-a awng te thüng-a mäthykung kälengky üng mawsawng anglaw lawngtä lä tyng pa.

⁶⁷ Peterae la mai ae-awng kha awng te anglaw ma nung te kätü-a lä äni tea kähawi-a kheng ea “Nang lä Nazare märü üng Isu äpy by be, kä-aw” näpa.

⁶⁸ Peterae ma äni tea “Nang thui saite phüng kai lä mäny y” näkha aephae pa. Tupyng-a äni lä baesung thung üng thokhae kung mang-a tho pa vi. Tupyng dylä ae qengtä khawng pa raw dy.

⁶⁹ Mawsawng anglaw lä Peterae tea nung haile tyng be kha äteng-a aedaw saite khimi na tea “Hini khimi lä äni ce thung üng lawngtä vi” näkha näpa haile tyng pa be dy.

⁷⁰ Tungaila Peterae lä aephae haile tyng pa be vi. Tänaetä pyng-a lä äteng-a aedaw saite khimi na ma “Nang lä äni ce thung üng khimi by. Kalile khö üng khimi by vi” näpa.

⁷¹ Tungaila Peterae lä “Nang ce thui saite khimi bung kai lä mäny y. Kai thui te tüng y dylä Säthaw üng angsawi kai tea lawi sy” näkha Peterae lä aephae pa be dy.

⁷² Tupyng dylä ae lä äbaeni khawng haile praw pa be dy. Tukha Peterae lä Isu ma äni tea “Ae qeng netä khawng y te kälang-a nang lä kai bung mäny y näkha qeng thungtä aephae ai” näsaite älo tea aedawng haile tyng praw kha Peterae lä bälung aekhy te hai rawsö kae dy.