Marka 13 - Caekäcai Kangthae (Lemi)

Säthaw üng Ingkäcai mäne saite

¹ Ingkäcai baesung thung üng Isu lä tho te thüng-a äkähui lawngtä ma “Särae ä, kheng kae-e. Hini kälung käleng na hai Ing na lä äcae hawi na ly” näpa.

² Isu ma “Hini Ing üng kälung käleng na nang ce lä nung ö dy. Hini kälung na lä haetä qawng-a kälang haetä aeqynlyng y te kätü lä tyng vi ai. Täre na ma hini kälung na tea mäne ö sangxang pa vi ai rawng” näpa.

Mätang bälaica saite na

³ Isu lä Olive kung na awng saite me anghung mang Säthaw üng Ingkäcai tea ämaw khai kha äma qaitä aety vi dy. Peterae, Jaeko, Johan hai Andru ce lä khimi ce awng y te thüng-a Isu tea ly pa ö dy.

⁴ Äni ce ma “Areng ä, nang thui saite lä mata kätü-a tyng ai rawng mei. Honi na tyng saite kätü-a lä äte kamarae na tho ai mei. Kai ce tea thui jo ba ä” näkha düng pa.

⁵ Isu ma äni ce tea “Nang ce tea khimi ce ma kaeling kaemae sa y hethang sädi khai ö ba.

⁶ Awng mang saite khimi na lä kai ämüng aengang kha ly ö ai. Äni ce ma ‘Kai lä Mesia dy’ näkha thui ö vi ai. Äni ce lä khimi awng mang saite na tea kaeling sa ö vi ai.

⁷ Nang ce lä kaenai üng täre aety saite tüng thai ö ai. Kähanglaw üng täre aety saite angthang na thai te kätü-a la ri ö hang. Hokäti amäjy na lä tyng ngece ai. Tungaila Kangkhüng käni lä tyng te y vi rawng.

⁸ Ceng haetä hai haetä, pre haetä hai haetä täre aety ö ai. Mityng qütä-a pangtälü naw kha bötäkang na la tho ai. Hini na lä nawngmädi lawngtä äma äby aepeng y te kälang-a äjo naw angcü te kätyng awng vi ai.

⁹ “Nang ce lä kähawi-a sädi khai ö. Khimi ce ma nang ce bung jung kai-a nähai ö ai. Judae na üng ingkäcai na thung-a nang ce tea bo ö ai. Nang ce lä kai phüng-a pre pyng saite na hai sanphrang na üng maw-a tyng kha Angthang Kähawi äni ce tea thui ö ai.

¹⁰ Kangkhüng kätü tyng y kälang-a ma Angthang Kähawi lä khimi angxynlyng na tea thui pa hethang kae.

¹¹ Nang ce bung ne kha jung kai-a tha saite kätü-a makä älo tho ai mei näte phüng bälung mawng ö rüng y ma. Honi kätü-a älo thui hethang Säthaw ma nang ce tea py ai mang. Honi lo na lä nang ce üng älo na y lyng. Muilaw Käcai üng thui saite älo na kae mang.

¹² Khimi ce lä kangby jä-ai tingtawi dü hethang tähang ae-a ö ai. Äpä-ai ma äcäpaw bung a ai. Äcäpaw ni äcänung lä änä-awi ni äpä-ai tea engleng sa kha bädü hethang a pa ö ai.

¹³ Kai üng phüng-a khimi angxynlyng na lä nang ce tea esäre ö ai. Tungaila kangteng khytä cakhi-a awng saite khimi tea lä Säthaw ma aeqang pa vi ai” näpa.

Känyng kha ri hethang hawi saite na

¹⁴ Isu ma “Känyng kha ri hethang hawi saite na lä awng vai bi y saite mityng-a aedaw te nang ce lä nung ö ai. Caekäcai phai saite khimi lä hini thui saite tea mänysy. Hokä nung ö te kätü-a Judae khö-a awng saite khimi na lä me anghung mang-a aehui ö kae sy.

¹⁵ Engphö-a awng saite khimi lä ätäkui-a aerung ea ingthung üng äte haetä tea la y käla ma aehui kae sy.

¹⁶ Lai-a awng saite khimi tea la äma üng kä-o la hethang ing-a vawi y käla ma aehui kae sy.

¹⁷ Honi kätü-a lä äjopawng saite nawngmädi hai nökai kä-awng na lä tengxyng y rae saite tyng ö vi ai.

¹⁸ Honi kätü-a lä säding tyng y hethang tähang-a aetang ö.

¹⁹ Säthaw ma älawng sa te kätü üng hai vaihi khytä khimi ce lä qengtä la hini kätyng mätangca saite aeting vai te y. Khawngdüng-a la aeting haile tyng ö y ai lyng dy.

²⁰ Areng lä äma re saite khimi na tähang phüng-a honi kätü tea dawi hai te vi dy. Äni ma honi kätü tea dawi hai y dylä ämi lawngtä la hing haw y lyng.

²¹ “Honi kätü-a khimi lawng lawngtä ma ‘Kheng e. Hi-a Mesia lä awng dy’ y käla ‘Kheng e. Ho-a Mesia awng dy’ näkha thui dylä yng ö hang ba.

²² Mesia käjüng aesa saite hai buisaw käjüng aesa saite na tho kha cangxei saite na hai kamarae na mätü ö vi ai. Äni ce sa haw dylä Säthaw ma re saite khimi na tea yng te tämang rung khytä sa vi ai.

²³ Nang ce lä kähawi-a sädi khai ö. Honi angxynlyng na phüng nang ce tea kai ma thui rüng te dy ba” näpa.

Khimi üng Cäpaw ly ai te phüng

²⁴ “Mätang saite na tyng pyng te kätü-a Käni lä ving ai. Law lä aevang ngang y dy.

²⁵ Tengpaw na la khösang mang üng aeqa ai. Käni khösang üng na tea ca rung khytä sui saite haidae na tea lä tähüng pa vi ai dy.

²⁶ Tupyng-a Kai, Khimi üng Cäpaw, lä haidae hai phung-ang hai khö angnüng thung mang ly te khimi ce ma nung ö ai.

²⁷ Tukha Kai, Khimi üng Cäpaw, lä re saite khimi na bung käcüng hai hethang Känipre üng angtawtha na bung khöteng täki bälitä mang-a mätaw ai” näpa.

Thaidö kung

²⁸ “Thaidö kung üng älawngsai hai-a aetu ö. Thaidö kung lä kädo käna tho kha ärangsai te kätü-a lä nisae aenai te nang ce lä mäny ö dy.

²⁹ Honi kätyng kai thui pyng saite amäjy na tyng te nang ce nung te kätü-a lä, Kai, Khimi üng Cäpaw, lä ly haile ai te kätü aenai vi dy näkha nang ce lä mäny ö ai.

³⁰ Tängai ö. Hini angxynlyng na tyng te cung bawi y rytä lä vaidung üng kaetha na lä dü ö y ai rawng.

³¹ Käni hai älawng lä pra ngaila kai üng älo lä manila pra y vi ai.

Kätü hai käni tea ämi la mäny y

³² “Honi kätü hai käni lä mani tyng ai mei näte ämi la mäny y. Känipre üng angtawtha na la mäny y. Äcäpaw la mäny y. Pä-ai lawngtä xyng ni mäny haw te kae vi.

³³ Honi kätü käni lä mani tyng ai mei näte nang ce mäny y te phüng-a kähawi-a sädi khai ö. Canglailing-a awng ö.

³⁴ Hini lä khölawng hanglaw-a ly ja saite khimi lawngtä hai aetawng vi. Äni lä äma üng ing bung äma üng mawsawng käleng na tea a pa. Sa hethang kälu haetä ta mawsawng na tea py qi pa dy. Hawngkhae ty saite kung tea lä kähawi-a aering hethang älo täru khi pa dy.

³⁵ Tukätephüng-a ingkung vawi haile hethang kätü nang ce lä mäny y te phüng-a, kähawi-a aerü rüng kha aering ö. Äni lä kädüng-a läsy, angnihü-a läsy, aekhawng angcü-a läsy, khö aevang sungsang tea läsy vawi haile haw te kae vi.

³⁶ Ingkung tyng haile poco dylä, nang ce i-sämu te hai nang ce tea aeting y hethang sädi khai ö ba.

³⁷ Nang ce tea kai thui te kätyng, khimi angxynlyng na tea la thui te by kae dy. Kähawi-a aering ö ba” näkha näpa.