Marka 11 - Caekäcai Kangthae (Lemi)

Jerusalem märü-a Isu kung pa

¹ Isu hai äkähui na lä Jerusalem märü teng-a tyng kha Bephake hai Bethani vang na teng üng Olive kung na awng saite me anghung-a tyng ö dy.

² Isu lä äkähui na thung üng lawng netä bung ka kha “Nang ni lä ämaw üng vang-a ly hawi ba. Vang thung-a kung te hai ruinawng mäkhing saite cäphö känawkhing käsa cäpi metä bung nung hawi ai mang ba. Honi cäphö lä ämi la aedang vai te y vi rawng. Honi cäphö üng ruinawng sö kha hi-a nähai hawi ba ä.

³ Khimi lawng lawngtä ma ‘Ätephüng-a nang ni lä cäphö ruinawng sö hawi te vi mei’ näkha düng dylä ‘Honi cäphö bung Areng ma aely ngai te vi. Tha haile tyng raw ai mang’ näkha nähawi ba” näkha täru ea mätaw pa.

⁴ Tukha äkähui lawng netä la ly kha lolang-a aedaw saite cäphö metä nung hawi dy. Honi cäphö bung lä ing haetä üng kätho-a mäkhing pa vi. Änini la cäphö ruinawng sö hawi dy.

⁵ Lolang-a aedaw saite khimi phütä na ma änini tea “Makäte phüng-a nang ni lä cäphö ruinawng sö hawi te vi mei” näkha düng pa ö dy.

⁶ Äkähui ni lä Isu ma thui hai te kätyng mäthang pa te phüng-a änini tea ly hethang py pa ö dy.

⁷ Tudylä äkähui ni lä cäphö cäpi bung Isu tea nähai hawi pa. Honi cäphö qawng-a lä äma ni üng kä-o na khu hawi pa vi. Tupyng dylä Isu lä cäphö qawng-a aedang pa dy.

⁸ Awng mang saite khimipui na lä äma ce üng kä-o na lolang qawng-a mädai pa ö dy. Khimi phütä na ma lä vang ärang mang üng thing sai na hai lolang qawng-a mädai pa.

⁹ Isu üng leithung leimaw mang-a hui saite khimi angxynlyng na ma lä “Mä-ai Säthaw tea hosana näkha bälaw ö si. Areng üng ämüng hai ly saite lawngtä tea Säthaw ma tähang kähawi py sy.

¹⁰ Mä-ai üng kangsi Davidae üng pre tea lä Säthaw ma tähang kähawi py sy. Aesangky saite Säthaw tea Hosana näkha bälaw ö si” näkha ätüng käleng hai-a pa ö vi dy.

¹¹ Isu lä Jerusalem märü-a kung kha Säthaw üng Ingkäcai-a ly pa dy. Äte angxynlyng na tea kheng kha käni düng pa te phüng-a äkähui lawng hawlai netä na hai mangtä tho ea Bethani vang-a ly ö dy.

Thaidö kung tea Isu ma mäthawi pa

¹² Nitä pyng üng kädang mang-a Isu hai äkähui na lä Bethani vang mang üng vawi haile te kätü-a Isu lä böjo aelang pa dy.

¹³ Ärang awng mang saite thaidö kungtä bung kähanglaw mang nung ea Isu lä äthai na mäqang hethang äkung teng-a ly pa dy. Tungaila äthai aethai saite kätü y te phüng-a äkung qawng-a ärang na qaitä awng pa kae vi.

¹⁴ Tupyng-a Isu ma “Vai üng hai aetawng ämaw mang-a la nang üng äthai ämi la ca hang sy” näkha thaidö kung tea näpa. Hokä äni üng thui te lo tea äkähui na lä thai ö vi.

Isu lä Säthaw üng Ingkäcai-a ly pa

¹⁵ Isu hai äkähui na lä Jerusalem märü-a tyng ö te kätü-a Isu lä Ingkäcai baesung thung-a kung pa. Tukha Isu ma Ingkäcai baesung thung-a löci aesa hethang tawngbawi na rang saite khimi na hai jaw saite khimi angxynlyng na bung mätho pa. Tangkae aeleng saite khimi na üng khung na hai bähö jaw saite khimi na üng aety nae na tea la aekhu mo rung khytä nui pa vi dy.

¹⁶ Ingkäcai baesung mang cäqeng kha jaw hethang vyngsai na nähai hethang Isu ma ämi tea la py pa y vi dy.

¹⁷ Tukha Isu ma, “Äni ce tea Caekäcai-a tärü saite lä, Säthaw ma ‘Kai üng Ingkäcai lä khimi ceng angxynlyng na tähang aetang nae näkha mäthi ö vi ai’ näkha näpa. Tungaila nang ce lä hini Ing tea damarae na üng täbö tärawng-a bälawng ö lae te vi be tu lä” näkha pring pa.

¹⁸ Mäthykung käleng na hai Ubädi särae na ma Isu sa saite phüng thai kha äni ce lä Isu bung bädü hethang älang ha ö pa dy. Khimipui angxynlyng na lä Isu üng mätu saite lo thai kha cangxei ö te phüng-a äni ce lä Isu tea ri ö vi dy.

¹⁹ Kädüng tyng te kätü-a Isu hai äkähui na lä märü thung üng thoja ö pa.

Thaidö kung käcei

²⁰ Nitä pyng üng kädang mang-a Isu hai äkähui na lä lolang-a aeke te thüng-a thaidö kung tea nung ö dy. Honi äkung lä angjüng üng hai aetawng kha cei king pa vi dy.

²¹ Peterae lä Isu thui saite lo tea aedawng haile va kha “Särae ä, kheng kae-e. Nang ma mäthawi saite thaidö kung lä cei king vi dy” näkha näpa.

²² Isu ma äni ce tea “Säthaw tea yng ö lawi.

²³ Tängai ö. Khimi lawngtä lä hini me anghung tea ‘Nang ma ma bung aethui kha pangle tui thung-a aekäde ja la’ näkha äma lä tätang mang mei näte bälung kaedawng hai awng y käla yng dylä, Säthaw ma äni tea lä äma thui te kätyng sa pa vi ai.

²⁴ Tukätephüng-a nang ce tea kai thui te lä, nang ma ce ma mäkai saite na tea dang ngece ai näkha yng dylä mäkai saite angxynlyng na lä dang ö vi ai.

^25-26 Nang ce lä aedaw kha aetang te kätü-a nang ce tea sa tämang saite khimi tea lä bälawi hethang kae vi. Tukä ea ni Känipre-a awng saite nang ce üng Pä-ai lä nang ce sa tämang saite na tea bälawi vi ai.”

Isu üng aenae phüng düng pa

²⁷ Isu hai äkähui na lä Jerusalem märü-a tyng ö haile be dy. Isu lä Säthaw üng Ingkäcai baesung-a aeke te kätü-a mäthykung käleng na, Ubädi särae na hai mätawngky na lä Isu tea ly pa ö dy.

²⁸ Tukha äni tea “Nang lä hini na äte aenae hai sa te mei. Hini aenae lä nang tea ämi ma py te mei” näkha düng pa ö vi.

²⁹ Isu ma äni ce tea “Nang ce tea kai älo haetä düng by ai. Nang ce ma mäthang pyng dylä hini sa saite na ämi üng aenae hai sa mei näte kai ma nang ce tea thui ai mang.

³⁰ Baptismae Johan lä khimi ce tea baptismae py hethang Säthaw ma äni tea aenae py te mei. Khimi ce ma py te mei. Dei thui ö” näpa.

³¹ Äni ce lä äma ce tingtawi aedüng aethui ö ea “Säthaw ma äni tea thui te näkha mä-ai mäthang dylä ‘Ätephüng-a nang ce lä Johan tea yng ö y te vi mei’ näkha düng he kae dy.

³² Khimi ce ma Baptismae Johan tea thui te näkha näpa dylä aesyng y lyng” näkha aethui ö dy. (Khimi qütä lä Johan tea buisaw näkha yng ö te phüng-a äni ce lä khimipui na tea ri ö te vi.)

³³ Tukätephüng-a äni ce ma “Kai ce lä mäny y” näkha Isu tea mäthang pa ö haile dy. Tudylä Isu ma äni ce tea “Tukä dylä kai lä ämi üng aenae hai hini na sa te mei näte phüng nang ce tea thui y by lyng” näkha näpa.