Marka 1 - Caekäcai Kangthae (Lemi)

Säthaw ma Baptismae Särae Johan bung mätaw pa

¹ Hini lä Säthaw üng Cäpaw, Isu Khrista, phüng Angthang Kähawi tea aetawng angcü te vi dy.

² Buisaw Isaia ma cangkhawng-a Caekäcai thung-a tärü te lä, “Tängai ö, nang üng maw-a kai üng angtawtha saite bung kai ma mätaw ai. Äni lä nang üng ämaw-a lolang mäcai pa vi ai.

³ Äni ma daithung kärang-a khimi ce tea a kha thui pa te lä ‘Areng ly nae lolang mäcai rüng lawi. Äni tähang lolang mätaw pa lawi’” näpa.

⁴ Tudylä Baptismae Johan lä daithung kärang-a tho pa dy. Äni ma khimi ce tea “Ae-ui kha baptismae la ö lawi. Tudylä Säthaw ma nang ce üng hunghö na bälawi vi ai” näkha khimi ce tea baptismae py pa vi.

⁵ Jerusalem märü hai Judae khö vang na mang üng khimi awng mang saite na lä, Johan tea ly ö vi. Äni ce lä äma ce üng hunghö na khimi ce maw-a täphawng kha Jordan tävaw-a Johan ma baptismae py pa dy.

⁶ Baptismae Johan lä cäphö känawngjang käsa mui hai aekhü saite kä-o rungrang aelawng kha angkeng-a mawiphö khabai aekheng vi. Äni üng käcakänei lä khakhö hai khawi tui vi.

⁷ Baptismae Johan ma khimi ce tea “Kai qawng-a haidae lengky saite lawngtä lä qae y tea ma ly vi ai. Kai lä äni üng maw-a bü kha kho painai rui sö hethang mäteng ma aeteng y.

⁸ Kai lä nang ce tea tui hai baptismae py dy. Tungaila äni lä nang ce tea Muilaw Käcai hai-a baptismae py vi ai” näpa.

Isu tea Johan ma baptismae py pa

⁹ Tupyng-a känitä-a Isu lä Kalile khö Nazare märü üng ly kha Jordan tävaw-a lä Baptismae Johan ma äni tea baptismae py pa.

¹⁰ Isu lä tui üng tho praw te kätü-a käni lä aepä-awng kha äni qawng-a Muilaw Käcai lä bähö kätyng aeja käthu te nung vi dy.

¹¹ Tukha käni mang üng ätüng lä “Nang lä kai üng bälung aevawky saite Cäpaw vi. Nang lä kai tea kawng hai ky saite vi” näkha näpa.

Setan angra ma Isu tea hunghö sa hethang the pa

¹² Muilaw Käcai ma Isu bung daithung kärang-a nähai praw pa vi dy.

¹³ Isu lä daithung kärang-a käni ruibälitä awng ea Setan angra ma Isu tea hunghö sa hethang the pa dy. Honi mityng-a lä daithung üng tawngbawi na la awng te by vi. Säthaw üng angtawtha na ma äni tea ly kha säbawng pa dy.

Isu ma angcü üng äkähui na bung ka pa

¹⁴ Baptismae Johan bung reisae na ma thawng thung-a khai pyng-a, Isu lä Kalile khö-a ly kha Säthaw üng Angthang Kähawi thui pa vi dy.

¹⁵ Isu lä “Säthaw ma khai saite kätü lä tyng vi dy. Säthaw ma Sanphrang sa saite kätü lä aenai dy. Ae-ui kha Angthang Kähawi tea yng ö lawi” näkha näpa.

¹⁶ Isu lä Kalile tuilipui teng-a aeke ea Simon hai äkangby Andru ni tea mawipry jae hawi te nung vi. Änini lä mawi ne saite na vi.

¹⁷ Isu ma “Kai leithung hui hawi. Nang ni lä mawi ne hawi te jüng-a kai tea yng hethang khimi ce bung nähai saite-a bälawng vi ai” näkha näpa.

¹⁸ Qengtäma änini lä äma ni üng mawipry na khaisö ea Isu leithung hui hawi praw dy.

¹⁹ Cäditä kähanglaw-a Isu ly ea, äni lä Zebede üng cäpaw Jaeko hai äni üng kangby Johan bung nung vi. Änini lä äma ni üng bälawng qawng-a mawipry na sa rüng hawi te nung vi dy.

²⁰ Isu lä änini tea nung te hai ka praw pa vi. Änini la bälawng qawng üng äma ni üng pä-ai Zebede hai angae sae na bung khaisö ea Isu leithung hui praw dy.

Angra kung saite khimi lawngtä

²¹ Äni ce lä Kapernawm märü-a ly ö dy. Tukha Aehae te Käni-a Isu lä Judae na üng ingkäcai-a kung praw kha Säthaw lo mätu te aetawng pa dy.

²² Isu lä äni ce tea Ubädi särae na kätyng mätu te y käla Säthaw ma aenae py saite lawngtä kätyng mätu pa te vi. Tukha äni üng lo thai saite khimi na lä cangxei ö vi dy.

²³ Honi tänaetä kätü-a angra kung saite khimi lawngtä Judae na üng ingkäcai thung-a kung kha hang pa vi.

²⁴ Äni ma “Nazare märü üng Isu ä, nang lä kai ce tea ätemakä sa hethang ngai te mei. Täphra hethang ngai te mei. Nang lä Säthaw üng cai saite Cäpaw näte kai lä mäny vi” näkha thui pa dy.

²⁵ Isu ma äni tea “Sitäri-a awng. Hini khimi thung üng tho la” näkha särilo hai thui pa.

²⁶ Angra lä honi khimi tea käsawtho hai kha aethaw paitae hai ma hang rang ea äni thung üng thoja pa vi dy.

²⁷ Tukha khimi angxynlyng na lä cangxei ö dy. Äma ce tingtawi aedüng aethui ö te lä “Hini lä äte mei. Hini lä mätu saite lo kangthae vi be hi ly. Äni lä aenae hai mätu te vi. Äni üng särilo lä angra na mäteng ma tängai na ly” näkha aethui ö vi dy.

²⁸ Honi pyng-a khimi ce lä äma ce tingtawi aethui ö kha Isu üng angthang lä, Kalile khö mityng qütä-a aethangdü pa vi dy.

Isu ma khimi ce üng känaw käsaw na tea hawi sa pa

²⁹ Tudylä Isu hai äkähui na lä Judae na üng ingkäcai üng tho ö vi dy. Tukha Jaeko ni Johan hai mangtä Simon ni Andru ce ing-a kung ö vi dy.

³⁰ Simon üng pä-i lä kawngang naw kha i nae qawng-a aesawng sö ea awng pa te vi. Äni ce lä Simon pä-i üng angthang Isu tea thui praw pa ö dy.

³¹ Tudylä Isu ma ly kha Simon pä-i tea äkö hai süng ea mätha pa. Tukha äni lä kawngang naw te hawi pa vi dy. Simon pä-i la äni ce tea käcakänei mäcaw pa dy.

³² Honi kädüng käni leng ea lä khimi ce ma angra kung saite na hai känaw käsaw awng saite angxynlyng na bung Isu tea nähai pa ö cu dy.

³³ Märü qütä üng khimi ce lä Simon üng ing maw-a aekäcüng ö cu pa vi dy.

³⁴ Tukha Isu lä amäjy cawngkhang naw saite khimi märaw y na tea hawi sa pa kha angra märaw y na tea la mätho pa. Angra na lä äni tea mäny pa te phüng-a Isu lä äni ce tea älo haetä la aepe y hethang mäkhang pa vi.

Kalile khö-a älo thui pa

³⁵ Kädang mang khö aevang hethang sävae y te kätü-a Isu lä i aetha thawde kha khimi awng y saite mityng mang-a ly ea aetang dy.

³⁶ Simon hai äpy na lä hui kha Isu bung mäqang ö dy.

³⁷ Äni ce ma Isu hai aeting te kätü-a lä “Khimi angxynlyng na lä nang bung mäqang kha awng ö vi dy” näkha näpa.

³⁸ Tungaila Isu ma “Mä-ai lä äteng äpa üng vang na mang-a ly ö la si. Honi mityng na mang-a kai la Säthaw üng lo thui hethang kae te vi. Kai ly te lä hokä sa hethang tähang vi” näpa.

³⁹ Tukha Isu lä Kalile khö jungtä khölawng tho ea Judae na üng ingkäcai-a Säthaw lo thui prei kha angra na bung mätho pang pa vi dy.

Isu ma ängang käsi mang saite khimi bung hawi sa pa

⁴⁰ Ängang käsi mang saite khimi lawngtä lä Isu teng-a ly kha khokhö didü ea aebai pa dy. Äni ma “Nang ma aely ngai dylä kai tea hawi sa haw he kae” näpa.

⁴¹ Isu lä bäheng kha äkö bäjang ea äni tea nang pa vi dy. Isu ma “Kai aely ngai cy. Hawi lawi sy” näkha mäthang pa dy.

⁴² Tukha qengtäma äni üng ängang käsi lä la pang kha hawi pa vi dy.

^43-44 Tupyng-a Isu lä äni tea “Tängai ba. Ämi tea lä hini phüng thui hang ba. Tungaila ly kha nang ma bung mäthykung na tea mätü ba. Tukha Mosi üng Ubädi kätyng mäthykung tea löci sa ba. Hikä sa te lä nang vaihi naw saw hawi dy näte khimi qütä ma mäny vi ai” näkha älo täru khi kha mätaw praw pa vi dy.

⁴⁵ Tungaila ängang käsi awng vai saite khimi lä ly kha mityng qütä-a hini angthang thui pa vi. Tukätephüng-a Isu lä khimi ce üng maw mang märü thung-a kung haw pa y vi dy. Tukha Isu lä khimi awng y saite märü üng ärang mang-a awng kae dy. Tungaila mityng qütä üng khimi ce lä äni tea ly pa ö vi.