Luka 5 - Caekäcai Kangthae (Lemi)

Isu ma angcü üng äkähui na bung ka pa

¹ Känitä-a Isu lä Kenesare tuilipui pyng-a aedaw pa vi. Khimipui na lä Säthaw lo thui saite tängai hethang äni teng-a ly ö dy.

² Tukha tui teng-a mawi ne te khimi ce ma khai saite bälawng känetä tea Isu lä nung dy. Äni ce lä aerung ea mawipry na mäse kha awng ö vi dy.

³ Isu lä Simon näsaite khimi üng bälawng qawng-a paw pa vi. Äni ma Simon tea “Bälawng bung tui teng üngta cäditä-a nui kü pa e” näpa. Tukha Isu lä bälawng qawng mang aety kha khimi ce tea Säthaw lo na mätu pa vi.

⁴ Tukha äni ma Simon tea, “Vaihi bälawng bung tui käthu mang-a haw. Tu-a nang ce mawi ne hethang mawipry jae ö” näpa.

⁵ Tukha Simon ma “Särae ä, kai ce lä kärung rungtaw mawi ne hethang aethaw aesa ngaila, äte haetä la dang y vi. Tungaila nang ma thui te phüng-a kai ce üng pry na jae haile ai mang” näpa.

⁶ Äni ce ma pry jae haile kha pry aesä-ei aenai rung khytä mawi na lä awng mang-a dang pa ö dy.

⁷ Tukätephüng-a äni ce lä kälang bälawng-a awng saite äpy na bung äma ce tea säbawng hethang ka ö dy. Tukha äni ce ma ly ea bälawng känetä ne aenai-a mawi na thyng ö vi dy.

⁸ Hikä Simon Peterae ma nung te kätü-a lä, äni lä Isu üng maw-a khokhö didü kha Isu tea “Kai teng üngta ly ja la, Areng ä, kai lä hunghö awng mang saite khimi kae vi” näpa.

⁹ Simon Peterae ma hikä thui pa te lä, äni hai äma äpy na mawi awng mang-a dang kha cangxei pa te phüng-a vi.

¹⁰ Simon üng äpy Zebede üng cäpaw Jaeko hai Johan ni la cangxei hawi by vi. Tukha Isu ma Simon tea “Ri y hang. Hini lä vaini üng hai aetawng kha nang ni lä mawi ne te jüng-a kai tea yng hethang khimi ce bung nähai saite-a bälawng vi ai” näkha näpa.

¹¹ Tupyng-a Simon hai äma üng äpy na lä äma ce üng bälawng na tui teng-a nähai haile kha ätete angxynlyng na khaisö ea Isu leithung hui pa ö vi dy.

Ängang käsi lawngtä bung Isu ma hawi sa pa

¹² Känitä-a Isu lä märü haetä-a awng ea ängang käsi mang bung saite khimi lawngtä lä äteng-a ly pa vi. Äni ma Isu bung nung te kätü-a, Isu teng-a aebo kha mimai bü käthu te hai “Areng ä, nang ma aely ngai dylä kai bung hawi sa haw he kae” näkha näpa vi.

¹³ Isu ma äma üng kö bäjang kha khimi känaw tea “Kai aely ngai cy. Hawi lawi sy” näpa. Tänaetäma äni üng ängang käsi lä hawi praw pa raw vi dy.

¹⁴ Tupyng-a Isu ma äni tea “Ämi tea lä hini phüng thui hang ba. Tungaila ly kha nang ma bung mäthykung na tea mätü ba. Tukha Mosi üng Ubädi kätyng mäthykung tea löci sa ba. Hikä sa te lä nang üng vaihi naw te hawi dy näte khimi qütä ma mäny vi ai” näkha täru pa.

¹⁵ Tungaila Isu üng angthang lä aethang rae pa vi dy. Tukätephüng-a khimipui käleng na lä Isu üng lo tängai hethang hai äma ce üng känaw käsaw na hawi hai hethang äni teng-a ly ö mang pa vi dy.

¹⁶ Tungaila Isu lä khimi awng y te mityng mang-a ly ja kha aetang vävawi pa vi dy.

Isu ma kökho kädü lawngtä bung hawi sa pa

¹⁷ Känitä-a Isu ma khimipui na tea Säthaw lo mätu te kätü-a, Pharisai na hai Mosi üng Ubädi mätu saite särae na lä ha-a aety ö pa by vi. Äni ce lä Kalile khö hai Judae khö qütä üng vang na mang üng hai Jerusalem märü mang üng ly ö saite na vi. Tukha Areng üng haidae lä Isu hai mangtä awng kha khimi känaw käsaw na tea hawi sa pa vi dy.

¹⁸ Khimi phütä na ma kökho kädü lawngtä bung i nae hai aejawng kha tyng pa ö vi. Äni ce lä khimi känaw bung engthung üng Isu teng-a nähai he ngai ö te vi.

¹⁹ Tungaila khimipui na awng phi pa te phüng-a äni ce lä ingthung-a kung haw ö pa y vi. Tukha äni ce lä engphö-a paw kha usai ngang hai aebu saite engphö tea khawng ea äkhaw sa ö dy. Tukha äni ce lä khimipui na säla üng Isu maw-a khimi känaw üng i nae tea ruinawng hai mäkhing kha äkhaw mang bäla pa ö dy.

²⁰ Isu hini khimi ce üng yng saite nung te kätü-a lä khimi känaw tea “Änang ä, nang üng hunghö bung kai ma bälawi vi dy” näpa.

²¹ Pharisai na hai Ubädi särae na lä “Hini khimi lä ämi mei. Äma tea Säthaw kätyng aesa te lä. Säthaw lawngtä xyng ni hunghö bälawi haw te kae be” näkha aedawng ö dy.

²² Isu lä äni ce üng kaedawng saite na mäny king kha äni ce tea “Ätephüng-a nang ce lä tukäti na dawng ö te vi mei.

²³ Hini kökho kädü tea thui he manita jaky mei. ‘Nang üng hunghö bälawi dy näkha thui te jaky mei’ y käla ‘Aetha kha aeke lawi’ näte jaky mei.

²⁴ Tungaila kai ma nang ce tea Kai, Khimi üng Cäpaw, älawng qawng-a hunghö na bälawi hethang aenae awng näte mätü vi ai” näpa. Tupyng-a Isu ma kökho kädü saite khimi tea “Nang tea kai thui ai. Aetha ea i nae tä-yng kha ing-a vawi lawi cü” näpa.

²⁵ Khimi känaw lä khimipui na maw mang aetha praw ea äma üng i nae tä-yng kha Säthaw tea bälaw te hai ma ing-a vawi pa vi dy.

²⁶ Khimi qütä na lä cangxei kha Säthaw tea bälaw ö by vi. Äni ce lä ri kha “Vaini mä-ai lä cangxei saite na nung dy” näkha thui ö vi dy.

Isu ma Levi bung ka pa

²⁷ Honi pyng-a Isu lä tho ea lä Levi näsaite angko cawng te kung lawngtä äma üng jung-a aety te bung nung pa vi. Isu ma äni tea “Kai leithung hui lawi” näpa dy.

²⁸ Levi lä aetha kha äma üng kälu angxynlyng na khaisö ea Isu leithung hui praw pa vi dy.

²⁹ Tupyng-a Levi lä äma üng ing-a Isu tähang bö mäcaw saite pawi käleng sa kha angko cawng saite khimipui na hai kälang angvüng na bung ka ea bö mangtä ca ö dy.

³⁰ Tukä ea la Pharisai na hai Ubädi särae na lä Isu üng äkähui na tea “Makäte phüng-a nang ce lä angko cawng saite khimi na hai, khimi hunghö na hai mangtä ca nei ö te vi mei” näkha käsi thui pa vi.

³¹ Isu ma äni ce tea “Känaw käsaw awng y saite na lä latang bung ngai y lyng. Tungaila naw te khimi lä ngai vi.

³² Kai lä khimi cüng saite na bung ka hethang ly te y. Khimi hunghö na ae-ui hethang tähang ly te kae” näkha mäthang pa dy.

Böjae saite phüng düng pa

³³ Äni ce ma Isu tea “Johan üng äkähui na lä böjae kha aetang vävawi ö te vi. Pharisai na üng äkähui na la hikä sa te by vi. Tukä eala nang leithung hui saite na lä böjae y käla nei ca kha awng vävawi ö vi” näpa.

³⁴ Isu ma äni ce tea “Nawngpui käla kung üng angvüng na lä äni hai mangtä awng te thüng-a böjae hai te awng vai y.

³⁵ Tungaila nawngpui la te kung bung täre na ma laja te kätü-a lä äni üng rawijae na böjae ai rawng mang” näpa.

³⁶ Isu ma hikä mätae te älo hai äni ce tea “Ämi la kä-o kangthae ngang tea täke kha kä-o kangrüng ngang tea bang vai y. Hakä sa dylä, kä-o kangthae ngang lä khaw ai be. Tukha kangrüng ngang hai kangthae ngang lä aebäla haw y vi ai.

³⁷ Ämi la mawiphö bung kangrüng thung-a Cäpje tui kangthae tea mäkawi te awng vai y. Hokä mäkawi dylä, Cäpje tui kangthae lä mawiphö bung kangrüng tea aepo hai kha Cäpje tui lä aebu ea äbung lä pra vi ai dy.

³⁸ Cäpje tui kangthae lä mawiphö bung kangthae-a ni mäkawi vävawi saite kae vi.

³⁹ Tukha Cäpje tui kangrüng nei pyng saite khimi lä ätui kangthae nei he ngai y vi dy. Cäpje tui kangrüng lä hawiky näkha aethang khai te vi.”