Luka 2 - Caekäcai Kangthae (Lemi)

Isu bung aepeng te phüng

¹ Hani kätü-a Sica sanphrang Awkutu lä Rom pre angxynlyng-a awng te khimi angxynlyng na üng ämüng lä cärei na üng cae-u thung-a mäkung he kae näkha aenae hai thui pa vi.

² Hikä ämüng mäkung hai te lä angcü üng sa saite vi. Honi kätü-a Kuinia näsaite kälengky lä Siria pre tea pyng te vi.

³ Tukha khimi qütä lä äma ce ceng kaesui na awng te mityng mang-a ly kha cärei na üng cae-u thung-a ämüng mäkung he kae ö te vi.

⁴ Tukätephüng-a Josefae lä Kalile khö Nazare märü üng hai tho kha Judae khö Davidae üng märü Bethlehem-a ly te by vi. Äni lä sanphrang Davidae ceng kaesui te phüng-a vi.

⁵ Josefae lä äma hai aepawng hethang aedo saite Maeri hai mangtä Bethlehem märü-a cärei na üng cae-u thung-a ämüng mäkung hethang ly hawi by dy. Maeri lä äjo awng pa vi dy.

⁶ Änini lä Bethlehem märü-a awng hawi te thüng-a äby aepeng he kätü lä tyng pa vi dy.

⁷ Maeri lä äcäpaw cälö lawngtä aepeng pa dy. Äma lä äni bung libyng käsa hai säbang kha raebawi raca mäcaw te okö haetä thung-a khai pa dy. Angvüng aehae nae thung-a änini tähang mityng awng pa y te phüng-a Maeri lä hini kä sa te vi.

Beram rui saite hai Säthaw üng angtawtha na

⁸ Honi kärung-a beram rui te kung na lä Bethlehem märü teng üng aeca rawng-a beram na hai mangtä awng ö te vi.

⁹ Säthaw üng angtawtha lawngtä lä äni ce tea aetüng pa vi. Tukha Areng üng phung-ang lä äni ce äteng äpa-a aevang pheng kha äni ce lä ri ö phi vi dy.

¹⁰ Tu-ea lä Säthaw üng angtawtha ma äni ce tea “Ri ö hang. Kai lä nang ce hai khimi angxynlyng na ma tengxyng y kawng hai he Angthang Kähawi thui hethang ly te kae ecy.

¹¹ Vaidüng ma hini sanphrang Davidae üng märü-a Aeqangkung lä nang ce tähang aepeng pa dy. Äni lä Khrista vi. Areng la vi.

¹² Kai ma thui saite phüng kätüng-a nang ce makä sa kha mäny ai mei nädylä: Libyng käsa hai säbang kha raebawi raca mäcaw te okö thung-a bäsawng saite äby bung nang ce lä nung ö ai mang” näkha näpa.

¹³ Qengtäma Säthaw üng angtawtha rangpui na lä aetüng praw kha Säthaw tea bälaw pa ö vi dy.

¹⁴ “Aesangky saite Säthaw tea bälaw ö si. Älawng qawng üng Säthaw ma bälung aevaw saite khimi na tea lä awngneng te awng jo sy” näkha thui pa ö dy.

¹⁵ Tupyng-a Säthaw üng angtawtha na ly ö pang pyng te kätü-a lä beram rui te khimi ce ma äma ce tingtawi aethui ö te lä “Co, Bethlehem märü-a ly ea Areng ma thui saite na kheng ö jo si” näkha nä ö dy.

¹⁶ Hini phüng-a äni ce lä ly ö dawde kha Maeri ni Josefae hai raebawi raca mäcaw te okö thung-a bäsawng saite äby bung lä nung pa ö vi.

¹⁷ Äni ce ma äby bung nung pyng ea lä Säthaw üng angtawtha ma äby phüng thui pa saite lo na khimi qütä tea thui haile pa ö dy.

¹⁸ Tukha beram rui te khimi ce ma thui saite angthang thai saite khimi angxynlyng na lä cangxei ö dy.

¹⁹ Maeri ma lä hini älo angxynlyng na phüng bälung thung-a sämai khi kha aedawng mäsüng pa te vi.

²⁰ Tupyng-a beram rui te kung na lä äma ce mityng-a vawi haile ea Säthaw tea tämö khai kha bälaw ö dy. Tukätephüng-a Säthaw üng angtawtha ma thui te kätyng äni ce thai kha nung khaw pa ö vi dy.

Nade Isu bung Säthaw Ingkäcai-a nähai pa

²¹ Käni täjaetä kätü-a Judae reitae kätyng mätawngky na ma nade bung lengkhüng täke pyng ea lä “Isu” näkha ämüng mäthi ö pa dy. Hini ämüng lä änä-awi äjopawng y kälang-a Säthaw üng angtawtha ma thui pa saite ämüng vi.

Isu bung Ingkäcai-a a pa

²² Äby lawngtä aepeng pyng-a Maeri hai Josefae ni la Mosi üng Ubädi kätyng sa hethang kätü lä tyng pa vi dy. Tukha Maeri hai Josefae ni lä Isu bung Jerusalem märü-a nähai kha Säthaw üng Ingkäcai thung mang Säthaw tea nade bung a hawi dy.

²³ “Ätephüng-a mei nädylä Caekäcai thung-a cäpaw äcälö qütä na lä Säthaw üng kae vi” näkha mäkung pa te phüng-a vi.

²⁴ Tukha änini lä Areng üng Caekäcai thung-a täru te kätyng bähö caw me netä hai nähai hawi kha Säthaw tea löci aesa hawi pa by te vi.

²⁵ Honi kätü-a Simon näsaite khimi lawngtä lä Jerusalem märü-a awng pa vi. Äni lä khimi cüng saite lawngtä kha Säthaw üng lo tängai jawjaw saite khimi vi. Äni lä Isrelae na bung aeqang saite Säthaw üng Mesia tea aering te vi. Muilaw Käcai lä äni hai mangtä awng te vi.

²⁶ Muilaw Käcai ma Simon tea “Nang dü y kälang-a Areng üng Mesia bung nung vi ai” näkha thui rüng pa te vi dy.

²⁷ Honi kätü-a Muilaw Käcai ma Simon bung Säthaw üng Ingkäcai mang-a ly hai pa dy. Äni lä Ingkäcai-a awng te thüng-a Maeri hai Josefae lä äby Isu bung nähai hawi kha Mosi üng Ubädi kätyng sa hawi te by vi.

²⁸ Simon ma äby bung nung te kätü-a lä äkö hai süng kha täpawi pa ea Säthaw tea kawng te lo thui dy.

²⁹ Äni lä phung-ang kälengky “Areng ä, Nang ma kai tea aedo saite älo kätyng vaihi lä tyng te vi dy. Vai lä nang üng mawsawng kai lä awngneng-a dü lawi mai sy.

³⁰ Khimi ce tea aeqang hai he mätaw te hini nade bung kai ma üng ämi hai vaihi ma nung khe te vi dy.

³¹ Nang ma khimi angxynlyng na maw-a Aeqangkung bung re dy.

³² Äni lä ceng kälang khimi ce tea lolang mätü saite kaevang-a lawng pa vi ai. Isrelae khimi na lä äni üng phüng hai-a phung-ang dang ö vi ai” näkha thui pa dy.

³³ Änä-awi hai äpä-ai ni lä Isu phüng Simon ma thui saite phüng-a cangxei hawi vi dy.

³⁴ Tupyng-a Simon ma äni ce tea tähang kähawi py pa kha Isu üng nä-awi Maeri tea “Säthaw ma hini nade bung re kha äni phüng-a Isrelae khimi awng mang te na lä pra ai. Awng mang te na lä aeqang te dang ö ai. Äni lä Säthaw üng kamarae-a aelawng vi ai. Tungaila khimi ce lä äni tea e pa ö vi ai.

³⁵ Äni phüng-a Säthaw lä khimi ce üng kaedawng kätüng mätü pa vi ai. Tukha nang üng bälung tea lä aeteng hai thung te kätyng naw hai pa vi ai” näpa.

³⁶ Hini mityng-a Ana näsaite buisaw nawngmädi lawngtä lä awng by vi. Äni üng pä-ai lä Asa ceng thung üng Fanuel näsaite khimi vi. Ana lä mätawng phi pa vi dy. Äni lä änawngpaw hai aepawng kha säning säritä awng te kae vi.

³⁷ Tupyng-a änawngpaw lä dü pa vi dy. Tukha äma lä lömai nä-awi-a säning rui täjae bälitä khytä awng vi dy. Äma lä Säthaw üng Ingkäcai thung-a awng kha kädüng kädang Säthaw tea cäphaw ea böjae te hai ma aetang vävawi te vi.

³⁸ Hini kätü-a buisaw lömai nawngmädi lä Josefae hai Maeri ni teng-a ly kha äby Isu phüng Säthaw tea bälaw pa dy. Äni lä Säthaw ma Mesia bung Jerusalem märü aeqang hethang mätaw ai näte aering saite khimi angxynlyng na tea Isu phüng thui pa vi dy.

Nazare märü-a vawi haile pa

³⁹ Josefae hai Maeri ni lä Säthaw üng Ubädi kätyng sa khüng bawi te kätü-a lä Isu hai äma ce awng saite Kalile khö üng Nazare märü-a vawi ö vi dy.

⁴⁰ Tukha nade Isu lä ryng kha aethaw awng pa vi dy. Tupyng-a äni lä bälunghae bärai pa te vi. Säthaw ma äni tea bälung aevaw kha tähang kähawi py pa vi dy.

Säthaw Ingkäcai-a nade Isu

⁴¹ Isu üng nä-awi hai pä-ai ni lä Cäqengja te pawi tähang Jerusalem märü-a säning qütä ly vävawi hawi te by vi.

⁴² Isu säning hawlai netä pyng-a lä, änä-awi hai äpä-ai ni lä ly vävawi te honi pawi-a ly hawi kha Isu bung la nähai te by vi.

⁴³ Pawi khüng te kätü-a lä, Isu üng nä-awi hai pä-ai lä äma ce üng märü mang-a vawi hawi vi dy. Tukä ea la nade Isu lä Jerusalem märü-a awng pa te vi rawng. Änä-awi ni äpä-ai lä mäny hawi pa y vi.

⁴⁴ Isu lä äma ce rawijae na hai mangtä ly by müng näkha aedawng hawi te hai änini lä känini rui ly hawi te vi dy. Tukha änini lä Isu bung äma ce üng amäjy na hai rawijae na säla-a ha hawi pa dy.

⁴⁵ Isu bung nung hawi y te kätü-a lä änini ma Jerusalem märü-a aekö haile phi kha ha hawi dy.

⁴⁶ Käni thungtä pyng-a ni änini lä Isu bung Säthaw üng Ingkäcai thung-a nung hawi pa vi. Äni lä Judae särae na hai mangtä aety kha äni ce te üng älo tängai te hai äni ce tea älo na düng pa vi.

⁴⁷ Isu lä bälungkähae hai älo aepe te thai saite khimi angxynlyng na lä cangxei ö pa dy.

⁴⁸ Änä-awi hai äpä-ai ni ma äni hai aeting te kätü-a lä cangxei hawi by vi. Änä-awi ma äni tea, “Cäpaw ä, Nang lä ätemakä kai ni tea tukä sa te vi mei. Nang pä-ai hai kai ni lä bälung mawng phi te hai nang bung ha hawi te dy be hi” näkha thui pa.

⁴⁹ Isu ma änini tea “Ätephüng-a kai tea ha hawi te mei. Kai lä Üngai Ing-a awng hethang kae vi” näte mäny hawi y vi nang mei näpa.

⁵⁰ Tungaila änä-awi ni äpä-ai lä Isu ma thui saite lo tea bälungva hawi pa y vi.

⁵¹ Tupyng-a lä Isu lä änini hai mangtä Nazare märü-a vawi pa by dy. Tukha Isu lä änini üng älo na kähawi-a tängai pa te vi. Änä-awi lä hini angxynlyng na phüng äma üng bälung thung-a sämai khi pa vi dy.

⁵² Tudylä Isu lä ryng kha bälunghae te hai awng rae pa vi dy. Säthaw hai khimi ce maw-a la mimai dang pa vi dy.