Luka 15 - Caekäcai Kangthae (Lemi)

La saite beram hai mätae pa

¹ Qengtä-a lä angko cawng saite na hai hunghö sa saite khimi kälang awng mang te na lä Isu üng lo tängai hethang aekäcüng ö dy.

² Tudylä Pharisai na hai Ubädi särae na ma “Hini khimi lä khimi hunghö na hai aeso kha bö mäteng mangtä ca na ly” näkha jawsi pa ö dy.

³ Tupyng-a Isu ma äni ce tea hini mätae te lo hai thui pa dy.

⁴ Tukha äni ma “Nang ce thung-a khimi lawngtä lä beram cungvaitä awng kha honi thung üng metä la näre maisi. Äni lä makä sa ai mei. Äni lä beram rui täkawtä hai täkawtä na bung raca rawng-a khai kha la saite beram tea dang y rytä ha ngece vi ai.

⁵ Honi beram bung nung te kätü-a lä äni lä kawng te hai ma aepö ho kha ing-a vawi haile dy.

⁶ Tupyng-a äni lä äma üng rawijae na hai särawng dawngpa na bung ka kha äni ce tea ‘Kai hai mangtä kawng ö jo. Kai üng beram la saite lä nung haile tyng vi dy’ näpa.

⁷ Tängai ö. Hunghö sa saite khimi lawngtä ae-ui dylä hini kätyng by vi ai. Säthaw hai äma üng angtawtha na lä honi khimi tea tengxyng y kawngphi pa ö vi ai. Ae-ui hethang ngai y saite khimi cüng saite lawng rui täkaw hai täkawtä na qawng-a äni ce lä honi khimi tea kawngky ö vi ai.

La saite phawisae hai mätae pa

⁸ “Nawngmädi lawngtä lä sädokhai tangkae phawisae pjae hawtä awng saite thung üng haetä la näre maisi. Äni lä makä sa ai mei. Maibung thawng kha ing mäse ea nung haile y rytä äma lä kähawi-a ha ngece vi ai.

⁹ Tukha äni lä honi phawisae bung nung haile tyng te kätü-a lä äma üng rawijae na hai särawng dawngpa na bung ka kha ‘Kai hai mangtä kawng ö jo. Kai üng la saite phawisae lä nung haile tyng vi dy’ näpa.

¹⁰ Tängai ö. Honi kätyng khimi hunghö lawngtä ae-ui dylä Säthaw hai äma üng angtawtha na lä kawng ö phi te vi” näpa.

La saite cäpaw hai mätae pa

¹¹ Tupyng-a Isu ma äkälang mätae te lo thui bäsa pa be dy. Äni ma “Khimi lawngtä lä cäpaw lawng netä awng.

¹² Cäpaw käna ma äpä-ai tea ‘Üngai ä, kai tähang ingthawng bäri lawi’ näpa. Tukätephüng-a äpä-ai lä äma üng ingthawng äcäpaw ni tähang bäri pa vi dy.

¹³ Tudylä qae y te kälang-a ma äcäpaw käna lä äma üng ingthawng angxynlyng na käcüng kha pre kähanglaw mang-a thoja pa vi dy. Ho-a äni tyng te thüng-a lä äma üng tangkae na hai äma ngai ngai nei ca te hai awng kha kähawi y mang-a aetütü-a täpang king vi dy.

¹⁴ Äma üng tangkae angxynlyng na täpang king pyng-a, honi pre angxynlyng na-a lä täkang tho kha äni lä mätang phi pa vi dy.

¹⁵ Tukätephüng-a äni lä honi pre üng khimi lawngtä tea mawsawng sa dy. Honi khimi ma äni tea lä o raca mäcaw nae kälu py pa dy.

¹⁶ Äni lä äjo aelang phi pa kha o raca thung üng sawngrawi äthai na mäteng ma ca hethang bädö pa vi dy. Tungaila ämi ma la äni tea äte haetä la py pa y vi.

¹⁷ Tukha äni aedawng mäkhüng te kätü-a lä, ‘Üngai tea kälu sa nae angxynlyng na lä bö ca lei y ea, kai lä hi-a böjo aelang te hai ma dü pawpae ai dy be hi ly.

¹⁸ Kai lä hini mityng khaisö kha ä-ai tea vawi haile ai. Tukha “Üngai ä, kai lä Säthaw hai nang tea sa tämang te vi dy. Nang üng cäpaw näkha mäthi hethang kai lä aeteng y lyng dy.

¹⁹ Nang üng kälu sa nae khimi lawngtä kä kai bung bälawng jo kae ba” näkha kai nähe kae dy’ näkha aedawng dy.

²⁰ Tukätephüng-a äni lä aetha kha äpä-ai tea vawi haile vi dy. “Tungaila hanglaw mang üng hai ma äpä-ai lä äni bung mae praw kha bäheng te hai aehui ea äcäpaw tea täkawi ceng kha mänang pa vi dy.

²¹ Tukha cäpaw ma lä ‘Üngai ä, kai lä Säthaw hai nang tea sa tämang te vi dy. Nang üng cäpaw mäthi hethang la kai lä aeteng y vi dy’ näpa.

²² Tungaila äpä-ai ma lä äma üng mawsawng na tea ‘Kä-o kähawiky vähai dawde kha äni tea bälawng pa. Kösübü haetä la äni üng kö-a mäcö pa. Äni üng kho-a la kho painai mäcö pa.

²³ Sicaw ärung kähawiky-a mäcaw saite la qy pa. Pawi käleng sa ea kawng te hai mä-ai mangtä bö ca ö si ba.

²⁴ Hini kai üng cäpaw lä dü kha hing haile te kätyng vi dy. Äni lä la kha kai hai aeting haile tyng te vi dy hei’ näpa. Tukätephüng-a äni ce lä anghawtho te hai ma pawi sa ö dy.

²⁵ “Honi kätü-a cäpaw kälengky lä lai-a awng pa te vi. Äni vawi kha ing teng-a tyng te kätü-a lä aebi, aetawng, qala na hai lang te tüng na thai pa vi dy.

²⁶ Tukätephüng-a äni lä mawsawng lawngtä bung ka ea ‘Ing-a lä äte makäte vi nang mei’ näkha düng pa dy.

²⁷ Äni ma ‘Nang üng kangby vawi haile tyng dy. Nawsaw kähawi hai-a aeting tyng te phüng-a nang pä-ai ma sicaw ärung kähawiky-a mäcaw saite qy kha kawng te pawi sa te ka ecy’ näpa.

²⁸ “Tukha äjä-ai käleng lä kädawtho kha ingthung-a kung hethang ngai pa y vi dy. Tukätephüng-a äpä-ai ma lä tho kha äni tea bäleng pa dy.

²⁹ Tungaila äni ma äpä-ai tea ‘Kheng kae-e. Säning hijetä mawsawng kätyng nang üng kälu kai lä sa dy. Nang üng lo la kai lä tängai vävawi te kae. Tungaila kai üng rawijae na hai anghawtho hethang pawi sa he sobei cäcaw mäteng ma nang lä kai tea py vai y be.

³⁰ Tungaila hini nang üng cäpaw lä nawngmädi kähawi y na hai nang üng ingthawng aetütü-a täpang king kha vawi haile te kätü-a, äni tähang nang lä sicaw ärung kähawiky qy te vi ly’ näpa.

³¹ Tukha äpä-ai ma ‘Cäpaw ä, nang lä kai hai awng jawjaw te kae be ä. Kai üng awng saite angxynlyng na lä nang üng kae baw.

³² Tungaila kai ce lä kawng te hai pawi sa he kae te vi. Ätephüng-a mei nädylä hini nang üng kangby lä dü kha hing haile te kätyng vi dy. Äni lä la kha mä-ai hai aeting haile te phüng-a kawng he hawi te vi baw’” näkha thui pa.