Luka 11 - Caekäcai Kangthae (Lemi)

Säthaw tea aetang te phüng Isu ma mätu pa

¹ Känitä-a Isu lä aetang kha awng. Äni aetang khüng te kätü-a lä äma üng äkähui lawngtä ma äni tea “Areng ä, Baptismae Johan ma äma üng äkähui na tea aetang te mätu te kätyng kai ce tea la mätu jo” näkha näpa.

² Isu ma äni ce tea “Nang ce aetang te kätü-a hikä thui ö. Pä-ai, nang üng ämüng käcai tea khimi ce ma tämö khai sy. Nang ma Sanphrang kätyng pyng sy.

³ Kai ce üng käni qütä ca hethang py kü ba.

⁴ Kai ce tea tämang saite khimi na üng hunghö na kai ce bälawi te kätyng, kai ce üng hunghö bälawi kü ba. Kai ce hunghö sa te khytä bärawi bäleng saite aeting hai jo hang ba” näpa.

⁵ Tupyng-a Isu lä äma üng äkähui na tea “Nang ce thung üng lawng lawngtä ma angnihü-a rawijae lawngtä ing-a ly kha ‘Änang ä, täkaw angpa thungtä kai tea canglai jo re e.

⁶ Ätephüng-a mei nädylä kai üng ing-a rawijae angvüng lawngtä tyng te phüng-a vi. Kai lä äni tea mäcaw nae äte haetä la awng y’ näkha näpa.

⁷ Äni üng rawijae ma ‘Kai tea xhu hang. Ing kätho la aekhae pyng te vi dy. Kai üng caw na la i pang ö vi dy. Tukätephüng-a kai lä aetha kha nang tähang äte raca la py haw y dy’ näkha thui vi ai.

⁸ Tängai ö. Äni lä aetha kha nang tea ca nae py ai. Tungaila nang lä äni üng rawijae te phüng-a nang tea ca nae py ngang y. Nang lä aehae y käla mäkai vawng te phüng-a nang ngai saite angxynlyng na py ai.

⁹ “Tukätephüng-a tängai ö. Mäkai ö. Tudylä Säthaw ma nang ce tea py ai mang. Ha ö jawjaw. Tudylä Säthaw ma nang ce tea nung hai ai mang. Kätho tea täkhü ö jawjaw. Tudylä Säthaw ma nang ce tea kätho pä-awng pa ai mang.

¹⁰ Säthaw lä mäkai saite khimi angxynlyng na tea py ai. Ha jawjaw saite khimi angxynlyng na lä nung ai. Kätho täkhü saite khimi angxynlyng na tea lä Säthaw ma kätho pä-awng pa ai.

¹¹ Nang ce thung-a pä-ai na lä äcäpaw ma mawi mäkai ea bärui py dang ai mei.

¹² Aedui mäkai dylä käni tä-ai py dang ai mei.

¹³ Nang ce hunghö awng mang saite khimi mäteng ma caw nade na tea kähawi sai na py vävawi te vi. Tukätephüng-a Känipre-a awng saite nang ce üng Pä-ai lä mäkai saite khimi na tea Muilaw Käcai py khaw vi ai” näpa.

Isu hai Bezebul angra

¹⁴ Isu lä khimi tea älo aepe haw y-a sa pa saite angra bung mätho pa. Angra tho pyng te kätü-a honi khimi lä älo aepe haw pa dy. Tukha khimipui na lä cangxei ö dy.

¹⁵ Tungaila khimi phütä na ma lä “Äni lä Belzebul näsaite angra mangkhawng üng haidae hai-a angra na bung mätho te vi” näpa.

¹⁶ Tukha khimi kälang phütä na ma lä äni tea käny hethang Känipre mang üng kamarae hai aenae na mäkai pa.

¹⁷ Isu lä äni ce kaedawng saite mäny praw kha äni ce tea “Pre haetä-a khimi ce lä aetäphü kha täre aety raw dylä honi pre lä pra hethang awng kae dy. Engthung haetä-a la äma ce tingtawi aetäphü ö dylä pra hethang awng kae dy.

¹⁸ Setan angra na lä äma ce tea äma ce aety raw dylä äni ce üng pre lä makä sa kha aedaw haw ai mei. Kai ma hikä thui te lä, kai lä Belzebul angra mangkhawng üng haidae hai angra na bung mätho te näkha nang ce ma kai tea thui ö te phüng-a vi.

¹⁹ Tudylä kai lä Belzebul angra mangkhawng üng haidae hai angra na mätho te kae dylä, nang ce üng äkähui na lä ämi üng haidae hai-a angra bung mätho ö te mei. Tudylä nang ce tämang te phüng äkähui na ma mätü ai.

²⁰ Tungaila kai lä Säthaw üng haidae hai-a angra na bung mätho te dylä Säthaw lä äma üng pre tea vaihi ma pyng rüng te mätü te vi dy.

²¹ “Aethaw awng saite khimi lä aetu aekei na hai äma ing tea kähawi-a rui te kätü-a lä äni üng ingthawng na tea ämi la bäru haw y lyng.

²² Tungaila äma qawng-a aethaw awngky te khimi lawng lawngtä ma äni tea aety kha bäja pa te kätü-a lä äma üng ae-y nae aetu aekei na laja kha hani khimi üng ingthawng na tea aeri pro pa ö vi ai.

²³ “Kai te mang-a awng y saite khimi lä kai üng täre kae vi. Khimi lawngtä lä kai hai mangtä Säthaw üng pre tähang khimi cüng saite y dylä täprei saite kae vi.

Angra vawi haile te

²⁴ “Angra lä khimi thung üngta tho ea daithung kärang mang-a aevi kha awng nae ha räreng vi. Dang pa y ea lä ‘Kai ma üng mityng kangrüng-a kung haile khyry ai’ nä vi.

²⁵ Tukha angra lä vawi haile te kätü-a äma kung saite khimi lä mäcai ping kha cülä-ü saite ing hai aetawng te nung pa vi dy.

²⁶ Tukha äni lä äma qawng-a siky saite kälang angra me säritä na tea ka dy. Tukha äni ce angxynlyng na lä honi khimi tea kung kha awng pa vi. Tukätephüng-a honi angra kung saite khimi üng kangkhüng-a awng saite lä angcü üng qawng-a siky dy” näpa.

Tätang tähang kähawi dang saite na

²⁷ Isu älo thui te thüng-a, khimipui thung üng nawngmädi lawngtä ma “Nang bung aepeng kha känö tui nei hai saite änä-awi lä tähang hawi” näkha thui pa.

²⁸ Tukha Isu ma “Säthaw üng lo thai kha tängai saite khimi lä tähang hawiky” näkha thui haile pa.

Kamarae mäkai pa

²⁹ Khimipui na lä Isu teng-a aekäcö rae ea Isu ma “Vaidung üng khimi kaetha na lä si ö vi. Äni ce lä kamarae ha ö. Tungaila Säthaw ma Jonae tähang sa pa saite kamarae haetä xyng kätyng kai ma khimi ce tea mätü ai.

³⁰ Jonae lä Ninevi märü-a khimi ce tähang kamarae-a aelawng te kätyng lä Kai, Khimi üng Cäpaw, lä vaidung üng khimi ce tähang kamarae-a aelawng vi ai.

³¹ Säthaw ma khimi ce tea tärae cei te kätü-a lä Seba pre üng sanphrang nä-awi lä aedaw kha vaidung üng khimi ce tea dengpy he aeteng näkha thui vi ai. Ätephüng-a mei nädylä, äni lä Solomon sanphrang üng bälunghae te lo tängai hethang ngai kha khöteng täki mang üng hai ly pa vi. Vaihi kätü-a lä Solomon qawng-a kälengky lawngtä lä hi-a awng dy.

³² Säthaw ma khimi ce tea tärae cei te kätü-a lä Ninevi märü üng khimi ce lä aedaw kha vaidung üng khimi ce tea dengpy he aeteng näkha thui vi ai. Ätephüng-a mei nädylä Jonae ma thui te lo phüng-a äni ce lä hunghö üng ae-ui ö te vi. Tukha vaihi Jonae qawng-a lengky saite lawngtä lä hi-a awng vi dy.

Ätabung üng kaevang

³³ “Ämi la maibung thawng kha tawng täkui-a khai vai y. Maibung thawng kha la ho vai y. Engthung-a kung saite khimi na kaevang nung hethang maibung khai nae qawng-a ni khai saite kae vi.

³⁴ Nang üng ämi lä ätabung kaevang vi. Nang üng ämi na hawi dylä, ätabung angxynlyng na lä aevang bawi vi ai. Tungaila nang ämi hawi y dylä, nang lä kähawi-a nung haw y kha käving thung-a awng te kae dy.

³⁵ Tukätephüng-a nang ce tea awng saite kaevang lä käving-a aelawng y hethang sädi khai ö.

³⁶ Nang lä kaevang kawi kha ving te mityng-a awng y dylä nang üng hing saite angxynlyng na tea aevang bawi vi ai. Nang tea aevang bärai saite maibung kätyng aevang vi ai” näpa.

Pharisai hai Ubädi särae na tea pring pa

³⁷ Isu ma älo thui pyng te kätü-a lä Pharisai lawngtä ma äni tea kädüngbö ca he ka pa. Tukätephüng-a äni la bö loka-a aw pa dy.

³⁸ Isu lä Judae reitae kätyng äkö aese y käla bö aw te Pharisai ma nung ea lä cangxei pa dy.

³⁹ Tukha Isu ma äni tea “Pharisai, nang ce lä pangkae hai kaephi üng ärang mang mäse ö te kae vi. Tungaila nang ce üng bälung-a lä kanglai hai käsi kawi te vi.

⁴⁰ Khimi kaerö na ä, khimi üng ätabung tea sa saite Säthaw lä khimi üng bälung tea la sa te vi.

⁴¹ Tungaila khimi kangtang na tea bäheng kha nang ce üng kaephi hai pangkae-a awng saite raca na py pa. Tudylä nang ce lä Säthaw maw-a cai ai mang.

⁴² “Pharisai na ä, nang ce lä tähang si. Ätephüng-a mei nädylä nang ce lä sawngprang sawngkeng hai angti angjang na hawtä haetä py ngaila khimi ce tea kätüng-a sa y. Säthaw tea la bälung aevaw ö y. Nang ce lä hawtä-a haetä py hethang kae vi. Tungaila hini qawng-a aely käleng mätu saite na la bäjui hethang kae.

⁴³ “Pharisai, nang ce lä tähang si. Nang ce lä Judae na üng ingkäcai thung-a aety nae kaesangky mang awng he ngai ö te vi. Vyngjaw saite mityng-a khimi ce ma tämö khai te na ngai ö ky te phüng-a vi.

⁴⁴ Pharisai nang ce lä tähang si. Ätephüng-a mei nädylä nang ce lä aeny y saite täprawng kätyng kae. Khimi ce lä honi täprawng qawng mang ly ea äthung-a lä äro awng te mäny ö y vi” näpa.

⁴⁵ Judae Ubädi särae lawngtä ma Isu tea “Särae ä, nang ma hini thui saite na lä kai ce tea la jaw te kätyng by vi” näpa.

⁴⁶ Isu ma äni ce tea “Ubädi särae na ä, nang ce lä tähang si. Nang ce lä khimi ce tea sa hethang bäja y saite kälu sa hai ö te vi. Tungaila nang ma ce ma lä khimi ce tea säbawng hethang haetä la sa te y.

⁴⁷ Nang ce lä tähang si. Nang ce lä buisaw na tähang äcae hawi saite täprawng sa ö dy. Nang ce üng kangsi na ma honi buisaw na bung bädü ö khe te vi.

⁴⁸ Nang ce üng kangsi na sa te hawi näte aedawng te mätü ö dy. Äni ce ma buisaw na bung bädü kha nang ce ma buisaw na tähang äcae hawi saite täprawng na sa ö dy.

⁴⁹ Hini phüng-a Säthaw lä äma üng bälungkähae hai-a ‘Kai ma Isrelae khimi na tea buisaw na hai angtawtha na bung mätaw vi ai. Isrelae khimi na ma buisaw phütä na tea, mätangca-a sa pa. Buisaw kälang na tea la bädü pa vi ai’ näpa.

⁵⁰ Tukätephüng-a vaidung üng khimi ce tea Säthaw ma äma üng buisaw angxynlyng na tea bädü pa te phüng-a dengpy vi ai.

⁵¹ Älawng aetawng angcü üng Abela äthi üng hai buisaw Zakhari üng äthi khytä buisaw na bung bädü te vi. Tukätephüng-a vaidung üng khimi ce tea Säthaw ma tärae cei vi ai. Kangkhüng-a bädü saite buisaw Zakhari bung lä äni ce ma maicang hai Ingkäcai säla-a bädü pa ö dy.

⁵² “Ubädi särae na ä, nang ce lä tähang si vi. Khimi ce ma Säthaw tea mäny hethang lolang nang ce lä pä-üng ö pa te vi. Nang ma ce lä Säthaw tea mäny he ngai ö y. Tukha Säthaw tea mäny he ngai saite khimi na tea la mäkhang pa ö te vi” näpa.

^53-54 Tupyng-a Isu lä honi mityng üng tho te kätü-a, Pharisai na hai Ubädi särae na ma lä Isu tea älo e te aetawng ö dy. Älo tämang saite dang hethang äni ce lä Isu tea tengxyng y älo düng mang pa ö dy.