Luka 1 - Caekäcai Kangthae (Lemi)

Angcü üng älo

¹ Mätawngky Theophilu ä, Kai ce säla-a tyng saite na phüng tärü hethang khimi ce lä awng mang pyng vi dy.

² Khimi ce ma kai ce tea thui saite kätyng äni ce lä tärü ö te vi. Honi khimi ce lä angcü-a äma ce ämi hai hini na nung ö khe te vi. Äni ce lä Säthaw tähang mawsawng sa kha Säthaw üng angthang khimi ce tea thui pa saite na vi.

³ Tukätephüng-a kai ma la Areng Isu phüng angcü üng hai kähawi-a aedüng aethui pyng kha nang tähang älang kätüng-a tärü hethang hawi ai müng näkha dawng te vi.

⁴ Tu üng mätawngky Theophilu ä, nang tea khimi ce mätu saite phüng tätang mäny hai hethang ngai te phüng-a hikä tärü te vi dy.

Baptismae Johan aepeng ai näte phüng thui rüng pa

⁵ Judae khö üng sanphrang Herodae thüng-a Säthaw üng mäthykung Zakhari näsaite lawngtä lä awng. Äma lä Abija näsaite mäthykung amäjy thung üng vi. Äni üng nawngpui Elizabe lä Säthaw üng mäthykung Aron ceng kaesui thung üng by vi.

⁶ Änini lawng netä lä Säthaw maw-a käcüngky-a awng hawi te vi. Areng üng täru saite älo na la tängai hawi bärai te vi.

⁷ Tungaila Elizabe lä kätung kämai kha änini lä äcaw nade dang hawi y. Änini lä mätawng hawi phi vi dy.

⁸ Känitä-a Zakhari üng äpy lä Säthaw tähang kälu sa te kätü-a, Zakhari lä Säthaw üng Ingkäcai thung-a kälu sa by.

⁹ Äni lä Säthaw üng mäthykung na üng reitae kätyng phui hai aere kha Säthaw üng Ingkäcai-a ly ea rimuidi tea maisawi hethang kae pa te vi.

¹⁰ Äni ma rimuidi tea maisawi te kätü-a aecö saite khimipui na lä Säthaw üng Ingkäcai ärang mang-a aetang pa ö dy.

¹¹ Honi kätü-a Säthaw üng angtawtha lawngtä lä äni tea aetüng kha rimuidi maisawi nae bangtang mang-a aedaw pa.

¹² Zakhari lä äni bung nung te kätü-a, aethüng kha ri vi dy.

¹³ Tukha Säthaw üng angtawtha ma “Zakhari ä, ri y hang. Nang üng aetang te tüng lä Säthaw ma thai kha mäthang te kae ecy. Nang nawngpui Elizabe lä cäpaw lawngtä aepeng ai mang. Tukha nang lä äni tea ‘Johan’ näkha ämüng mäthi ba.

¹⁴ Äni phüng-a nang ni lä kawng anghawtho bärai ai mang. Äni aepeng te phüng-a khimi ce lä anghawtho mang by vi ai.

¹⁵ Areng maw-a äni lä aely lengky saite khimi aelawng vi ai. Äni lä Cäpje tui hai ra na nei he kae y ai. Äni tea lä aepeng te üng hai Säthaw ma Muilaw Käcai kawi hai jawjaw pa vi ai.

¹⁶ Johan lä Isrelae khimi awng mang na bung äma ce üng Areng Säthaw tea bähawi haile pa vi ai.

¹⁷ Tukha äni lä Areng üng langmaw-a ly kha Buisaw Elijae kätyng Muilaw Käcai hai aethaw awng bärai vi ai. Äcäpaw hai äpä-ai na tea aede haile pa vi ai. Säthaw üng älo kätüng tängai y saite na tea khimi cüng saite na kätyng sakaw by hethang kätüng mätü vi ai. Areng üng lo tängai hethang khimi ce tea aerü hai rüng pa vi ai” näpa.

¹⁸ Zakhari ma Säthaw üng angtawtha tea “Makä sa kha hini tea kai lä mäny tätang haw ai mei. Kai hai kai nawngpui lä mätawng phi te vi dy be” näpa.

¹⁹ Säthaw üng angtawtha ma “Kai üng ämüng lä Kabrela vi. Säthaw maw-a aedaw saite lawngtä vi. Kai lä nang tea hini Angthang Kähawi thui hethang Säthaw ma kai bung mätaw te vi.

²⁰ Vaihi ma nang lä älo aepe haw y ai dy. Nang üng cäpaw aepeng te khytä nang lä sitäri-a awng ai. Ätephüng-a mei nädylä nang lä kai üng lo na yng y te phüng-a vi. Kai ma thui saite lo lä äma kätü-a cungrü khaw vi ai” näpa.

²¹ Honi kätü-a Zakhari bung khimipui na lä ärang mang-a aering ö pa. Äni lä Säthaw üng Ingkäcai thung-a qae bärai te phüng-a khimipui na lä cangxei ö vi dy.

²² Zakhari ärang-a tho te kätü-a lä äni lä khimi ce tea älo aepe haw pa y. Äni lä Säthaw üng Ingkäcai thung-a äsämai haetä nung dy näte khimipui na lä mäny ö praw pa dy. Äma lä khimipui na tea älo aepe haw y kha äkö hai ni mätü pa kae vi.

²³ Zakhari lä äma üng kälu kätü byng pyng ea lä ing-a vawi haile by dy.

²⁴ Tupyng dylä änawngpui Elizabe lä äjo awng kha law bangawtä ärang-a tho y käla ing-a awng kae dy.

²⁵ Elizabe ma “Hini lä Areng ma kai üng aetang saite mäthang te vi dy. Vaihi Säthaw ma kai tea säbawng kha khimi ce maw-a kai üng kaejae sai la hai pa te vi dy” näpa.

Isu aepeng ai näte phüng thui rüng pa

²⁶ Elizabe üng äjo awng te law tärutä kätü-a lä Kalile khö Nazare märü-a Säthaw lä angtawtha Kabrela bung mätaw pa.

²⁷ Äni lä anglaw Maeri tea ly pa dy. Maeri lä Sanphrang Davidae ceng kaesui thung üng Josefae ämüng awng saite hai aepawng he aedo te vi.

²⁸ Säthaw üng angtawtha ma Maeri tea “Nang tea awngneng saite awng sy. Säthaw ma nang tea bälung aevaw kha tähang kähawi py vi ai” näpa.

²⁹ Maeri lä äni lo phüng-a bälung kikaehü-a awng pa dy. Angtawtha üng thui saite lo lä makä näte vi nang mei näkha äni lä aedawng dy.

³⁰ Säthaw üng angtawtha ma Maeri tea “Maeri ä, ri y hang. Säthaw ma nang tea tähang kähawi py te dy ecy.

³¹ Nang lä äjo awng kha cäpaw lawngtä aepeng ai. Nang lä äni tea ‘Isu’ näkha ämüng mäthi he kae.

³² Säthaw ma äni tea aenae kälengky py pa vi ai. Khimi ce ma äni tea Aesangky Säthaw üng Cäpaw näkha ka ö vi ai. Areng Säthaw ma äni bung kangsi sanphrang Davidae kätyng sanphrang kälengky-a aelawng hai pa vi ai.

³³ Äni lä Isrelae khimi na üng sanphrang sa kha äma üng pre-a pyng jawjaw vi ai” näkha näpa.

³⁴ Maeri ma Säthaw üng angtawtha tea “Kai lä anglaw kae ea makä sa kha äby aepeng haw vi ai mei” näkha düng pa.

³⁵ Säthaw üng angtawtha ma Maeri tea “Muilaw Käcai ma nang üng qawng-a tyng kha Aesangky te Säthaw üng phung-ang lä nang qawng-a khu vi ai. Tukätephüng-a khimi ce ma lä nang cäpaw tea Säthaw üng Cäpaw Käcai näkha ka ö vi ai.

³⁶ Nang üng amäjy Elizabe mäteng ma mätawng käni-a äjo awng by dy. Khimi ce ma kätung kämai näsaite nawngmädi lä äjopawng te law tärutä awng pa vi dy.

³⁷ Säthaw sa haw y te lä haetä la awng y vi” näkha thui pa.

³⁸ Maeri ma la “Kai lä Säthaw üng mawsawng kae vi. Nang ma thui saite kätyng kai tea tyng kae sy” näkha näpa. Tupyng-a Säthaw üng angtawtha lä äni te üngta ly ja pa vi dy.

Maeri ma Elizabe tea dawnghang ly pa

³⁹ Honi pyng dylä qae y tea ma Maeri lä aerü kha Judae khö me anghung angmang mang-a awng saite märü-a Elizabe hai aeting hethang ly praw dy.

⁴⁰ Tupyng-a Maeri lä Zakhari ni ing-a tyng kha Elizabe tea kawng bärai aesa pa.

⁴¹ Maeri thui te tüng Elizabe ma thai te kätü-a lä äma äjo thung üng äby lä aetae pa vi. Tukha Elizabe lä Muilaw Käcai hai kawi pa vi dy.

⁴² Äni lä ätüng käleng hai Maeri tea “Nang tea nawngmädi angxynlyng na qawng-a Säthaw ma tähang kähawi py te dy. Nang üng äjo thung-a awng saite äby tea la Säthaw ma tähang kähawi py te vi dy.

⁴³ Säthaw lä kai tea tätang khü bälung aevaw kha kai üng Areng nä-awi bung kai tea dawnghang ly hai te vi.

⁴⁴ Nang ma kai tea kawng bärai sa te tüng thai praw te kätü-a kai jo thung üng äby la aetae by vi.

⁴⁵ Nang lä Säthaw üng aedo te losai tyng tätang ai näkha yng te phüng-a Säthaw lä nang tea tähang kähawi py vi ai” näkha thui pa.

Maeri ma Säthaw tea bälaw pa

⁴⁶ Tukha Maeri lä, “Kai lä Säthaw tea bälaw dy.

⁴⁷ Kai bung Aeqangkung Säthaw phüng-a kai lä kawngphi vi dy.

⁴⁸ Äni üng mawsawng nawngmädi kaeneng tea äni ma aedawng hai pa vi. Vai üng hai dung angxynlyng üng khimi ce ma kai tea, Säthaw üng tähang kähawi dang saite nawngmädi näkha thui ö vi ai.

⁴⁹ Ätephüng-a mei nädylä, phung-ang lengky saite Säthaw ma kai tähang cangxei te na sa pa te phüng-a vi. Äni lä caiping saite Kung vi.

⁵⁰ Säthaw tea tämö khai saite dung angxynlyng na üng khimi ce tea äni lä bäheng vi ai.

⁵¹ Äma üng haidae hai aethaw awng saite na sa pa vi dy. Äma lä bälung aesang saite khimi tea aehui xhixae hai pa dy.

⁵² Säthaw ma sanphrang na üng aenae bung laja pa. Tungaila khimi ce maw-a aemäneng saite na tea lä äni ma mäsang hai pa vi.

⁵³ Äma lä äjo kaelang na tea bö ang kähawi na hai mäcaw kha, tawngnang saite na tea lä büngqaitä ma bälawi sö pa vi.

⁵⁴ Säthaw lä äma tea mawsawng sa saite Isrelae khimi na tea säbawng pa. Äma lä äni ce tea bäheng hethang tämang pa te y vi.

⁵⁵ Säthaw lä mä-ai üng kangsi na tea aedo saite älo kätyng Abraham hai, äni üng kaesui kaebeng na bung bäheng jawjaw vi” näkha Maeri ma äma ae-awi hai thui pa dy.

⁵⁶ Tukha Maeri lä Elizabe tea law thungtä rytä awng kha äma üng ing-a vawi haile vi dy.

Baptismae Johan bung aepeng pa

⁵⁷ Elizabe üng äby aepeng hethang tyng te kätü-a lä äma lä äcäpaw aepeng pa by dy.

⁵⁸ Äni tea Säthaw ma cangxei-a bäheng kha sa saite äma üng amäjy na hai särawng dawngpa khimi ce thai ea lä äni hai mangtä kawng hai pa ö by dy.

⁵⁹ Käni täjaetä kätü-a äni ce amäjy na hai Judae mätawngky na lä Judae reitae kätyng äcäpaw üng lengkhüng täke hethang ly ö. Äni ce üng amäjy na ma lä honi cäpaw tea “Zakhari” näkha äpä-ai üng ämüng mäthi he ngai ö vi.

⁶⁰ Tukä ea la äby üng nä-awi ma lä “Tukä y. Johan müng mäthi ö kae” näkha thui pa.

⁶¹ Äni ce ma äby nä-awi tea “Nang ni üng äceng thung-a hini ämüng lä mäthi te awng vai y be” näkha näpa.

⁶² Tupyng-a äni ce lä äby üng pä-ai tea äkö hai mätü kha düng pa ö dy. Äby müng äpä-ai üng kängai-a mäthi hai hethang mäny he ngai ö te phüng-a vi.

⁶³ Zakhari ma lä äni ce tea kopeng haetä mäkai kha honi kopeng phei qawng-a “Äby üng ämüng lä Johan vi” näkha tärü pa dy. Honi kä tärü te nung ea äni ce lä cangxei ö dy.

⁶⁴ Honi üng hai ma Zakhari lä älo aepe haile praw haw raw pa vi dy. Äni lä älo aepe angcü haile te hai Säthaw tea kawng te lo thui vi dy.

⁶⁵ Särawng dawngpa üng khimi ce ma lä cangxei ö phi dy. Judae khö üng me anghung angmang mang-a awng saite khimi na ma lä hini angxynlyng na phüng aethui ö pa by vi dy.

⁶⁶ Hini phüng thai saite khimi qütä na lä tämang ö haw y vi. Tukha äni ce ma “Hini nade lä makäti khimi lawng ai mei hi” näkha aedüng aethui ö vi. Tukätephüng-a Säthaw üng haidae lä äni hai mangtä awng pa dy.

Zakhari ma Säthaw tea bälaw pa

⁶⁷ Äby üng pä-ai Zakhari lä Muilaw Käcai kawi kha buisaw lo thui dy.

⁶⁸ “Isrelae khimi ce üng Areng Säthaw tea bälaw ö si. Ätephüng-a mei nädylä äni lä äma üng khimi ce bung aeqang hethang ly pa te phüng-a vi.

⁶⁹ Säthaw lä mä-ai tea aethaw awng saite Aeqangkung bung mätaw pa vi. Äni lä Säthaw üng mawsawng Davidae sanphrang ceng thung mang tho saite vi.

⁷⁰ Hini phüng Säthaw ma lä buisaw käcai na hai-a, cangkhawng üng hai ma thui rüng pa te vi.

⁷¹ Hini Aeqangkung lä mä-ai üng täre na hai esäre saite khimi na aenae thung üngta mä-ai bung kätho pa vi ai.

⁷² Säthaw lä äma üng käcai-a aedo kha mä-ai kangsi na tea thui saite lä tämang te y vi. Tukha äni lä mä-ai tea bäheng jawjaw te vi.

⁷³ Hini phüng-a äni lä mä-ai üng kangsi Abraham tea cakhi te älo aedo kha thui pa te vi dy.

^74-75 Säthaw lä mä-ai üng täre na kö thung üng mä-ai bung kätho haile vi ai näkha aedo vi. Tukha mä-ai lä hing te rytä täre na tea ri y käla äni üng mawsawng sa haw ai. Tudylä mä-ai lä äni üng maw-a käcüng hai käcai-a awng haw ai.

⁷⁶ Kai cäpaw ä, nang tea khimi ce ma Kaesangky Säthaw üng buisaw näkha ka ö vi ai. Tukätephüng-a nang lä Areng üng maw-a ly kha äma tähang lolang aerü vi ai.

⁷⁷ Säthaw ma khimi ce üng hunghö na bung bälawi kha, aeqang saite phüng nang lä Säthaw üng khimi ce tea mätu pa vi ai.

⁷⁸ Säthaw lä khimi ce tea bäheng tätang te phüng-a, Mesia lä känise te kätyng mä-ai tea tyng vi ai.

⁷⁹ Mesia lä hunghö käving thung-a awng saite khimi na hai, dü he ri saite khimi na tea kaevang py kha Säthaw üng Angthang kätüng thui pa ai. Äni lä mä-ai tea awngneng saite lolang thung-a ly hethang bähawi pa vi ai” näkha Zakhari lä thui pa.

⁸⁰ Tukha nade Johan lä ryng kha äma lä Säthaw tea yng te hai aethaw awng rae pa vi dy. Isrelae khimi na maw-a Säthaw üng älo thui te kätü khytä daithung kärang mang-a awng pa vi dy.