Kolosa 4 - Caekäcai Kangthae (Lemi)

¹ Ingkung na ä, nang ma ce üng mawsawng na tähang kätüng hai kähawi-a kheng ö ba. Nang ce la Känipre-a awng saite Areng üng mawsawng na vi näte mäny ö ba.

Älang mätü pa

² Aetang te mäqaw ö hang. Aetang te kätü-a lä aethawli y käla ma Säthaw tea kawng te lo thui jawjaw ö ba.

³ Nang ce lä kai ce tähang la aetang pa ö jo. Tudylä Säthaw lä äma üng angthang thui hethang kai ce tea kätho pä-awng vi ai. Tukätephüng-a kai ce lä jangni-a äni ce mäny vai y saite Khrista üng Angthang khimi ce tea thui haw ö ai. Hini Angthang thui te phüng-a kai bung lä vaihi thawng thung-a pä-ung te vi.

⁴ Kai lä thui hethang kae saite honi Angthang tea caiping-a khimipui na tea thui haw jawjaw hethang nang ce ma aetang pa ö jo ba.

⁵ Nang ce lä Areng Isu tea yng y saite khimi na bung bälung kähae hai sa te kätü tea kähawi-a tawng ö ba. Areng Isu tea yng y saite khimi na maw-a nang ce lä bälung haesy-a awng ö ba. Sa hethang dang saite älang angxynlyng na tea kähawi-a nang ce lä tawng ö.

⁶ Nang ce la äni ce tea bälung aevaw kha äni ce ma bälung aevaw tyng rung khytä sa ö. Angthang Kähawi phüng tähang düng saite khimi qütä na tea hawihai pailai makä mäthang ai mei näte mäny ö ba.

Kangkhüng üng cibai sa te lo

⁷ Tukhika ma kai üng angthang na nang ce tea thui king pa ai mang. Äni lä kai üng bälung aevaw saite Khristen kangby, mitang khü-a kai hai mangtä Areng üng kälu sa te vi.

⁸ Kai ma äni bung nang ce tea mätaw te lä kai ce üng angthang thui king hethang hai nang ce tea aethaw py hethang tähang vi.

⁹ Äni lä Onesimae hai mangtä tyng ai mang. Onesimae lä mä-ai üng bälung aevaw saite yng te khimi lawngtä vi. Äni lä nang ce awng saite märü üng khimi käyng na thung üng mitang khüsälü te khimi lawngtä vi. Änini ma hi üng angthang na nang ce tea thui king hawi ai.

¹⁰ Kai hai mangtä thawng thung-a pä-ung saite Aristaku ma nang ce tea cibai sa te lo thui by mang ba. Banaba üng kangby lawng saite Marka la nang ce tea cibai sa te lo thui by. Äni üng angthang tärü te cae tea nang ce lä dang ö dy. Nang ce tea änini tyng dylä lady ö ba.

¹¹ Justus näkha mäthi saite Isu la nang ce tea cibai sa te lo thui by. Äni ce lawng thungtä lä Säthaw üng kälu tea kai hai mangtä sa saite Judae khimi na vi. Äni ce phüng-a kai lä aethaw dang bärai te vi.

¹² Nang ce üng lawngtä Khrista Isu üng mawsawng Epaphra, la nang ce tea cibai sa te lo thui by vi. Nang ce tähang äni lä aetang jawjaw pa te vi. Nang ce üng yng saite cakhi hethang Säthaw üng sa pa saite na tea nang ce mäny hethang äni ma aetang jawjaw pa te vi dy.

¹³ Äni lä nang ce tähang hai Leodikia märü, Herapolis märü-a awng saite khimi na tähang aethaw rae kha kälu sa saite tea kai lä thui haw vi.

¹⁴ Mä-ai üng bälung aevaw saite rawijae latang Luka hai Dema ni ma la nang ce tea cibai sa te lo thui hawi by.

¹⁵ Leodikia märü-a awng saite yng te khimi na tea kai üng ämaw aedawng saite phüng thui pa ö jo. Numpha hai äma ing üng kangkawng na tea la cibai sa te lo angthang thui pa ö ba.

¹⁶ Hini cae tea nang ce üng kangkawng khimi na ma phai pyng dylä, Laodikia kangkawng-a awng saite khimi na la phai ö jo sy ba. Leodikia märü-a awng saite kangkawng na tähang, kai ma tärü saite cae tea la nang ce phai ö jo ba.

¹⁷ Nang ce ma Akhipa tea, “Areng ma ae-y kha sa hethang py saite kälu tea lä khüng king rung khytä sa he kae” näkha thui pa ö ba.

¹⁸ Kai, Pawlae, üng hini cibai sa saite lo tea lä kai ma üng kö hai tärü khe te vi ba. Kai bung thawng thung-a pä-ung te tea nang ce lä aedawng haile tyng kha aetang pa ö jo ba. Säthaw ma nang ce tea tähang kähawi py jo sy. Amen.