Kolosa 3 - Caekäcai Kangthae (Lemi)

Säthaw üng aely kängai hai hing saite

¹ Nang ce lä Khrista hai mangtä kädü thung üng aetha tyng te phüng-a, Säthaw üng bangtang mang-a aety kha awng te Khrista üng mityng, Känipre hai aesui saite na tea ngai jawjaw ö ba.

² Nang ce lä älawngpre hai aesui saite na tea aedawng y käla ma Känipre hai aesui saite na tea phai aedawng ö lawi.

³ Äte makäte phüng-a mei nädylä nang ce lä dü ö pyng te vi dy. Vaihi nang ce üng hing saite lä Säthaw tea Khrista hai mangtä ho ea khai te vi.

⁴ Nang ce üng hing saite langdüng lä Khrista vi. Äni lä älawngpre-a ly haile te kätü-a, nang ce la äni üng phung-ang dang kha äni hai mangtä tho ö by ai.

Hing saite kangrüng hai kangthae

⁵ Tudylä nang ce lä bädö saite bälung üng kängai-a hui ö hang ba. Täkübäjang sa saite na, cai y saite na, deirei saite na, ngaiphi tüng y sa hethang ngai saite na, ae-aw saite bälung na awng ö vi hang lawi. (Ae-aw saite bälung näte lä mimi tea cäphaw te kätyng by vi.)

⁶ Khimi ce lä hini kätyng sa te phüng-a, Säthaw lä äni ce tea dengpy vi ai. Hini käsi na phüng-a, Säthaw üng dengpy saite lä äma üng älo tängai y saite na qawng-a tyng tätang khaw ai.

⁷ Jangni-a nang ce lä honi hawi y saite lang mang-a hui kha awng vävawi ö te vi dy. Khrista tea yng y te kälang-a lä, honi käsi na thung-a nang ma ce ma awng vai ö te vi dy.

⁸ Tungaila vaihi lä hini na tea nang ce sa hethang kae ö y dy ba. Hini na lä kädawtho saite na, rang saite na, esäre saite na, käsi prawng saite na hai täbawng mang lo käcai y tho saite na tea nang ce lä mäqaw ö la.

⁹ Nang ce lä lawng lawngtä tea älo kaeling kaemae aethui ö vi hang. Nang ce lä nang ma ce üng hawi y sa te na tea khaisö ö lawi.

¹⁰ Nang ce lä vaihi khimi kangthae-a aelawng ö te vi dy. Säthaw lä nang ce üng äthung-a kähawi aeme aeqa saite na mäkung kha äma üng ämaw äcae hai aetawng rung khytä sa te vi dy. Tukätephüng-a nang ce lä äni bung tätang khaw-a mäny ö ai.

¹¹ Hini phüng-a lä, Judae khimi läsy, ceng kälang khimi läsy, lengkhüng täke te läsy, täke y te läsy, khimi kärang läsy, kärang y läsy, mawsawng läsy, mawsawng y läsy, awng y dy lyng. Khrista lawngtä ni aely lengky te kae. Äni lä yng saite khimi qütä thung-a awng bawi te vi.

¹² Nang ce lä Säthaw ma re saite khimi na vi. Säthaw lä nang ce bung bälung aevaw kha khimi käcai-a bälawng te vi dy. Tukätephüng-a nang ce lä bäheng te, änawng hawi te, aemäneng te, bälung äkäneng awng saite hai änawngsa saite na hai-a awng ö.

¹³ Nang ce lä nang ma ce tingtawi kädawtho ö hang. Lawngtä ma nang tea sa tämang dylä, äni üng sa tämang saite tea bälawi pa. Areng lä nang ce üng sa tämang saite tea bälawi te kätyng nang ce la äpy üng sa tämang saite tea bälawi pa ö jo.

¹⁴ Aely lengky te lä nang ma ce tingtawi lawng lawngtä tea bälung aevaw ö. Honi kätyng lawng lawngtä tea nang ce lä bälung aevaw te phüng-a, nang ce rawijae aesa saite lä cungrü ö ai dy mang.

¹⁵ Khrista üng awngneng saite lä nang ce üng bälung thung-a pyng sy. Nang ce angxynlyng lä ätabung haetä üng kaepreng na kae vi. Tukätephüng-a nang ce bung lä awngneng saite thung-a mangtä awng hai hethang Säthaw ma re te vi dy. Tudylä Säthaw tea nang ce lä kawng te lo thui ö lawi.

¹⁶ Khrista üng lo angthang tea kätü qütä aedawng ö ba. Nang ce lä lawngtä tea lawngtä Khrista üng Angthang aemätu kha bälunghae saite angxynlyng na hai aemäcü ö. Nang ce üng bälung mäke angxynlyng na hai Säthaw tea Sam ae-awi na, Säthaw tea bälaw saite ae-awi na, Säthaw üng Angthang hai ae-awi na thui kha kawng ö lawi.

¹⁷ Nang ce lä kälu sa te hai, älo thui saite angxynlyng na hai Areng Isu üng jüng-a sa pa ö. Areng Isu hai-a nang ce lä Säthaw tea kawng te lo thui jawjaw ö ba.

Pawlae üng angtu thui saite lo

¹⁸ Nawngpui na ä, nang ma ce üng nawngpaw na ma pyng saite täkui-a awng kha thui saite lo tea tängai ö. Areng Isu üng äkähui na lä hini kätyng sa hethang kae.

¹⁹ Nawngpaw na ä, nang ma ce üng nawngpui na tea bälung aevaw ö. Äni ce tea lä sakälö khü pa ö hang ba.

²⁰ Nade na ä, nang ma ce üng nä-awi, pä-ai lo angxynlyng na tängai jawjaw ö ba. Nang ce honi kätyng tängai ö dylä, Areng üng bälung tea kawng hai ai.

²¹ Pä-ai na ä, nang ce üng caw nade na tea äte la sa y käla ma kädawtho hai ö hang. Hokä sa dylä, äni ce lä aethawsi ö ai.

²² Mawsawng na ä, nang ma ce üng ingkung na lo tängai ö. Ingkung na lä nang ce tea bälaw hethang kheng te thüng-a, äni ce üng kängai xyngtä tähang lä sa ö hang. Säthaw tea tämö khai te phüng-a, nang ce lä bälung mitang khaw-a awng te hai kälu sa ö ba.

²³ Äte makäti kälu sa ngaila, nang ce lä khimi ce üng kängai-a sa ö hethang y lyng. Säthaw üng kängai-a sa te kätyng, bälung mäke angxynlyng na aepy te hai-a nang ce lä sa ö ba.

²⁴ Areng Isu lä nang ce üng kälu sa te tähang ävang py ai näsaite tea lä mäny ö. Areng lä äma üng khimi na tähang sa rüng saite ävang na nang ce tea py ai. Nang ce ma mawsawng sa tätang khaw saite Areng lä Khrista vi.

²⁵ Khimi lawngtä hunghö sa dylä hunghö sa te kätyng ävang tea lä Säthaw ma dengpy ai. Säthaw lä ämi üng mimai tea la kheng te y vi.