Kolosa 2 - Caekäcai Kangthae (Lemi)

¹ Kai lä nang ce hai, Leodikia märü üng khimi na, kai bung nung vai y saite khimi kälang na tea säbawng hethang matangtä bälung mawng mei näte nang ce tea mäny hai hethang ngai te vi.

² Kai lä äte makäte phüng-a hini kätyng sa mei nädylä äni ce angxynlyng tea aethaw py hethang ngai te vi. Äma ce tingtawi bälung aevaw te hai aede ö näkha thui hethang kai lä ngai te vi. Säthaw üng älo käcai tea kätüng khaw-a thaikaw bawi te hai aethawng saite cangxei hethang hawi bärai te na äni ce tea dang hai bawi hethang kai lä ngai te vi. Honi kätyng Khrista näte Säthaw üng mätaw te tea äni ce lä mäny ö ai mang.

³ Säthaw lä ho saite bälungkähae hai ävang käting angthang tea Khrista ma nang ce tea mänykaw hai te vi.

⁴ Ämi ma la lo kätui hai nang ce tea kaeling kaemae sa ea bähawi haw y hethang, kai lä hini kätyng thui hethang ngai vi.

⁵ Kai üng ätabung lä nang ce hai hanglaw ngaila, bälung kaedawng-a lä nang ce hai mangtä awng jawjaw te vi. Nang ce lä bälung mangtä awng ea Khrista tea yng te leng phi ö te vi näkha mäny te phüng-a kai lä anghawtho bärai vi.

Khrista hai mangtä hing saite

⁶ Nang ce lä Khrista Isu tea “Areng” näkha nä hethang dang te phüng-a, äni hai bungtä awng jawjaw ö te vi.

⁷ Äni tea nang ce üng angjüng lä ru kha awng ö ba. Äni üng lo tea tängai khü kha hing ö. Epaphra hai äni üng rawijae na ma nang ce tea mätu te kätyng, nang ce üng yng saite lä ca te qawng-a ca khi ö rae ba. Säthaw tea kawng te lo thui kha bälaw jawjaw ö ba.

⁸ Ämi ma la nang ce tea mäthang sa kha ne y hethang sädi khai ö. Särae kälang na lä khimi ce üng reitae, käni khösang tea pyng saite Setan angra te üng ly te kaedawng hai bälung kähae na, nang ce tea mätu ö te vi. Honi kaedawng hai bälung kähae na lä Khrista hai aesui te y lyng.

⁹ Khrista lä khimi-a aelawng te kätü-a, äni lä Säthaw üng cungrü saite kätyng hing te vi.

¹⁰ Nang ce lä Khrista hai mangtä awng te phüng-a, cungrü ö te vi dy. Äni lä haidae leng saite angra na hai angxynlyng na tea pyng pa te vi.

¹¹ Khrista hai bungtä awng te phüng-a, nang ce lä lengkhüng täke te dang ö pyng te vi dy. Honi lengkhüng täke te lä khimi ce ma täke te y. Hunghö sa he ngai saite tea kädephae haw hethang Khrista lä nang ce tea äma üng lengkhüng täke saite hai sa te vi.

¹² Nang ce lä baptismae la te kätü-a, nang ce üng hunghö sa he ngai saite tea Khrista hai mangtä ö pyng te kätyng awng haw vi dy. Äni bung kädü thung üng mätha kha hing hai pa saite Säthaw üng phung-ang tea nang ce lä yng te phüng-a, Khrista hai mangtä dü saite thung üng nang ce la hing haile ö te by vi dy.

¹³ Jangni-a nang ce lä hunghö sa kha reitae-a hui y saite khimi kälang na te phüng-a, dü saite na kätyng vi dy. Tungaila Säthaw lä Khrista hai mangtä nang ce tea hing hai te vi dy. Mä-ai üng hunghö angxynlyng na tea Säthaw lä bälawi vi dy.

¹⁴ Mä-ai üng sa tämang saite tärü te cae tea mäthuija kha khai vi dy. Honi cae tea Khrista üng thinglang qawng-a täheng ea täphra pa te vi dy.

¹⁵ Säthaw lä phung-ang leng saite angra na tea Khrista üng thinglang hai-a bäja te tea Känipre üng angtawtha na hai khimi ce maw-a mätü pa vi dy.

¹⁶ Tukätephüng-a, reitae thung-a tärü te kätyng ca te, nei te, reitae üng pawi sa te, law se te üng pawi sa te, Aehae te Käni-a, nang ce lä hui y te phüng-a, nang ce tea khimi ce ma cy ö hang sy.

¹⁷ Honi jae saite na hai reitae na lä vaimaw mang-a tyng hethang awng saite kaekhui haetä kätyng vi. Khrista lawngtä xyng ni mitang khaw te kae.

¹⁸ Särae kälang na lä sa tämang te hai aemäneng kha Känipre üng angtawtha na tea cäphaw hethang mätu pa te vi. Äni ce üng the saite mang-a hui ö hang ba. Honi kätyng hui dylä, nang ce üng aeqang saite vang lä laja ö ai. Honi särae na lä äsämai mang aetüng te phüng-a, Säthaw üng Angthang tea hawihai pailai thaikaw te vi näkha näte lä äni ce üng käjüng aesa ö saite na kae. Äni ce lä khimi ce üng kaedawng hai thui ea aethaw ö vi dy. Tungaila äni ce aethaw hai nae lä äte haetä la awng y lyng.

¹⁹ Äni ce lä ätabung üng älö kätyng awng saite Khrista tea aenyng ö te y vi dy. Khrista üng rui saite phüng-a, ätabung-a awng saite äxingxü na hai aethaw rui na lä aesätawng ea ca hethang dang kha Säthaw üng aely kängai-a ätabung angxynlyng na lä ryng ö te vi dy.

Khrista hai mangtä dü kha hing saite

²⁰ Nang ce lä Khrista hai mangtä dü pyng vi dy te phüng-a, hini älawng üng pyng saite na tea nang ce lä tängai hethang ngai ö y dy lyng. Tukätephüng-a ätemakä älawng üng pyng saite na awng te kätyng, nang ce lä älawngpre üng reitae tea tängai ö te vi rawng mei.

²¹ Äte makäte phüng-a, “Honi tea süng hang. Mäteng hang. Aela hang,” näsaite ubädi na tea nang ce lä hui ö vi ai rawng mei.

²² Hini ubädi na tea tawng vai vi dylä, hini angxynlyng na lä äte la ävang ting ö te y vi. Hini na lä khimi ce ma mätu saite reitae na kae.

²³ Hini mätu saite na lä bälunghae te kätyng awng ö te vi. Honi mätu saite na tea Säthaw tähang aethaw aesa saite bälung hai mä-ai ma tea aemäneng saite lä mä-ai ma üng ätabung tea känaw py te hai aetawng vi. Tungaila honi mätu saite na lä hunghö sa y hethang säbawng haw y lyng.