Kolosa 1 - Caekäcai Kangthae (Lemi)

Pawlae üng kangkawng na tea kawng saite lo

¹ Hini lä kai, Pawlae, ma tärü saite cae vi. Säthaw ma re te phüng-a, kai lä Isu Khrista üng angtawtha lawngtä vi. Kai lä mä-ai üng kangby Timothe hai mangtä hi-a awng hawi te vi. Kai ni ma nang ce tea kawng te lo thui hawi te dy ba.

² Kolosae märü-a awng saite Säthaw üng khimi na hai, Khrista hai mangtä aebälung kha awng saite mä-ai üng äpy na tea kai lä hini cae tärü dy. Mä-ai üng Pä-ai Säthaw ma nang ce tea tähang kähawi hai awngneng saite py sy.

Säthaw tea kawng te lo thui kha aetang pa

³ Nang ce tähang aetang saite kätü qütä, mä-ai üng Areng Isu Khrista üng Pä-ai Säthaw tea kai ni lä kawng te lo thui jawjaw hawi te vi.

⁴ Ätephüng-a mei nädylä Isu Khrista tea nang ce üng yng saite hai-a Säthaw üng khimi angxynlyng na tea nang ce ma bälung aevaw saite na kai ni lä thai hawi te phüng-a vi.

⁵ Lo mitang khaw te Angthang Kähawi lä nang ce tea kangmang-a tyng te phüng-a, honi Angthang Kähawi üng py te aethang khai saite phüng tea nang ce lä thai ö te phüng-a, kai ni lä anghawtho hawi dy. Tukätephüng-a khösang mang-a nang ce tähang khai saite aethang khai te tea nang ma ce üng yng saite hai, bälung aevaw saite lä tyng te vi dy.

⁶ Nang ce tea tyng saite Angthang Kähawi lä älawngpre-a awng te mityng qütä, aethang hai dü vi dy. Nang ce lä honi Angthang Kähawi thai angcü kha Säthaw üng tähang kähawi tea mäny te üng hai ma dang te kätyng, mityng qütä awng saite khimi na la dang ö tyng by vi dy.

⁷ Nang ce lä Säthaw üng tähang kähawi tea mäny hai hethang Epaphra ma mätu te vi. Äni lä kai ni hai nang ce tea bälung aevaw saite Khrista üng mawsawng lawngtä vi. Äni lä kai ni üng jüng-a, nang ce thung-a Khrista tähang kälu khüsälü-a sa saite khimi vi.

⁸ Muilaw Käcai te mang üng dang saite nang ce üng bälung aevaw saite phüng tea äni ma kai ni tea thui te vi.

⁹ Tukätephüng-a, nang ce üng angthang thai te phüng-a, nang ce tähang aehae y käla ma kai ni lä aetang jawjaw ö te vi. Säthaw lä nang ce tea mani kätyng awng hai hethang ngai mei näte mäny hethang kai ni lä aetang pa te vi. Säthaw lä nang ce tea Muilaw Käcai tähang hai, thaikaw te bälungkähae py hethang tähang kai ni lä Säthaw tea aetang hawi pa te vi dy.

¹⁰ Tupyng dylä Areng üng ngai te kätyng awng hethang, Areng ma kawng hai hethang nang ce lä sa haw jawjaw ö ai. Nang ce lä hawi saite kälu angxynlyng na sa ö ai. Tukha nang ce lä Säthaw tea mäny te qawng-a mäny rae ö ai.

¹¹ Nang ce lä cüng saite hai änawngsa te awng mang haw hethang Säthaw lä äma üng awng saite haidae angxynlyng na hai nang ce tea aethaw py hethang kai ni lä aetang hawi jawjaw mang. Tukätephüng-a nang ce lä anghawtho ö ai.

¹² Nang ce lä mä-ai üng Pä-ai Säthaw tea kawng te lo thui haw jawjaw ö ai. Säthaw lä äma üng khimi na tähang kaevang pre thung-a sa rüng ea khai saite tähang kähawi na tea nang ce la kaeteng khaw-a dang hethang nang ce üng bälung mäcai te vi dy.

¹³ Säthaw lä mä-ai bung käving ma pyng saite thung üng aeqang te vi dy. Äni lä mä-ai bung äma üng bälung aevaw saite Äcäpaw üng pre thung-a nähai ö vi dy.

¹⁴ Äma üng Cäpaw tähang hai-a mä-ai üng hunghö na bälawi kha Setan üng haidae thung üng mä-ai bung Säthaw ma kätho te vi dy.

Khrista üng aesangky saite phung-ang

¹⁵ Säthaw bung lä ämi la nung haw y ngaila, Khrista lä khimi ce tea Säthaw üng ämaw äcae mätü pa te vi dy. Khrista lä Säthaw üng Cäpaw cälö lawng kha Säthaw ma sa saite angxynlyng na qawng-a aenae awngky te vi.

¹⁶ Khrista hai-a Säthaw lä äte angxynlyng na sa vi dy. Käni hai älawng, nung haw saite hai nung haw y saite angxynlyng na, phung-ang leng saite änang na hai Känipre üng angtawtha angxynlyng na tea Khrista tähang sa pa te vi dy.

¹⁷ Äte angxynlyng na awng y te kälang-a ma Khrista lä awng pyng te vi dy. Khrista üng phung-ang hai äte angxynlyng na lä äma ce üng mityng-a cülä-ü-a awng jawjaw pyng ö te vi dy.

¹⁸ Khrista lä kangkawng üng älö vi. Kangkawng la äni üng ätabung by vi. Äni lä kangkawng tea kähing py saite Kung vi. Äni bung Säthaw ma kädü thung üng angcüky-a mätha kha dungtäsa hing hai pa vi dy. Tukäte hai-a Khrista lä älawng hai käni khösang na üng aely kälengky saite lawngtä vi.

¹⁹ Tukätephüng-a Säthaw lä äma üng kängai angxynlyng na Äcäpaw tea cungrü hai saite lä äma üng aely ngai phi saite vi dy.

²⁰ Säthaw lä äma üng Cäpaw tähang hai Känipre-a awng saite angxynlyng na hai älawngpre-a awng saite angxynlyng na äma tea tyng hai hethang aely ngai te vi. Äma üng Cäpaw lä thinglang qawng-a äthi lawng hai te, hai äte angxynlyng na tea Säthaw lä äma hai aede hethang älang sa pa te vi dy.

²¹ Jangni-a nang ce üng hawi y saite bälung mäke phüng-a, Säthaw hai hanglaw saite mityng-a awng ea lä äni üng täre na lawng ö vi dy.

²² Tungaila vaihi Säthaw üng Cäpaw lä khimi-a aelawng kha dü te hai-a nang ce lä Säthaw hai aede haile tyng vi dy. Ätephüng-a Säthaw ma hikä sa te mei nädylä nang ce bung äma maw-a ka te thüng-a, nang ce lä caiping ea hunghö awng y, sa tämang y saite thung-a awng haw hethang tähang vi.

²³ Nang ce lä Angthang Kähawi tea yng jawjaw kha khimi käcüng-a lawng ö hethang kae. Angthang Kähawi thai ea dang saite aethang khai te üng nang ce lä aemäqaja hethang kae ö te y. Nang ce thai pyng saite hini Angthang Kähawi lä älawngpre mityng qütä awng saite khimi na tea thui pa ö. Kai, Pawlae, lä honi Angthang Kähawi üng mawsawng lawng te vi dy.

Kangkawng tähang Pawlae üng sa saite kälu

²⁴ Nang ce tähang mätang bälai saite phüng-a vaihi kai lä anghawtho te vi. Khrista lä kai bung mätang bälai hai he ngai te angxynlyng na tähang-a kai lä aerü rüng te vi dy. Khrista üng ätabung kätyng awng saite kangkawng tähang mätang saite tea äma üng aely kängai cungrü hai hethang kai lä mätang te vi.

²⁵ Säthaw lä kai bung äma üng lo cungrü hai hethang, nang ce tea äma üng Angthang Kähawi thui hai hethang mätaw te vi. Tukätephüng-a kai lä kangkawng üng mawsawng lawng te vi dy.

²⁶ Jangni-a Säthaw lä äma üng mawlang kaedawng khimi ce tea mäny hethang py y ngaila, äni üng khimi na tea vaihi lä täphawng pa vi dy.

²⁷ Säthaw lä ceng kälang na tähang äma sa saite na matangtä cangxei hethang hawi mei näte äma üng khimi na tea mäny hai pa ö vi dy. Hokä sa saite lä khimi kälang na näsaite nang ce thung-a, Khrista la awng dy näte vi. Tukätephüng-a Säthaw üng phung-ang aesang saite tea nang ce la dang haw ai näkha aethang khai haw te vi.

²⁸ Kai ce lä Khrista üng Angthang khimi qütä tea thui ö vi. Säthaw ma py saite bälung kähae hai kai ce lä khimi qütä tea mäcü ö te vi. Khrista hai mangtä aede hethang khimi qütä lä Säthaw maw-a tyng te kätü-a cungrü hai hethang kai ce lä honi kätyng sa ö te vi.

²⁹ Tukätephüng-a kai lä hini kätyng aethawsa kha kälu sa te vi. Khrista ma py saite phung-ang lä kai üng äthung-a awng kha sa te vi ba.