Johan 16 - Caekäcai Kangthae (Lemi)

¹ Isu ma “Nang ce üng yng te pra y hethang hini lo kai thui te vi.

² Äni ce lä nang ce bung Judae na üng ingkäcai thung üng mätho ö vi ai. Nang ce bung bädü saite khimi lä Säthaw üng kälu sa te dy näkha äma aedawng te kätü lä tyng khaw vi ai rawng.

³ Khimi ce lä Pä-ai hai Kai ni bung mäny ö y te phüng-a, hini kätyng nang ce tea sa ö vi ai.

⁴ Hini phüng lä nang ce tea kai lä thui rüng te vi dy. Hini phüng na tyng dylä, Kai ma thui rüng te kätyng nang ce lä sädi khai ö vi ai. Angcü-a kai lä nang ce hai mangtä awng te phüng-a hini na thui y te vi” näpa.

Muilaw Käcai üng kälu

⁵ “Vaihi lä kai bung mätaw saite Kung tea kai lä vawi ai dy. Tungaila nang ce lä ‘Mani mityng-a ly ai mei’ näkha ämi la düng ö y.

⁶ Hini phüng vaihi Kai ma thui te phüng-a, nang ce lä bälungsi phi ö dy.

⁷ Tängai ö, Kai vawi te lä nang ce tähang hawiky te vi. Kai vawi y dylä nang ce tea säbawng saite Kung lä tyng y lyng. Kai ly kha Muilaw Käcai bung nang ce tea mätaw ai mang.

⁸ Honi Muilaw Käcai cäqa te kätü-a, älawng üng khimi na tea hunghö sa saite phüng täphawng pa ai. Khimi ce lä Säthaw üng cüng saite phüng dawng tämang te na tea täphawng ai. Säthaw ma tärae cei saite phüng na la täphawng pa ai mang.

⁹ Äni ce lä kai tea yng y te phüng-a älawngpre üng khimi na lä hunghö awng vi.

¹⁰ Kai lä Pä-ai tea vawi kha nang ce lä Kai bung nung he y ai dy, te phüng-a hini älawngpre üng khimi na lä Säthaw üng cüng saite phüng aedawng te tämang ö vi.

¹¹ Säthaw lä älawngpre bung pyng saite Setan angra tea tärae cei pyng te phüng-a, äni ce lä tärae cei te phüng aedawng te tämang ö vi.

¹² “Nang ce tea Kai thui hethang lä awng mang te vi rawng. Tungaila nang ce lä vaihi thaikaw he y rawng lyng.

¹³ Tungaila Säthaw üng älo mitang phüng mätu saite Muilaw Käcai tyng ea lä, nang ce tea älo mitang angxynlyng phüng na täphawng pa ai mang. Honi Muilaw Käcai lä äma ngai te kätyng-a thui he y. Äma thai saite phüng na ni nang ce tea thui hethang kae. Ämaw mang üng phüng na äni ma nang ce tea thui rüng vi ai.

¹⁴ Äni lä Kai te mang üng dang saite älo na, nang ce tea thui pa te phüng-a, Kai üng phung-ang bung äni ma aetüng hai pa vi ai.

¹⁵ Pä-ai ma pyng saite angxynlyng na lä, Kai hai aesui bawi te vi. Tukätephüng-a Kai ma ‘Honi Muilaw Käcai lä Kai te üng dang saite älo na nang ce tea thui pa ai’ näkha Kai lä thui te dy.

Bälungsi te üng anghawtho haile ai

¹⁶ “Kätü tänaetä säla-a ma, nang ce lä Kai bung nung he y dy. Tupyng-a kätü tänaetä qae ea nang ce lä Kai bung nung be haile tyng vi ai” näkha näpa.

¹⁷ Tukätephüng-a äkähui na ma “Hini lä ätemakä thui te mei. Äni ma mä-ai tea ‘Kätü tänaetä qae ea nang ce lä Kai bung nung ö he y dy. Tupyng-a kätü tänaetä qae ea lä kai bung nang ce nung ö haile tyng vi ai’ näkha thui vi. Honi kätyng cang y äni ma ‘Kai lä Pä-ai tea vawi ai rawng’ näkha nä vi.

¹⁸ ‘Kätü tänaetä qae ea näte lä’ ätemakä näte vi mei. Ätemakä thui te mei näte mä-ai lä thaikaw y” näkha äma ce tingtawi aethui ö dy.

¹⁹ Isu lä äma tea äni ce düng hethang ngai te mäny kha “Kätü tänaetä qae ea nang ce lä Kai bung nung y lyng dy näte hai, kätü tänaetä qae ea Kai bung nang ce lä nung haile ai näsaite phüng Kai thui te ätemakä näte mei näte nang ma ce tingtawi aedüng ö vi” näpa.

²⁰ “Tängai ö, nang ce lä rawpi te kätü-a älawng üng khimi na lä anghawtho ö vi ai. Nang ce lä bälungsi ngaila, honi bälungsi saite lä bälung anghawtho saite na-a lawng ö vi ai mang.

²¹ Nawngmädi lawngtä lä äby aepeng te kätü tyng ea äni lä bälung mawng te awng vi. Ätephüng-a mei nädylä, äni lä naw mätang saite kätü tyng pa te phüng-a vi. Tungaila äby aepeng pyng ea lä, älawng qawng-a nade lawngtä bung aepeng pa te phüng-a, äma üng naw saite na tämang raw kha anghawtho vi dy.

²² Hini kätyng-a nang ce lä vaihi bälung mawng üngsüng ö te vi dy. Tungaila Kai lä nang ce hai aeting haile tyng te kätü-a, nang ce lä anghawtho ö vi ai. Nang ce üng anghawtho saite lä ämi khimi ma la, lawngja haw y lyng.

²³ “Honi käni-a nang ce lä kai tea äte la mäkai ö y vi ai. Tängai ö. Kai üng ämüng hai-a nang ce mäkai saite angxynlyng na lä Pä-ai ma py ai mang.

²⁴ Vaihi khytä nang ce lä Kai üng ämüng hai-a, äte haetä la mäkai ö y vi rawng. Mäkai ö. Nang ce dang ö ai mang. Tukha nang ce üng anghawtho te cungrü hai pa ai.

Älawngpre tea bäja pa

²⁵ “Hini phüng na Kai lä mätae te lo hai-a nang ce tea thui pyng te vi dy. Hini kätyng mätae te lo hai thui y käla Pä-ai üng phüng nang ce tea cüngpra-a thui saite kätü lä tyng ai rawng.

²⁶ Honi kätü-a nang ce lä Kai üng ämüng hai-a mäkai ö vi ai. Nang ce tähang Pä-ai tea Kai ma mäkai pa ai mang näkha kai lä thui te y vi.

²⁷ Ätephüng-a mei nädylä, nang ce lä Kai tea bälung aevaw kha Kai lä Säthaw te mang üng ly näte, nang ce lä yng ö te phüng-a, Pä-ai lä nang ce tea bälung aevaw te vi.

²⁸ Kai lä Pä-ai te üng tho kha älawngpre-a cäqa te kae. Vaihi älawngpre üng tho kha Pä-ai tea vawi haile tyng ai dy” näpa.

²⁹ Äkähui na ma “Vaihi kätü-a mätae te lo hai thui y käla, cüngpra-a älo thui pa vi dy.

³⁰ Nang lä äte cawngkhang na mäny king näte vaihi kai ce lä mäny vi dy. Isu tea ämi la älo düng hethang ngai pa y vi dy. Hini na phüng-a nang lä Säthaw te mang üng ly näte kai ce lä yng vi dy” näkha näpa.

³¹ Isu ma “Nang ce lä vaihi yng ö tätang dy.

³² Nang ce angxynlyng lä aehui sangxang kha ing-a vawi hethang kätü lä tyng vi ai rawng. Honi kätü lä vaihi ma tyng te dy. Nang ce lä Kai bung khaisö ö vi ai. Tungaila Pä-ai lä Kai hai mangtä awng kha Kai lä Kai ma qaitä awng te y vi.

³³ Nang ce lä Kai hai aesui kha awngneng hethang tähang hini phüng na Kai thui pyng te vi dy. Nang ce lä älawngpre-a mätangca saite na aeting ö vi ai. Tungaila aethaw aela kha awng ö. Kai lä älawngpre tea bäja te vi dy” näkha näpa.