Johan 13 - Caekäcai Kangthae (Lemi)

Isu ma äkähui na üng äkho mäse pa

¹ Cäqengja te pawi käni haetä tyng hethang kätü lä aenai dy. Isu lä älawngpre üng tho kha Pä-ai tea vawi haile hethang kätü tyng te mäny pa vi. Isu lä älawngpre-a awng saite äma üng äkähui na tea bälung aevaw jawjaw te vi. Äni ce tea käni kangteng khytä bälung aevaw jawjaw vi.

² Isu hai äkähui na lä kädüngbö mangtä ca kha awng ö dy. Setan angra lä Simon üng cäpaw Judae Iskriota tea Isu bung täre na üng kö thung-a, a hethang bärawi rüng pa vi dy.

³ Pä-ai ma Isu tea äte angxynlyng na sa hethang aenae a pa dy. Isu lä hini na mäny king te vi. Äma lä Säthaw te mang üng ly te vi kha Säthaw tea vawi haile tyng ai näte mäny te vi.

⁴ Tukha äni lä kädüngbö ca te loka üng aetha kha äma üng känih aeling pa dy. Sipry la ea angkeng-a aemäkhing dy.

⁵ Tupyng-a kaephi käleng-a tui kädi ea äkähui na üng äkho mäse kha angkeng-a aemäkhing saite sipry hai mai pa dy.

⁶ Simon Peterae tea tyng ea lä äni ma “Areng ä, kai üng äkho tea nang lä mäse by vi ai mei” näkha düng pa.

⁷ Isu ma “Kai sa saite tea vaihi nang lä mäny y rawng. Khawngdüng-a nang lä mäny by ai mang” näkha näpa.

⁸ Peterae ma “Areng ä, kai üng äkho tea manila mäse hang” näpa. Isu ma “Nang üng äkho tea kai mäse y dylä, nang lä kai hai aesui te y dy” näkha näpa.

⁹ Tukha Simon Peterae ma “Areng ä, kai üng äkho mäse te cang y äkö hai älö na la mäse king kae” näpa.

¹⁰ Isu ma “Tui aehu pyng saite khimi üng ätabung lä caiping pyng te vi dy. Äkho ni mäse hethang ngai te kae. Nang ce angxynlyng caiping ö vi dy. Tungaila nang ce thung-a lawngtä lä caiping te y vi.” (

¹¹ Isu lä äma bung ämi ma täre na kö thung-a, a ai mei näte äni lä mäny te vi. Tukätephüng-a “lawngtä lä caiping y” näkha thui te vi.)

¹² Isu lä äkähui na üng äkho mäse pyng ea känih aekhu haile tyng kha cäpawikhung-a aety pa be dy. Äni ma “Nang ce tea kai sa saite na mäny ö dy mei” näkha düng pa.

¹³ Nang ce lä kai tea “Särae, Areng” näkha kähyng ö. Honi kätyng nang ce kähyng te lä tüngkhaw te vi. Kai lä honi dy.

¹⁴ Kai lä nang ce üng Särae hai Areng la vi. Tukha nang ce üng äkho tea kai ma mäse te kätyng nang ma ce tingtawi la äkho aemäse hethang kae näpa.

¹⁵ Nang ce tea kai sa te kätyng nang ma ce tingtawi sa hethang kae. Kai ma sa te kätyng nang ce kai üng könüng la ö.

¹⁶ “Tängai ö, mawsawng lä äma üng areng qawng-a lengky te y. Angtawtha la mätaw saite ingkung qawng-a lengky te y lyng.

¹⁷ Vaihi hini phüng nang ce mäny kha honi kätyng sa dylä Säthaw ma nang ce tea tähang kähawi py ai.

¹⁸ “Nang ce angxynlyng phüng tea kai lä thui te y. Re pyng saite khimi na bung kai lä mäny vi. Tungaila Caekäcai thung-a awng te lä ‘Kai hai bö mangtä ca saite khimi lä kai tea äkho hai mäthui a’ näkha tärü saite kätyng tyng khaw vi ai” näpa.

¹⁹ “Honi kätyng tyng te kätü-a Kai lä kai vi näte nang ce yng hethang tähang-a honi na tyng y te kälang-a, vaihi ma nang ce tea thui rüng te dy ba.

²⁰ Tängai ö. Kai ma mätaw saite bung mäkung saite khimi lä kai bung mäkung te by kae dy. Kai bung mäkung saite khimi na lä, kai bung mätaw saite Säthaw bung mäkung te by kae dy” näpa.

Isu bung a saite khimi

²¹ Isu lä hini kätyng thui pyng ea bälung mätangca te tyng pa dy. Äni ma “Tängai ö. Nang ce thung üng lawngtä ma, kai bung täre na kö thung-a a vi ai” näkha cüngpra-a thui pa dy.

²² Äkähui na lä äma ce tingtawi aekheng ö rü dy. Isu lä ämi phüng thui te mei näte äni ce lä mäny ö y.

²³ Isu ma bälung aevaw saite äkähui lawngtä lä äni üng äteng-a aety pa dy.

²⁴ Simon Peterae ma lä Isu ma bälung aevaw saite äkähui tea “Ämi phüng thui te mei” näte düng hethang sädi py pa.

²⁵ Tukha Honi äkähui lawngtä lä Isu tea aeneng kha “Areng ä, äni lä ämi mei” näkha düng pa.

²⁶ Isu lä “Täkaw kaehütä angfang thung-a sänung kha py saite lä äni dy” näkha näpa. Tupyng-a Isu lä Simon üng cäpaw Judae Iskriota tähang täkaw kaehütä ang thung-a sänung kha py pa dy.

²⁷ Honi täkaw tea Judae ma la pyng-a Setan angra lä äni tea kung praw pa vi dy. Isu ma “Judae ä, nang ma sa hethang ngai saite kärang-a sa lawi” näpa.

²⁸ Isu ma ätephüng-a Judae tea hini kätyng thui te mei näte bö aw saite äkähui na lä ämi lawngtä la mäny pa ö y.

²⁹ Judae Iskriota lä tangkae cawngkö süng saite khimi vi kha pawi tähang ngai saite na rang hethang, y dylä mätang saite khimi na tähang phawisae py hethang tähang-a, Isu ma älo py pa müng näkha äkähui na lä aedawng ö te vi.

³⁰ Tukha Judae Iskriota lä täkaw kaehütä la pyng-a, ärang-a tho praw pa vi dy. Honi kätü lä kärung thung-a vi.

Isu lä äma dü ai te phüng thui haile tyng pa

³¹ Judae thoja pyng ea Isu ma “Vaihi ma Säthaw lä Kai, Khimi üng Cäpaw, lä phung-ang aetüng ai dy. Äni hai-a Säthaw üng phung-ang aetüng te dy.

³² Säthaw lä Äcäpaw hai-a phung-ang aetüng te dylä, Säthaw ma khekhe Äcäpaw üng phung-ang kärang-a aetüng hai pa ai.

³³ Kai caw nade na ä, Kai lä nang ce hai tänaetä awng he kae dy. Nang ce lä Kai bung mäqang ö vi ai. ‘Kai ly saite mityng-a, nang ce lä ly haw y lyng’ näkha Judae mätawngky na tea thui te kätyng, vaihi nang ce tea la Kai ma thui te dy ba.

³⁴ Kai lä nang ce tea särilo kangthae py dy. Nang ma ce tingtawi bälung aevaw ö. Kai lä nang ce tea bälung aevaw te kätyng nang ma ce tingtawi lawng lawngtä tea bälung aevaw hethang kae.

³⁵ Nang ma ce tingtawi bälung aevaw dylä, khimi angxynlyng na ma nang ce lä Kai üng äkähui tätang na vi näte mäny ö ai mang” näpa.

Peterae lä aephae ai näte phüng thui rüng pa

³⁶ Simon Peterae ma “Areng ä, mani mityng-a ly ai mei” näkha düng pa. Isu ma “Kai ly saite mityng-a nang lä vaihi hui haw y lyng. Khawngdüng-a lä, hui haw ai mang” näpa.

³⁷ Peterae ma “Areng ä, ätephüng-a vaihi kai lä hui haw y te vi mei. Areng nang tähang kai dü hethang awng rüng te dy” näkha näpa.

³⁸ Isu ma “Kai tähang nang lä dü hethang awng rüng dy mei. Tungaila aekhawng y te kälang-a, nang lä Kai bung qeng thungtä aephae vi ai” näkha näpa.