Hebrai 9 - Caekäcai Kangthae (Lemi)

Älawngpre-a hai Känipre-a Säthaw tea cäphaw saite

¹ Säthaw hai Isrelae khimi na säla-a angcüky üng aenai saite älo lä hini älawngpre-a Säthaw tea cäphaw hethang älang na hai cäphaw hethang mityng phüng thui te vi dy.

² Säthaw lä Isrelae khimi na ma äma tea cäphaw hethang taipung sa hai te vi. Honi taipung thung-a lä engthung khaw känetä awng. Angcüky üng ingthung khaw-a lä maibung kaesang haetä, khung haetä hai khung qawng-a lä täkaw käcai na awng vi. Honi ingthung khaw-a tea lä Mityng Käcai näkha mäthi vi dy.

³ Äbaeni üng jaeky saite känih käsa üng leithung mang-a lä caiky saite Mityng näkha mäthi vi.

⁴ Honi mityng-a lä rimui ädi maisawi hethang sui hai lawi saite maicang cäpi hai aenai hai saite älo üng sui hai lawi saite tengtae awng te vi. Honi tengtae thung-a lä mana täkaw khai saite sui kaephi kaesang hai Aron üng pawngpai awng vi. Honi pawngpai lä kädo sai vi dy. Aenai te üng ubädi na tärü saite kälung phei känetä la awng vi.

⁵ Tengtae äqawng-a lä Säthaw awng näte mätü hethang Kherubin mimi na la awng vi. Äni ce üng mäkhi na lä hunghö na bälawi saite mityng tea khu pa. Tungaila vaihi kai ce lä hini angxynlyng na thui mäcai hethang dang haw king ö te y.

⁶ Hini kätyng angxynlyng na tea aerü rüng kha mäthykung na lä taipung angcüky üng ingthung khaw-a kung ea käni qütä äma ce üng kälu sa ö vi dy.

⁷ Tungaila mäthykung kälengky xyng ni taipung üng äbaeni ingthung khaw-a lä säningtä-a qengtä xyng kung te kae vi. Äni lä äma üng hunghö tähang hai khimi ce üng mäny y käla sa tämang saite hunghö na tähang-a löci sa pa hethang löci aesa saite tawngbawi üng äthi tea süng kha kung hethang kae.

⁸ Angcüky üng taipung awng te kätü-a, Mityng Käcaiky thung-a ly saite lolang pä-awng y vi rawng te phüng-a, hini angxynlyng na hai Muilaw Käcai lä aenysy-a mätu te vi.

⁹ Hini lä vaini kätü tähang mätae saite vi. Mäthykung na ma Säthaw tea löci sa saite lasawng na hai tawngbawi na lä cäphaw saite khimi na üng käsi kähawi mäny saite bälung kaedawng tea cai hai king haw y näkha thui hethang ngai te vi.

¹⁰ Säthaw tea löci sa saite na lä käca känei hai reitae kätyng mäse saite cawngkhang na hai aesui te kae vi. Hini angxynlyng na lä bälung thung hai aesui y saite reitae na kae vi. Hini na lä Säthaw ma angxynlyng na tea kangthae sa te kätü khytä xyng ni awng ö te kae vi.

Khrista üng äthi

¹¹ Tungaila Khrista lä vaihi awng rüng saite kähawi na üng Mäthykung Kälengky kätyng tyng rüng te vi dy. Äni lä jangni üng awng pyng saite Taipung qawng-a tengxyng y lengky saite hai cungrüky saite taipung thung-a kung kha mawsawng sa te vi. Honi taipung lä khimi üng äkö na hai sa te y. Hini lä Säthaw ma sa saite älawngpre hai la aesui te y vi.

¹² Äni lä sobei na, raebawi na üng äthi na hai-a kung te y lyng. Tungaila äni lä Mityng Käcaiky-a äma üng äthi khekhe hai nähai kha mä-ai tea dungtäsa aeqang hethang qengtäma kung te vi dy.

¹³ Sobei thi, raebawi thi, hai raebawi cäpi tea maisawi kha dang saite baiphö na tea reitae kätyng pawprae saite khimi na tea käthüng ö te vi. Honi lä äni ce ärang mang üng tea cai hai te kae.

¹⁴ Tungaila Khrista üng äthi lä hini qawng-a cang y sa haw te vi. Äni lä dungtäsa Muilaw hai-a äma ma löci sa te vi dy. Äni lä Säthaw tähang cungrü-a löci aesa saite vi dy. Tukätephüng-a äni üng äthi lä tengxyng y haidae awng kha mä-ai üng käsi kähawi mänykaw saite bälung kaedawng na tea ävang ting y saite reitae thung üng cai hai te vi. Vaihi mä-ai lä Säthaw kähing tea mawsawng sa haw ö te vi dy.

¹⁵ Tukätephüng-a Khrista lä Säthaw hai khimi ce säla-a kangthae aenai saite vi. Tudylä Säthaw ma ka saite khimi angxynlyng na lä Säthaw üng aedo saite dungtäsa tähang kähawi tea dang haw ö te vi. Khrista lä angcü üng aenai saite täkui-a hunghö sa saite khimi na bung bälawi hethang dü pa te vi dy te phüng-a, honi kätyng lawng te vi dy.

¹⁶ Khimi lawngtä lä äni üng ingthawng na ämi ma dang ai mei näkha cae hai tärü ea khai he nädylä, honi khimi lä dü vi dy näte tea mätü khe hethang aely ngai te vi.

¹⁷ Äni üng awng saite ingthawng na tea ämi ma dang hethang mei näkha tärü saite kung hing te vi rawng nädylä äma üng tärü saite cae lä tawng haw te y rawng. Honi khimi dü pyng te kätü-a ni äni üng cae tea lä tawng haw hethang kae.

¹⁸ Tukäte phüng angcüky älo aenai saite mäteng ma tawngbawi üng äthi qa y dylä, tawng hethang dang haw y lyng.

¹⁹ Angcüky-a, Mosi lä khimi angxynlyng na tea Ubädi angxynlyng na thung üng särilo na thui pa vi. Honi pyng-a äni lä raebawi thi, sobei thi na tea tui hai aeqo ea Ubädi cae-u hai khimi angxynlyng na tea käthüng pa te vi. Äni lä Hiso näsaite thingkawng kung üng cangpre hai beram mui kangthing hai mäkhing kha honi äthi käthüng hethang tawng vi dy.

²⁰ Mosi ma, “Hini äthi lä Säthaw ma nang ce tea tängai hai hethang täru saite aenai te äsäny vi” näkha näpa.

²¹ Hini kätyng-a Mosi la Taipung Käcai hai cäphaw ea tawng saite angxynlyng na qawng-a, äthi hai käthüng pa by vi dy.

²² Tätang khaw, Mosi üng Ubädi kätyng äte angxynlyng na lä äthi hai-a cai hethang dang ö vi. Äthi bälawng y dylä Säthaw lä hunghö tea bälawi y lyng.

Khrista dü te phüng-a hunghö na bälawi saite

²³ Hini na lä Känipre-a awng saite na üng täthei lawng te phüng-a, äthi hai cai hai hethang kae. Tungaila Känipre-a awng saite na tea cai hai hethang lä löci kähawiky sa hethang aely ngai vi.

²⁴ Khrista lä khimi ce üng äkö hai sa saite Mityng Käcai-a kung te y lyng. Älawngpre-a awng saite Mityng Käcai lä Känipre-a awng saite Mityng Käcai täthei vi dy. Äni lä mä-ai üng jüng-a Säthaw üng maw-a tyng hethang Känipre-a kung te vi dy.

²⁵ Judae na üng mäthykung kälengky lä säning qütä Mityng Käcaiky-a tawngbawi üng äthi hai kung te vi. Tungaila Khrista lä äma ma löci aesa leilae hethang ly te y.

²⁶ Tudylä älawngpre sa angcü te kätü üng hai Isu lä mätang bälaica jawjaw hethang kae. Tungaila vaihi lä hini älawngpre angxynlyng na byng hethang aenai te kätü-a, äni lä qengtä hai ma tho kha äma ma bung löci aesa ea khimi ce angxynlyng üng hunghö na tea mäcai ping pa vi dy.

²⁷ Khimi qütä lä qengtä dü hethang kae kha honi pyng-a Säthaw ma äni ce tea tärae cei vi ai.

²⁸ Honi kätyng täthei Khrista lä khimi awng mang te na üng hunghö na tea mäcai hethang äma tea äma löci mawi kätyng-a qengtä aesa pa vi dy. Äni lä äbaeni tyng haile tyng vi ai. Honi kätü-a äni lä khimi ce üng hunghö na hai aesui kha äte la sa pa y dy lyng. Tungaila äni tea aering saite na bung lä äni ma aeqang pa vi ai mang.