Hebrai 8 - Caekäcai Kangthae (Lemi)

Mä-ai üng mäthykung kälengky Isu

¹ Kai ce thui hethang ngai saite lä hini vi. Mä-ai tea lä Känipre Sanphrang Säthaw üng aety nae bangtang mang-a aety saite Mäthykung Kälengky awng vi.

² Äni lä Säthaw üng taipung thung üng caiky saite mityng-a mäthykung sa te vi. Honi taipung tätang khaw tea lä khimi ce ma sa te y. Areng ma sa khe te vi.

³ Mäthykung kälengky qütä lä Säthaw tea lasawng hai tawngbawi na löci aesa hai he hethang khai te vi. Tukätephüng-a mä-ai üng Mäthykung kälengky lä Säthaw tea hae haetä hai löci aesa hethang kae.

⁴ Hini älawngpre-a Khrista awng vi dylä, äni lä mäthykung-a lawng haw y lyng. Judae na üng Ubädi kätyng löci lasawng na aesa hethang mäthykung awng mang saite na lä awng rüng ö te vi dy.

⁵ Hini älawngpre-a mäthykung na üng kälu sa saite lä Känipre-a mäthykung sa saite üng ämuilaw kätyng kae. Honi lä Mosi üng aeting saite täthei vi. Mosi lä Taipung Käcai sa hethang aerü te kätü-a, Säthaw ma äni tea, “Me anghung-a Kai ma nang tea mätü pyng saite mimi täthei kätyng khaw-a, angxynlyng na kähawi-a sa hethang kae” näkha nä vi dy.

⁶ Tungaila vaihi Säthaw lä Isu bung mäthykung sa hai hethang re te vi dy. Isu üng kälu sa saite na lä hini älawngpre-a awng saite mäthykung na qawng-a aely lengky vi. Honi kätyng Säthaw hai äni üng khimi na säla-a Isu üng aenai saite lo lä aenai saite Kangrüng qawng-a hawiky vi. Ätephüng-a nädylä honi aenai saite lo Kangthae lä hawiky saite älo aedo saite na qawng-a aenyng te phüng-a vi.

⁷ Angcüky üng aenai saite älo lä cungrü-a sa haw y te phüng-a, äbaeni üng aenai saite lo lä aely ngai te vi.

⁸ Tungaila Säthaw lä äma üng khimi na tea cy kha äni ma, “‘Judae khimi na hai, Isrelae khimi na hai kai lä aenai saite älo Kangthae sa hethang kätü lä aenai vi dy.

⁹ Aenai saite älo Kangthae lä Aikuta pre üng äni ce üng kangsi kangjaw na bung äkö na hai süng kha nähai saite kätü-a, äni ce hai kai üng aenai saite älo hai lä aetawng te y lyng. Äni ce lä honi aenai saite lo tea tängai ö khü y te phüng-a vi. Tukätephüng-a kai lä äni ce bung khaisö te vi dy’ näkha Areng ma thui te vi.

¹⁰ ‘Tungaila kai lä khawngdüng-a Isrelae khimi na hai hini aenai saite älo Kangthae sa ai’ näkha Areng lä thui vi. ‘Kai lä äni ce üng kaedawng saite thung-a kai üng ubädi na tea mäkung vi ai. Äni ce üng bälung thung-a honi na kai lä tärü ai. Kai lä äni ce üng Säthaw-a lawng kha äni ce la kai üng khimi na-a lawng ö ai.

¹¹ Khimi lawngtä lä äma üng kangby jä-ai na hai äma üng äma üng särawng dawngpa na tea, “Areng bung mäny ö lawi” näkha mätu hethang ngai y dy lyng. Tukha äni ce angxynlyng lä aely cäpiky üng hai kälengky saite khimi na khytä kai bung mäny ö bawi ai.

¹² Kai lä äni ce üng hunghö na tea bälawi ai. Kai lä äni ce üng hunghö na tea bälawi ai. Kai lä äni ce üng sa tämang saite na tea aedawng jawjaw y dy lyng’ näkha näpa.”

¹³ Säthaw lä honi älo aedo saite tea älo aedo saite kangthae näkha mäthi te vi dy. Honi kätyng-a äni lä angcüky üng aenai saite älo tea lä aenai saite älo Kangrüng näkha mäthi te vi. Kangrüng tea lä tawng hethang dang y te phüng-a, qae y tea ma la ja vi ai.