Hebrai 6 - Caekäcai Kangthae (Lemi)

¹ Tukätephüng-a angcü üng Khrista phüng mätu saite na tea khaisö kha yng te ryng hai hethang mätu saite na tea mä-ai lä ly ö si. Mä-ai üng yng saite aenyng nae tea lä mätu haile tyng hethang aely ngai te y lyng.

² Hini na lä: Hawi y saite kälu na üng ae-ui kha Säthaw tea yng saite, Baptismae la saite, yng saite khimi na tea äkö thyng saite, dü saite üng aetha haile saite, dungtäsa tärae cei saite na vi.

³ Mä-ai lä ryng saite Khristen-a aelawng ö si. Säthaw ma aely ngai dylä, mä-ai lä honi kätyng sa ö ai.

⁴ Mä-ai ma üng yng saite na khaisö te khimi na tea lä ae-ui hai hethang nähai haw y lyng. Äni ce lä Säthaw üng kaevang-a awng vai kha Säthaw üng pyng saite hing te kangthae tea mäteng pyng ö te vi dy. Äni ce hai yng saite khimi kälang na tea lä Säthaw ma Muilaw Käcai mangtä py ö te vi dy.

⁵ Säthaw üng älo tea hawi vi näkha äni ce lä mäny ö khe vi. Säthaw ma pre pyng saite kätü üng haidae tea äni ce lä mäny ö pyng te vi dy.

⁶ Honi pyng-a äni ce lä Khrista tea yng saite na käde phae ö te vi. Honi khimi na tea lä ae-ui haile tyng hai hethang säbawng haw y lyng. Ätephüng-a mei nädylä äni ce lä Säthaw üng Cäpaw bung thinglang qawng-a täheng tynglyng kha khimi ce maw-a Khrista tea kaejae pa ö te phüng-a vi.

⁷ Älawng lä äma qawng-a khöne saite khö tui tea nei kha äkung e saite khimi na ma tawng haw hethang äkung na aepra ea leng hai pa te vi. Säthaw lä honi älawng tea tähang kähawi py pa te vi.

⁸ Tungaila älawng lä angling kung na hai aeca kung na tea aepra dylä, äte la ävang ting te y. Säthaw lä honi älawng tea täking vi ai. Kangkhüng-a lä honi khimi na ma älawng tea mai hai sawi ö vi ai.

⁹ Kai üng bälung aevaw saite kangby jä-ai na ä, kai ce lä hini kätyng thui ngaila, nang ce tea kai ce lä bälung ae-y khü ö te vi. Säthaw ma nang ce bung aeqang saite hai tähang kähawiky na nang ce tea py te vi dy näte kai ce lä mäny ö te vi.

¹⁰ Säthaw lä cüng jawjaw te vi. Äma üng khimi na tea nang ce ma säbawng pyng saite na hai säbawng jawjaw saite na tea lä Säthaw ma aedawng haile tyng te vi. Nang ce lä Säthaw tea bälung aevaw ö kha äni tähang kälu sa saite tea äni lä tämang te y.

¹¹ Nang ce angxynlyng tea Khrista tyng haile te khytä honi kätyng bälung kähawi awng kha aethaw rae jawjaw hethang lä mä-ai üng ngaiky ö saite vi. Hokä dylä nang ce üng aethang khai saite na lä cungrü khaw ö vi ai.

¹² Kai ce lä nang ce tea aethawli hai hethang ngai te y lyng. Khrista tea yng kha khung saite khimi na kätyng awng hai hethang hai Säthaw üng aedo saite lo na tea dang hai ö hethang ngai te vi.

Säthaw üng aedo saite älo käcakhi

¹³ Säthaw lä Abraham tea älo aedo te kätü-a, äni lä äma üng aedo te kätyng sa hethang älo aenai khü te vi. Äni qawng-a leng saite ämi la awng y te phüng-a, äni lä äma üng ämüng hai älo aenai te vi dy.

¹⁴ Äni ma, “Kai lä nang tea tähang kähawi py khaw ai. Nang üng kaesui kaebeng na awng mang hai vi ai” näkha näpa.

¹⁵ Abraham lä änawngsa kha Säthaw üng älo aedo te kätyng dang khaw vi dy.

¹⁶ Khimi ce lä äma ce qawng-a leng saite na üng ämüng tea ka kha älo aedo ö te vi dy. Honi cakhi-a aedo saite lo hai älo ae-e saite angxynlyng na tea lä bädü ö te vi dy.

¹⁷ Säthaw lä äma üng aedo saite lo dang te khimi na tea äma üng mawlang kaedawng lä manila lang vai y näte mäny haisy hethang ngai hai te vi. Tukätephüng-a Säthaw lä äni üng cakhi-a aedo saite lo hai aedo pa te vi dy.

¹⁸ Säthaw lä äma üng älo aedo saite kätü-a täking saite lo la thui pa te vi dy. Honi känetä lä mäqa haw y saite na vi. Säthaw lä kaeling kaemae sa haw y te phüng-a, mä-ai lä Säthaw tea bälung ae-y khü ö te vi. Säthaw ma mä-ai bung aedung hai hethang äni tea aehui ö te vi. Säthaw ma py te aethang khai saite tea mä-ai lä kähawi-a süng khü hethang aethaw dang ö te vi.

¹⁹ Mä-ai üng hing saite tähang tui sangphaw aeca hai nae süng käleng kätyng hini aethang khai saite lä mä-ai tähang awng te vi. Honi lä mä-ai üng bälung tea cakhi hai saite vi. Honi cakhi hai saite lä Känipre Ingkäcai käleng thung-a jaeky saite känih käsa te mang hai mityng käcaiky-a nähai haw te vi. Hini aethang khai saite lä Isu Khrista vi dy.

²⁰ Isu lä mä-ai tea säbawng hethang mä-ai y kälang-a Mityng Käcaiky thung-a kung rüng te vi dy. Äni lä mäthykung kälengky Melkhizede kätyng-a mä-ai üng dungtäsa Mäthykung kälengky-a aelawng vi dy.