Hebrai 5 - Caekäcai Kangthae (Lemi)

¹ Säthaw lä mäthykung kälengky qütä bung äma üng khimi na thung üng re te vi. Äni bung lä khimi ce üng jüng-a Säthaw tea mawsawng sa hethang khai pa te vi dy. Äni lä khimi ce üng hunghö na tähang Säthaw tea löci na sa kha lasawng na py pa hethang vi.

² Mäthykung kälengky äma khekhe lä aethawdi saite khimi vi. Tukätephüng-a sa tämang saite na tea lä mäny y te phüng-a, hunghö sa saite khimi na tea äni lä bäheng haw te vi.

³ Äni lä äma ma khekhe la aethawdi te phüng-a khimi ce üng hunghö na tähang cang y äma üng hunghö na tähang la löci sa hethang kae te by vi.

⁴ Ämi la äma tea mäthykung kälengky lawng hethang aemäsang haw y lyng. Säthaw lä Aron bung mäthykung kälengky lawng hethang re te kätyng Säthaw ma ka saite khimi xyng ni mäthykung kälengky lawng haw te kae vi.

⁵ Tukätephüng-a Khrista la äma tea äma mäthykung kälengky lawng hethang aemäsang te y lyng. Säthaw lä äni tea, “Nang lä kai üng Cäpaw vi. Vaini kai lä nang üng Pä-ai-a aelawng vi dy” näkha näpa.

⁶ Äni ma Caekäcai phütä thung-a thui tynglyng be te lä, “Nang lä cangkhawng üng mäthykung Melkhizede kätyng dungtäsa mäthykung lawng ai” näkha nä vi.

⁷ Isu lä älawngpre äma üng hing te thüng-a Säthaw tea aetang vi. Dü saite üng äni bung aeqang haw saite Säthaw tea minaw tui na hai raw kha ätüng käleng na hai aesi aebai te vi. Äni lä bälung aemäneng kha älo tängai pa te phüng-a, Säthaw lä äni üng aetang saite tea tängai pa vi dy.

⁸ Äni lä Säthaw üng Cäpaw lawng ngaila äma üng mätang bälaica te na hai-a älo tängai hethang aetu te vi dy.

⁹ Säthaw lä äni bung cungrü hai pyng-a, äma üng lo tängai saite khimi angxynlyng na tähang dungtäsa aeqang saite äkung-a äni lä aelawng vi dy.

¹⁰ Säthaw lä äni bung Melkhizede kätyng mäthykung kälengky-a lawng hai hethang khai pa te vi dy.

Khrista tea yng saite lä käde phae ö hang

¹¹ Hini na phüng thui hethang ngai saite älo na kai ce lä awng mang vi. Tungaila nang ce tea thui mäcai hethang lä rae bärai. Ätephüng-a mei nädylä, nang ce lä nai-ui saite na kae vi.

¹² Nang ce lä vaihi kätü-a khimi kälang na tea mätu hethang hawi khaw te vi. Tungaila nang ce tea khimi lawng lawngtä ma Säthaw üng angthang angcü üng lo tea mätu hethang lä aely ngai te vi rawng. Nang ce lä äby na kätyng vi. Bö ang na tea ca haw y lyng. Känö tui na nei te kae vi rawng.

¹³ Känö tui qaitä nei saite khimi lä äby kae vi rawng. Käsi hai kähawi näsaite tea lä täphü hethang kaw te y vi rawng.

¹⁴ Tungaila bö ang na lä ryng saite khimi na tähang kae. Äni ce lä käsi hai kähawi tea täphü kaw hethang aetu ö pyng te vi dy.