Hebrai 2 - Caekäcai Kangthae (Lemi)

Säthaw üng aeqang saite

¹ Tukätephüng-a mä-ai lä thai saite lo mitang tea kähawi-a tängai ö khü hethang kae. Tukä y dylä mä-ai üng yng saite lä laja vi ai.

² Säthaw lä mä-ai üng kangsi kangjaw na tea Känipre üng angtawtha na hai-a thui saite angthang lä mitang khaw te vi. Honi angthang tea hui y, tängai y saite khimi na tea lä Säthaw ma äni ce hai aeteng khaw saite deng py ö vi ai.

³ Hokä aeqang saite käleng tea mä-ai dawngcang y vi dylä, Areng ma mä-ai tea deng py ai näte lä tätang khaw vi. Areng äma khekhe lä hini aeqang saite angthang angcü-a ma thui te vi dy. Äni üng angthang thai saite khimi na ma mä-ai tea lä honi angthang tüngkhaw vi saite mätü vi dy.

⁴ Äni üng khimi na ma mitang khaw te angthang mätü hethang Säthaw lä cangxei saite na hai kamarae cawngkhang na sa te vi. Äni lä äma üng aely kängai kätyng Muilaw Käcai üng sakaw saite na hai-a äma üng khimi na tea py pa te vi dy.

Mä-ai bung aeqang saite mang-a bähawi te Kung

⁵ Mä-ai lä vaimaw mang-a tyng hethang älawngpre kangthae phüng thui te vi. Säthaw lä Känipre üng angtawtha na tähang honi pre tea pyng hethang aenae py pa y.

⁶ Caekäcai thung-a khimi lawngtä ma thui te lä, “Säthaw ä, ätephüng-a nang lä bälung thung-a, khimi ce bung aedawng te vi mei. Nang tähang khimi ce üng caw nade na bung rui hethang ätephüng-a aely lengky te vi mei.

⁷ Nang lä äni ce bung Känipre üng angtawtha na qawng-a cäditä aeneng hai pa vi dy. Nang lä khimi ce tea cangxei-a sa kha phung-ang py pa vi dy.

⁸ Nang lä äte angxynlyng na pyng hai hethang äni ce tea aenae py pa vi dy” näkha nä vi. Säthaw ma, “Äte angxynlyng na äni ce tea pyng hai te vi” näte lä khimi üng pyng y saite lä äte haetä la awng y näte vi. Tungaila vaihi khimi ce lä äte angxynlyng na tea pyng te mä-ai lä nung ö y vi rawng.

⁹ Tungaila mä-ai lä Isu bung nung ö te vi. Säthaw lä Isu bung Känipre üng angtawtha na qawng-a tänaetä äje cäcaw kaeneng-a khai pa vi. Hini kätyng Isu lä Säthaw üng tähang kähawi hai-a khimi angxynlyng na tähang dü pa hethang kae te vi. Äni lä mä-ai tähang mätang bälaica-a dü pa te phüng-a Säthaw ma vaihi lä äni tea cangxei-a sa kha phung-ang py pa te mä-ai lä mäny ö te vi.

¹⁰ Säthaw lä äni hai-a äni tähang äte angxynlyng na tea sa kha pyng hai pa te vi. Äni lä Isu bung mätang bälaica aeting te hai-a cungrü hai pa te vi. Tukätephüng-a caw nade awng mang te na bung lä äma üng phung-ang thung-a qa hai hethang nähai pa vi dy. Tukha Isu lä äni ce bung aeqang saite Areng vi.

¹¹ Isu lä khimi ce bung äma ce üng hunghö na tea mäcai pa te vi. Äni hai äni ma mäcai saite angxynlyng na üng Äpä-ai lä lawngtä kae. Tukätephüng-a Isu lä äni ce tea äma üng kangby hai ticaw na näkha ka hethang aejae y.

¹² Isu lä Säthaw tea, “Kai lä nang üng sa saite na kai ma üng kangby hai ticaw na tea thui ai. Kai lä nang tea mangtä cäphaw he aecö saite na üng maw-a bälawi saite ae-awi na thui ai” näpa.

¹³ Äni ma thui tynglyng be te lä, “Kai lä Säthaw tea ae-y vi ai” näkha nä vi. Äni lä, “Kai tea Säthaw ma py saite caw nade na hai kai lä hi-a mangtä awng te vi” näpa.

¹⁴ Honi caw nade na lä äthi hai ängang awng saite khimi na vi te phüng-a, Isu lä honi na kätyng äthi ängang awng saite khimi-a aelawng khe te by vi dy. Äni üng dü saite hai-a Setan angra üng haidae tea täphra haw te vi dy. Honi Setan angra tea lä khimi ce bung bädü hai hethang haidae awng vi.

¹⁵ Isu lä hini kätyng sa te phüng-a, khimi angxynlyng na tea mawsawng na kätyng awng saite thung üng aelawi hai pa vi dy. Khimi ce lä dü hethang ri te phüng-a, äni ce lä hing saite jungtä mawsawng na kätyng awng ö vi dy.

¹⁶ Äni lä Känipre üng angtawtha na tea säbawng te y lyng näte mä-ai lä mäny ö te vi. Äni lä Abraham üng kaesui kaebeng na tea säbawng te vi.

¹⁷ Tukätephüng-a äni lä älang qütä-a äma üng khimi na kätyng aetawng hethang kae te vi. Hini kätyng äni lä mä-ai tea bäheng kha Säthaw üng ae-y khü saite Mäthykung Kälengky-a lawng haw te vi. Tukätephüng-a Säthaw lä khimi ce üng hunghö na tea bälawi haw te vi.

¹⁸ Setan lä Isu tea hunghö sa hethang the te hai mätang bälai saite tea äni lä aeting khe te vi dy. Tukätephüng-a Isu lä hunghö sa hethang Setan ma the saite khimi na tea säbawng haw te vi dy.