Hebrai 10 - Caekäcai Kangthae (Lemi)

Angxynlyng na tähang qengtä Khrista üng dü pa saite

¹ Judae na üng Ubädi lä tätang saite na üng mitang khaw te hai cungrü saite aetu nae y vi. Honi lä tyng hethang äkähawi na üng äkaekhui kae vi. Ubädi kätyng lä säningtä pyng-a säningtä löci na sa pyng saite täthei-a sa hethang kae. Tudylä Ubädi hai Säthaw tea ly saite khimi na lä löci na sa te hai-a makä sa kha la hini löci na hai-a cungrü haw y lyng.

² Säthaw tea cäphaw saite khimi na lä äma ce üng hunghö na üng tätang khaw-a cai haw vi dylä, äni ce lä hunghö awng näte dawng ö y dy lyng. Löci angxynlyng na tea sa haw ö y vi ai dy.

³ Honi säningtä pyng-a säningtä löci aesa saite lä khimi ce tea äma ce üng hunghö na aedawng haile tyng hai ö te vi.

⁴ Tukha raebawi thi hai sobei thi na lä khimi ce üng hunghö na tea cai hai haw te y lyng.

⁵ Tukätephüng-a Khrista lä hini älawngpre-a ly te kätü-a, Äni ma Säthaw tea, “Nang lä khimi ce üng lasawng hai tawngbawi löci sa saite na tea ngai y vi. Tungaila nang lä Kai tähang ätabung sa rüng te vi dy.

⁶ Nang lä maicang qawng-a maisawi saite tawngbawi na, y dylä, hunghö mäcai hethang löci sa saite na tea ngai te y vi.

⁷ Tukätephüng-a Kai ma, ‘Säthaw ä, Kai lä hi-a vi. Caekäcai thung-a lä Kai üng phüng tärü te kätyng nang üng aely kängai sa hethang, Kai lä tyng vi dy’ nä vi” näkha thui vi dy.

⁸ Angcü-a Khrista ma, “Nang lä löci sa saite, lasawng na py saite, y dylä tawngbawi na tea maicang qawng-a maisawi saite, hai hunghö na tea mäcai ping hethang löci sa saite na tea ngai y” näkha thui vi. (Ubädi-a awng te kätyng honi löci na sa hai hethang awng ngaila, Äni lä honi tea thui te vi.)

⁹ Tupyng-a Khrista ma, “Säthaw ä, Kai lä hi-a vi. Nang üng aely kängai sa hethang Kai lä tyng te vi dy” näkha thui vi. Tudylä Säthaw lä löci sa saite Kangrüng angxynlyng na tea käde phae kha honi na üng mityng-a Khrista üng löci sa saite tea khai pa te vi.

¹⁰ Säthaw üng aely kängai kätyng Isu Khrista lä äma üng ätabung tea qengtä löci aesa saite hai-a mä-ai üng hunghö na mäcai te vi dy.

¹¹ Judae na üng mäthykung qütä na lä käni qütä äma ce üng kälu na sa kha honi kätyng täthei löci na sa pyng-a sa be saite kätü na lä awng mang ö te vi. Tungaila hini löci sa saite na lä manila hunghö na tea mäcai haw ö te y.

¹² Tungaila Khrista lä dungtäsa tähang löci mawi kätyng-a hunghö na tähang qengtä hai ma äma ma löci aesa te vi dy. Vaihi äni lä Säthaw üng äkö bangtang mang-a aety kha awng te vi.

¹³ Säthaw lä äma üng täre na tea äkho täkui-a khai te khytä äma lä honi tea aering kha awng te vi.

¹⁴ Tukätephüng-a Khrista üng qengtä löci sa saite hai-a cai hai saite khimi na tea lä dungtäsa kätü tähang cungrü hai te vi dy.

¹⁵ Muilaw Käcai la honi phüng mä-ai tea thui te vi.

¹⁶ Angcüky-a äni ma, “ ‘Hini lä vaimaw mang tyng hethang awng saite käni-a, kai la äni ce hai aenai saite sa vi ai,’ näte Areng lä thui vi. ‘Kai lä äni ce üng bälung thung-a Kai üng Ubädi na khai ai. Äni ce üng bälung kaedawng saite qawng-a Kai üng Ubädi na tärü ai’” näkha nä vi.

¹⁷ Tupyng-a äni ma, “Kai lä äni ce üng hunghö na hai sa tämang saite kälu na tea aedawng haile jawjaw ö y vi ai” näkha näpa.

¹⁸ Vaihi Säthaw ma hunghö na tea bälawi pyng te kätü-a lä, löci na sa hethang lä äte la aely ngai y dy.

Säthaw hai kaenai-a ly ö si

¹⁹ Tukätephüng-a kangby jä-ai na ä, Isu lä mä-ai tähang dü pa te phüng-a, Mityng Käcaiky-a kung hethang mä-ai lä ae-y khü saite bälung awng ö te phüng-a vi.

²⁰ Khrista lä mä-ai tähang kähing py saite älang kangthae pä-awng vi dy. Vaihi mä-ai lä känih ngang käsa jae saite hai-a Säthaw tea kung haw ö dy. Honi känih käsa lä Khrista üng ätabung tea thui te vi.

²¹ Mä-ai lä Säthaw üng Ingkäcai-a rui hethang Mäthykung käleng lawngtä awng vi.

²² Tukätephüng-a mä-ai lä Säthaw üng äteng-a mitang khaw saite bälung, yng khü te hai ly ö si. Khrista üng äthi lä mä-ai üng käsi kähawi mäny saite bälung kaedawng na tea mäcai pa te phüng-a, mä-ai üng sa saite hunghö na tea lä aedawng ö vi hang lawi. Mä-ai üng ätabung na tea lä tui käcai hai mäse pang vi dy.

²³ Khimi ce maw-a mä-ai thui saite aethang khai te tea lä cakhi-a süng ö si. Ätephüng-a mei nädylä Säthaw ma älo aedo saite tea sa khü hethang mä-ai lä ae-y haw ö te phüng-a vi.

²⁴ Mä-ai lä lawng lawngtä tähang aedawng ö si. Bälung aevaw te hai kälu kähawi sa hethang mä-ai lä aesäbawng linglawng ö si dy.

²⁵ Khimi phütä na lä kangkawng üng khimi na aecöqu saite thung-a ly ö y vi dy. Tungaila mä-ai lä mangtä aecöqu jawjaw ö si. Areng tyng haile hethang käni lä aenai vi dy te phüng-a, mä-ai angxynlyng na lä aethaw aepy te qawng-a cang y aethaw aepy linglawng rae ö si.

²⁶ Mä-ai lä lo mitang khaw tea mäny pyng-a, mä-ai üng kängai-a sa tämang haile jawjaw dylä, hunghö na mäcai hethang tawngbawi hai löci aesa hethang lä awng ö y vi dy.

²⁷ Tungaila mä-ai lä honi kätyng sa vi dylä mä-ai üng hunghö na lä Säthaw üng deng py saite tea ri te hai ni aering hethang awng ö te kae vi dy. Säthaw üng täre na lä täphra saite tengxyng y mai käbi tea aering hethang ni awng te kae dy.

²⁸ Khimi lawngtä lä Mosi üng Ubädi tea tängai y kha hunghö sa dylä, khimi lawng ne lawng thungtä na ma äni üng hunghö sa saite tea nung kha thui dylä, mätawngky na lä bäheng y te hai ma äni tea bädü haw ö te vi.

²⁹ Säthaw üng Cäpaw tea mäthi y saite khimi na lä ätemakä aelawng ai mei näte nang ce lä aedawng ö mei. Hunghö üng cai hai pa saite Säthaw üng aenai te üng äthi tea ävang käting y kätyng mäthi saite khimi hai tähang kähawi üng Muilaw Käcai tea cy saite khimi tea lä Säthaw ma honi qawng-a siky saite deng py ai.

³⁰ Areng ma thui te lä, “Hunghö sa saite khimi tea lä kai ma rawithung tha ai. Kai ma rawithung tha pa vi ai” näkha nä vi. Äni ma honi kätyng, “Areng lä äma üng khimi na tea tärae cei ai” näkha näte vi. Hikä thui saite Areng bung mä-ai lä mäny ö te vi.

³¹ Kähing Säthaw üng haidae täkui-a tyng saite na lä ri hethang hawi bärai vi.

³² Angcüky käni Säthaw üng kaevang nang ce thung-a aevang saite tea lä aedawng ö ba. Nang ce lä kätü awng mang-a mätang bälaica te na aeting ngaila, nang ce yng saite tea lä käde phae ö y vi.

³³ Qeng qengtä nang ce tea khimi ce lä mipui na maw-a käsi thui kha sakälö khü ö vi dy. Qeng qengtä khimi kälang na lä nang ce kätyng mätang bälai aeting te thung-a, nang ce la äni üng kangby jä-ai sa hethang awng rüng ö te vi dy.

³⁴ Nang ce lä thawng thung-a pä-ung saite na tea bäheng ö te vi. Nang ce tea awng saite vyngsai angxynlyng na tea khimi ce ma la king ngaila anghawtho te hai khung ö te vi. Äte makäte phüng-a mei nädylä dungtäsa aekang kha hawiky saite vyngsai na nang ma ce tea awng näte nang ce lä mäny ö vi dy.

³⁵ Tukätephüng-a nang ce lä aethawsi ö hang. Tupyng dylä Säthaw ma nang ce tea ävang käleng py ai mang.

³⁶ Nang ce lä änawngsa jawjaw ö hethang aely ngai. Tukä dylä Säthaw üng aely kängai tea sa khüng te kätü-a, äma üng älo aedo saite na tea nang ce lä dang ö ai.

³⁷ Caekäcai thung-a, “Qae y tea ma Areng lä ly ai. Qae y dy lyng.

³⁸ Kai üng khimi käcüng na lä yng saite hai hing ö ai. Tungaila yng saite üng hai leithung mang-a aekö haile tyng saite khimi na tea lä, kai lä ngai y lyng” näkha näpa.

³⁹ Mä-ai lä aekö haile tyng kha Säthaw ma täphra saite khimi na y. Mä-ai lä yng kha Säthaw üng aeqang saite khimi na vi dy.