Filipi 4 - Caekäcai Kangthae (Lemi)

Täru saite lo na

¹ Ngai bärai saite kangby jä-ai na ä, hini cae-a kai ma tärü pyng te kätyng aedawng kha nang ce lä Areng tea yng te cakhi jawjaw ö he kae. Kai üng kangby jä-ai na ä, nang ce lä kai üng bälung aevaw saite na hai aeting haile hethang ngai bärai saite na vi. Nang ce lä kai üng anghawtho te hai kai üng kälu tähang dang saite ävang käting na vi.

² Euodia hai Syntuki ä, nang ni lä Areng hai aesui hawi te phüng-a, lawng lawngtä bälung mangtä aedü hawi hethang nang ni tea kai la mäkai te vi.

³ Honi qawng-a cang y, kai üng ae-yky saite äpy ä, nang la honi nawngmädi ni tea säbawng pa jo ba. Änini lä khimi ce tea Angthang Kähawi thui hethang tähang kai hai mangtä aethawsa bärai hawi saite ni vi. Klement hai kai hai mangtä kälu sa saite äpy kälang na la qa ö by vi. Dungtäsa hing saite na üng ämüng tärü saite Säthaw üng cae-u thung-a äni ce üng ämüng la qa ö te vi.

⁴ Areng hai aesui kha anghawtho ö jawjaw ba. Kai thui tynglyng be ai dy: anghawtho ö.

⁵ Nang ce üng bälung käneng tea khimi angxynlyng na maw-a mätü ö. Areng ly haile he kätü lä aenai dy.

⁶ Ätete hae haetä phüng-a lä bälungbi ö hang. Tungaila aetang te kätü-a, nang ce ngai saite angxynlyng na phüng, Säthaw tea mäkai kha kawng te lo thui ö.

⁷ Tukä dylä nang ce tea Säthaw ma awngneng saite py ai. Honi awngneng saite tea lä khimi ce üng kaedawng hai mäny lei haw te y vi. Nang ce lä Isu Khrista üng khimi na lawng te phüng-a, hini awngneng saite lä nang ce üng bälung hai kaedawng saite na tea rui kha aedung hai pa ö ai mang.

⁸ Kai üng kangby jä-ai na ä, kangkhüng üng thui saite älo lä tüng saite na, khimi ce ma tämö khai he hawi saite na, cüng saite na, cai saite na, khimi ce ma bälung aevaw he hawi saite na, kähawi-a ämüng aethang saite na, hawi phi te na hai bälaw hethang aeteng khaw saite na tea nang ce lä kähawi-a dawng mäsüng hethang kae ö te vi.

⁹ Kai te üng aetu kha dang saite ätete angxynlyng na, kai üng thai saite na hai nung saite cawngkhang na, nang ce lä bäjui ö khü ba. Hokä dylä awngneng te py saite Säthaw lä nang ce hai mangtä awng ai mang.

Pawlae lä dang saite tangkae na phüng-a kawng pa

¹⁰ Kai lä Areng hai aesui saite lawngtä kha tengxyng y anghawtho te vi. Ätephüng-a mei nädylä nang ce lä kätü käqae-a, kai tähang rui pa saite lä mätü haile haw ö te phüng-a vi. Nang ce ma kai tähang rui pa ö jawjaw saite na kai lä mäny vi. Tungaila nang ce lä honi phüng kai tea mätü hethang älang dang ö y.

¹¹ Kai lä aely ngai saite awng y te phüng-a, hini kätyng thui te y lyng. Kai lä äte mani kätyng aeting te läsy, awng kaw hethang aetu khüng te vi dy.

¹² Kai lä aely ngai saite awng y ngaila, awng kaw te kae. Kai ngai te qawng-a kanglai cai-a awng ngaila, kai lä awng kaw vi. Äte makäti amäjy aeting te läsy, kai lä awng kaw hethang aetu pyng te vi dy. Kai lä böjo kawi te läsy, böjo aelang te läsy, ngai te qawng-a cang y kanglai cai-a awng te läsy, ngai te kätyng awng y saite läsy, bälung aebädang haw hethang ho saite amäjy tea aetu pyng te vi dy.

¹³ Kai tea aethaw py saite Khrista hai-a kai lä äte angxynlyng na tea sa haw te vi.

¹⁴ Tungaila kai lä tätang khaw mätang te kätü-a la, nang ce ma kai tea säbawng ö te lä tengxyng y hawi bärai te vi.

¹⁵ Philipi märü üng yng saite khimi na ä, nang ce lä angcü üng Angthang Kähawi tea yng kha kai lä Makedonia khö üng tho te kätü-a, kai tea tangkae hai säbawng saite tea nang ce la mäny ö vi. Khristen kangkawng kälang na lä kai tea honi kätyng säbawng ö te y.

¹⁶ Kai lä Thesalonika märü-a awng te thüng-a, nang ce lä kai tähang qeng netä mäteng ma tangkae tha ö te vi.

¹⁷ Nang ce üng lasawng tea kai lä ngai te y lyng. Säthaw ma nang ce tea ävang py hethang kai lä ngai hai te kae.

¹⁸ Vaihi kai lä nang ce tha saite angxynlyng na dang te vi dy. Kai lä vaihi aely ngai te qawng-a cang y awng vi dy. Nang ce ma Epaprodita te mang hai-a tha saite na kai lä dang vi dy. Honi na lä kai tähang tengxyng y bälai hai mang te vi. Nang ce üng säbawng te lä Säthaw üng maw-a mui üng saite rimui kätyng löci aesa saite na lawng te vi. Honi na lä Säthaw tea kawng hai te vi.

¹⁹ Isu Khrista sa te phüng-a, kai üng Säthaw lä nang ce aely ngai saite angxynlyng na nang ce tähang py vi ai. Säthaw üng tawngnang saite lä tenglei te y vi.

²⁰ Mä-ai üng Pä-ai Säthaw tea dungtäsa bälaw ö si. Amen.

Kangkhüng üng cibai sa te lo

²¹ Isu Khrista tea yng saite Säthaw üng khimi angxynlyng na tea kai ma cibai sa te lo thui dy näkha thui pa ö jo ba. Kai hai mangtä awng saite kangby jä-ai na ma nang ce tea cibai sa te lo na thui ö by vi.

²² Hi-a awng saite Säthaw üng khimi angxynlyng na ma nang ce tea cibai sa te lo na thui ö by. Sica sanphrang ing-a awng saite mawsawng na ma la tengxyng y cibai sa te lo na thui ö by vi dy.

²³ Areng Isu Khrista üng tähang kähawi lä nang ce angxynlyng na tea awng sy.