Filipi 3 - Caekäcai Kangthae (Lemi)

Khristen na üng mawkung

¹ Kai üng kangby jä-ai na ä, Areng hai mangtä awng te phüng-a anghawtho ö. Kai ma tärü pyng saite tea tärü haile tyng be te lä kai tähang bäsae te y lyng. Hini lä nang ce üng yng saite aedung hai hethang tähang kae.

² Säthaw bung mäny y saite na kätyng sa saite na, käsi sa saite na, nawngmäcaw qütä lengkhüng täke hethang kae näkha dawng saite na tea nang ce lä aehi ö.

³ Lengkhüng täke tätang te dang khaw saite na lä äni ce y. Mä-ai kae vi. Ätephüng-a mei nädylä mä-ai lä Säthaw üng Muilaw hai-a Äni tea cäphaw kha Isu Khrista hai bungtä awng ea anghawtho saite na phüng-a vi. Mä-ai lä khimi ce üng sa haw saite na tea äte haetä la ae-y ö te y.

⁴ Tätang khaw, honi amäjy na tea kai lä ae-y haw te vi. Khimi lawngtä lä honi amäjy na tea ae-y haw vi näkha aedawng dylä, kai lä äni qawng-a cang y mäteng ma ae-y rae haw nae awng mangky te vi.

⁵ Kai lä käni täjaetä kätü-a ma lengkhüng täke te vi dy. Kai lä Isrelae khimi Benjamin ceng üng Hebärai khimi nä-awi ni pä-ai te mang aepeng te vi. Judae khimi na üng Ubädi bäjui tea la kheng dylä, kai la Pharisai lawng te vi dy.

⁶ Kai lä Khrista bung yng saite khimi na tea mätang bälai sa te hai Säthaw tähang bälung aepy phi saite khimi vi. Ubädi üng särilo na tängai te mang-a la kai lä cy nae äte haetä la awng te y.

⁷ Tungaila kai ma jangni-a ävang käting khai saite angxynlyng na lä vaihi Khrista üng tähang phüng-a aetütü te na kätyng kai lä dawng te kae vi.

⁸ Hikä cang y kai üng Areng Isu Khrista tea mäny te lä honi ätete angxynlyng na qawng-a ävang tingky te phüng-a, honi na tea lä aetütü saite na kätyng-a kai lä dawng kae. Kai lä Khrista tähang-a äte angxynlyng na tea khaisö pyng te vi dy. Honi angxynlyng na tea kai lä angnüng angsaw kätyng dawng te kae vi dy. Kai lä Khrista bung kähawi-a mäny king haw hethang tähang vi.

⁹ Tukha kai lä äni hai bungtä cung bawi-a awng haw hethang vi. Kai lä Ubädi lo tängai te hai-a kai ma tea khimi käcüng-a bälawng te y vi. Khrista tea yng te hai-a kai lä khimi käcüng-a aelawng te kae. Honi cüng saite lä kai lä Isu tea yng te phüng-a, Säthaw ma kai tea py saite kae vi.

¹⁰ Kai üng ngai saite angxynlyng na lä Khrista tea mäny hethang, äni üng aetha haile saite haidae mäny hethang, äni üng mätang saite na kätyng mätang by hethang hai äni üng dü te kätyng dü te thung-a qa by hethang na vi.

¹¹ Tukä ea ni Säthaw ma kai bung kädü thung üng mätha haile tyng ai näkha kai lä aedawng te vi.

Mawkung-a aehui saite

¹² Kai lä dang bawi vi dy. Sa te khüng bawi vi dy. Cung bawi te vi dy näkha thui te y lyng. Tungaila kai lä Khrista täthei aetawng rae hethang aethaw sa jawjaw te vi. Tukätephüng-a Isu Khrista ma kai bung re te vi.

¹³ Kai üng kangby jä-ai na ä, kai lä Khrista täthei aetawng king vi dy näkha dawng tätang te y lyng. Tungaila kai sa saite haetä lä leithung mang üng na tea khaisö kha ämaw mang üng tyng hethang awng saite na tähang kai lä kähawiky-a aethaw aesa te vi.

¹⁴ Khrista Isu te mang hai-a, Säthaw ma kai bung Känipre-a ka saite lä kai üng ävang käting vi dy. Tukätephüng-a kai lä aethawsa kha aehui jawjaw te vi.

¹⁵ Muilaw Käcai hai-a ryng saite mä-ai angxynlyng na lä hini bälung kaedawng mangtä awng hethang kae. Tungaila nang ce phütä üng bälung kaedawng na kälang-a awng vi dylä, Säthaw ma nang ce tea hini na mäny hai hethang säbawng ö ai mang.

¹⁶ Ätemakä läsy, Säthaw ma mä-ai tea mätü pyng saite kätyng mä-ai lä sa kha awng ö hethang kae.

¹⁷ Kai üng kangby jä-ai na ä, nang ce lä kai kätyng täthei-a sa ö jawjaw jo. Kai ce mätü te täthei hui saite na tea lä kähawi-a kheng ö khü.

¹⁸ Kai ma nang ce tea thui leilae pyng te vi dy. Vaihi kai lä minaw tui rui te hai-a thui haile be dy ba. Khrista üng thinglang qawng-a dü saite üng täre na kätyng-a sa ö mang te vi ba.

¹⁹ Äni ce bung lä kangkhüng käni-a Säthaw ma ngärei thung-a täphra ö vi ai. Ätephüng-a mei nädylä äni ce lä äma ce üng ätabung kängai tähang hing ö te kae. Äni ce lä äma ce üng kaejae sa saite na tea aethaw ö te vi. Äni ce lä hini älawngpre üng aesui saite na tea dawng ö xyng te kae.

²⁰ Tungaila mä-ai lä Känipre üng khimi na vi. Känipre mang mä-ai üng Aeqangkung Isu Khrista ly haile be ai näte tea aethang khai te hai aering ö te vi.

²¹ Äni lä äte angxynlyng na tea pyng hethang haidae awng te vi. Honi aenae hai-a hini älawngpre hai aesui saite mä-ai üng ätabung tea lä äni ma mäqa pa vi ai. Mä-ai üng ätabung kangthae lä Khrista üng ätabung täthei-a aetawng ö vi ai. Honi ätabung kangthae hai-a Säthaw lä äma üng haidae hai phung-ang mätü pa vi ai.