Filipi 2 - Caekäcai Kangthae (Lemi)

Khrista üng bälung kaedawng

¹ Khrista hai-a nang ce lä hing te phüng-a nang ce lä aethaw awng hai ö dy. Äni üng bälung aevaw te phüng-a nang ce lä bälung dang ö dy. Nang ce lä Muilaw Käcai hai mangtä rawijae aesa ö dy. Nang ma ce tingtawi aebäheng te hai bälung aevaw te awng ö dy.

² Tudylä nang ce lä bälung aedü saite bälung aevaw saite bälung kaedawng saite hai mangtä awng te hai-a kai tea tengxyng y kawng anghawtho hai ö ba.

³ Nang ce lä mä-ai ma üng kängai qaitä kaedawng hai aethaw te bälung awng kha äte haetä la sa ö hang. Khimi kälang na lä nang ce qawng-a hawiky näte kaedawng hai bälung aemäneng kha awng ö.

⁴ Nang ma ce ngai saite tähang qaitä dawng te y käla khimi kälang na ngai saite tähang la dawng pa ö jo.

⁵ Isu Khrista kätyng-a nang ce lä bälung kaedawng awng hethang kae.

⁶ Äni lä Säthaw kätyng awng king te vi. Tungaila äni lä Säthaw kätyng aelawng vi näte süng khü hethang aedawng te y.

⁷ Hikä dawng hethang jüng-a äni lä Säthaw hai aetawng saite angxynlyng na tea khaisö kha mawsawng tangnae lawngtä kätyng awng pa vi dy. Äni lä khimi kätyng la aepeng pa vi dy.

⁸ Äni lä khimi kätyng aelawng ea äma ma aemäneng kha, thinglang qawng-a mäteng ma dü te khytä Säthaw üng älo tängai pa te vi.

⁹ Tukätephüng-a Säthaw lä mityng kaesangky-a äni bung mäsang kha, ämüng kälang angxynlyng na qawng-a lengky saite ämüng py pa vi dy.

¹⁰ Hini phüng-a käni älawng hai älawng täkui-a awng saite hing te angxynlyng na ma lä, Isu üng ämaw-a khokhö didü kha tämö khai ö vi ai.

¹¹ Tukha khimi angxynlyng na ma “Isu Khrista lä Areng dy” näkha thui ö bawi vi ai. Tukätephüng-a khimi angxynlyng na ma lä mä-ai üng Pä-ai Säthaw üng phung-ang tea bälaw ö bawi vi ai.

Khristen na lä älawngpre üng kaevang kae

¹² Hokä dylä kai üng yng saite rawijae na ä, kai hai awng te kätü-a nang ce lä kai lo tängai jawjaw te kätyng vaihi kai hai hanglaw ea la älo tängai hethang lä aely lengky rae te vi. Nang ce lä Säthaw tea käsawtho kha ri te hai ma nang ma ce üng aeqang saite cungrü hai hethang aethawsa ö jawjaw ba.

¹³ Ätephüng-a mei nädylä Säthaw lä nang ce üng bälung thung-a kälu sa jaw jaw te vi. Nang ce lä Säthaw üng aely kängai sa hethang hai äni üng kawng saite sa hai hethang äni lä nang ce tea säbawng te vi.

¹⁴ Kälu qütä tea aemaw te lo thui y käla ae-e y te hai ma sa ö.

¹⁵ Tukä dylä nang ce lä cai kha nang ce tea ämi lawngtä ma la cy haw y lyng. Khimi hunghö na hai khimi täphra saite na thung-a Säthaw üng cungrü saite cäpaw cänung na-a nang ce lä lawng ö hethang kae. Nang ce lä älawngpre-a khösang üng tengpaw na aevang te kätyng aevang ö he kae.

¹⁶ Nang ce lä khimi ce tea dungtäsa hing saite angthang thui pa ö. Nang ce hini kätyng cai ö dylä, Khrista ly haile saite Käni-a lä kai la aethaw haw vi ai. Ätephüng-a mei nädylä kai aethawsa kha sa saite lä aetütü y näte nang ce ma mätü ö vi ai.

¹⁷ Nang ce üng yng te lä Säthaw tea löci aesa saite kätyng vi. Khimi ce ma kai bung bädü daila awng ai. Kai üng dü saite lä nang ce üng löci aesa te qawng-a bälawng saite Cäpje thai tui kätyng aelawng haw vi ai. Hini kätyng vi dylä kai lä kawng anghawtho vi ai. Kai lä nang ce angxynlyng hai mangtä kawng anghawtho vi ai.

¹⁸ Hini kätyng nang ce la kai hai mangtä kawng te hai anghawtho ö jo ba.

Timothe hai Epaprodita

¹⁹ Areng Isu ma ngai dylä, qae y tea ma Timothe bung nang ce tea mätaw haw hethang kai aethang khai te vi. Tukä dylä kai lä nang ce üng angthang thai te hai-a aethaw dang haw vi ai.

²⁰ Kai üng bälung kaedawng hai aedü saite Timothe lawngtä xyng ni awng te kae. Äni lä nang ce bung tätang khaw-a rui saite khimi vi.

²¹ Khimi qütä lä Isu Khrista üng tähang aely leng saite phüng dawng y käla ma äma ce üng tähang aely leng saite na phüng xyng ni dawng ö te kae vi.

²² Timothe lä yng te cakhi te phüng mätü te nang ce lä mäny ö te vi dy. Äni hai kai lä mangtä äcäpaw hai äpä-ai kätyng Angthang Kähawi khimi ce thai hai hethang kälu sa hawi te vi.

²³ Tukätephüng-a kai tea makä tyng ai mei näte mäny te hai lä äni bung mätaw praw hethang kai lä aedawng te vi ba.

²⁴ Kai ma khekhe lä qae y tea ma nang ce tea ly haw hethang Areng tea kai lä ae-y te vi.

²⁵ Kai hai mangtä kälu sa saite kai üng kangby Epaprodita bung nang ce tea mätaw he aely ngai näte kai lä aedawng vi dy. Äni lä kai hai mangtä täre tea aety kha kai tea säbawng hethang nang ce ma mätaw saite nang ce üng angtawtha lawngtä vi.

²⁶ Äni lä nang ce angxynlyng tea aeting hethang ngai bärai te vi. Äni üng naw te angthang nang ce ma thai ö te phüng äni ma mäny ea lä nang ce angxynlyng tea ämaw aedawng kha bälung hawi y tyng te by vi.

²⁷ Tätang äni lä dü pheng-a naw khaw te vi. Tungaila Säthaw ma äni tea bäheng te vi. Äni tea qaitä bäheng te kae y, bälung mawng te qawng-a mawng rae y hethang kai tea la bäheng te by vi.

²⁸ Nang ce lä äni bung nung haile dylä, kawng ö tyng ai näte hai kai ma üng bälung mawng saite na la haw by ai näte phüng-a vi. Tukätephüng-a äni bung nang ce tea mätaw hethang kai lä tengxyng y ngaiphi te vi.

²⁹ Nang ce lä äni bung Areng tea yng saite khimi lawngtä kätyng kawng anghawtho te hai ma lady ö ba. Honi kätyng khimi angxynlyng na tea lä tämö khai ö.

³⁰ Äte makäte phüng-a mei nädylä äni lä Khrista üng kälu tähang dü aenai rung khytä sa te vi. Kai tea nang ma ce khekhe säbawng haw y saite na tea la äni lä säbawng te vi ba.