Filipi 1 - Caekäcai Kangthae (Lemi)

¹ Pawlae hai Timothe ni lä Isu Khrista üng mawsawng na vi. Kai, Pawlae, ma Philipi märü-a awng saite Säthaw üng khimi na hai kangkawng üng mätawngky na hai kangkawng-a säbawng saite khimi na tea cae tärü dy.

² Mä-ai üng Pä-ai Säthaw hai Areng Isu Khrista ma nang ce tea tähang kähawi hai awngneng saite py sy.

Kangkawng tähang Pawlae ma aetang pa

³ Kai lä nang ce tea aedawng te kätü qütä kai üng Säthaw tea kawng te lo thui te vi.

⁴ Nang ce angxynlyng tähang aetang te qütä kai lä kawng anghawtho te hai aetang pa dy.

⁵ Ätephüng-a mei nädylä, nang ce lä Angthang Kähawi yng te käni üng hai vaini khytä, Angthang Kähawi hi saite kai tea säbawng ö te phüng-a vi.

⁶ Nang ce thung-a hini kälu kähawi aetawng hai saite Säthaw lä Isu Khrista ly haile te käni tyng y rytä, hini kälu tea khüng rung khytä sa vi ai näte kai lä ae-y khü te vi.

⁷ Nang ce tea kai lä tengxyng y bälung aevaw te vi. Tukätephüng-a nang ce angxynlyng üng phüng hikä bälung dawng hethang kai tähang lä aesyng khaw te vi. Ätephüng-a mei nädylä vaihi kai lä thawng thung-a awng te kätü-a läsy, aelawi te kätü-a läsy, Angthang Kähawi kätüng thui mäcai hethang läsy, nang ce angxynlyng lä kai hai mangtä Säthaw üng tähang kähawi na thung-a qa ö te vi dy.

⁸ Isu Khrista ma kai tea py saite bälung aevaw te hai-a nang ce angxynlyng bung mätangtä bälung aevaw kha aeting hethang ngai mei näte Säthaw lä mäny te vi.

⁹ Nang ce üng bälung aevaw saite hai bälungkähae hai kätüng mäny saite thung-a ryng rae ryng rae hethang tähang kai lä aetang te vi.

¹⁰ Tukätephüng-a nang ce lä kähawiky saite re haw ö ai. Tukha Khrista tyng haile saite käni-a, nang ce lä cai kha khimi ce ma cy haw ö y ai mang.

¹¹ Isu Khrista ma nang ce tea cüng hai te phüng-a, nang ce lä kälu kähawi na sa haw ö vi ai. Tukätephüng-a khimi ce lä Säthaw üng phung-ang tea bälaw ö ai.

Thawng thung üng Säthaw mawsawng

¹² Kai üng kangby jä-ai na ä, kai aeting saite amäjy na phüng-a khimi nyng nyng na lä Angthang Kähawi thai hai te vi näte kai lä nang ce tea mäny hai hethang ngai te vi.

¹³ Tukätephüng-a kai lä Khrista üng mawsawng lawng te phüng-a, thawng-a awng näte sanphrang ing bung rui saite reisae angxynlyng na hai khimi qütä ma lä mäny ö bawi te vi.

¹⁴ Areng tea yng saite känawiky na ma lä kai thawng-a awng te phüng-a aethaw dang ö kha Khrista phüng khimi ce tea thui ö vawng rae pa vi dy.

¹⁵ Khimi phütä na ma lä kai tea pä-e kha aejaw aemang hethang kängai hai Khrista üng angthang thui tätang ö te vi. Tungaila kälang phütä na ma lä bälung kähawi hai-a thui ö dy.

¹⁶ Kai tea bälung aevaw ö te phüng-a thui ö dy. Kai lä Angthang Kähawi tea aekung hai hethang Säthaw lä kai bung thawng thung-a khai te äni ce lä mäny ö vi.

¹⁷ Kälang phütä na ma lä Khrista üng phüng tea pä-e te bälung hai äni ce lä äma ce ämüng hawi hethang tähang-a thui ö te vi. Äni ce lä thawng thung-a awng saite kai bung mätang hai rae he ngai te kaedawng hai thui ö te vi.

¹⁸ Hawi mang. Tämang te kaedawng hai läsy, aesyng te kaedawng hai läsy, Angthang Kähawi lä thui mai sy. Khrista üng angthang thui pa te phüng-a kai lä kawng anghawtho vi. Tukä cang y kai lä kawng anghawtho jawjaw vi ai.

¹⁹ Ätephüng-a mei nädylä, nang ce ma aetang ö pa te phüng-a hai Isu Khrista üng Muilaw ma säbawng te phüng-a Säthaw ma kai bung aeqang vi ai näte kai lä mäny te vi.

²⁰ Kai lä manila saerae te awng y lyng näkha aethang khai te vi. Kätü qütä vaihi üng hai dung jungtä kai lä aethaw hawi te hai hing ea läsy, dü ea läsy, Khrista üng phung-ang leng hai hethang aethang khai te vi.

²¹ Ätephüng-a mei nädylä kai tähang-a hing te lä Khrista vi. Dü ea la hawi rae kae.

²² Tungaila kai ma hing jawjaw dylä ävang ting saite kälu na sa haw rae vi ai. Tukätephüng-a hing hethang hai dü hethang thung-a manita tea re ai mei näte kai lä mäny y.

²³ Kai lä bälung kaedawng känetä awng vi dy. Kai lä vaihi hing te tea lä khaisö kha Khrista hai mangtä awng hethang ngai te vi. Hini kätyng kai tähang lä hawiky te vi.

²⁴ Tungaila nang ce tähang-a kai hing jawjaw saite lä aely lengky rae vi.

²⁵ Hikä ae-y kha nang ce üng yng saite hai kawng anghawtho saite leng rae he säbawng hethang kai lä hing jawjaw vi ai. Kai lä nang ce hai mangtä awng jawjaw ai näte mäny vi.

²⁶ Kai lä nang ce hai mangtä awng haile be te phüng-a nang ce lä Khrista Isu tea kawng anghawtho ö bärai vi ai.

²⁷ Nang ce lä Khrista üng Angthang Kähawi yng saite tähang kaebäla-a awng hethang lä tätang aely leng te vi. Tukätephüng-a nang ce tea kai aeting haw y kha hanglaw mang nang ce üng angthang thai te läsy, aeting haw y te läsy, nang ce lä bälung mangtä aedü kha aedaw ö haw te kai lä mäny vi ai. Nang ce angxynlyng Angthang Kähawi üng yng saite tähang phüng-a aethaw mangtä aesa ea aety ö näte kai lä mäny vi ai.

²⁸ Nang ce tea elekhei sa saite khimi na tea lä ri ö y ma. Säthaw ma äni ce tea täphra kha nang ce tea la aeqang vi ai näte nang ce ma äni ce tea hini kätyng mätü ö vi ai.

²⁹ Nang ce lä Khrista tea yng te cang y äni tähang mätang hethang Säthaw ma khai te vi.

³⁰ Kai lä Angthang Kähawi tähang täre aety te phüng nang ce lä nung vai ö te vi. Vaihi la kai lä täre aety jawjaw te phüng, nang ce lä thai ö te vi. Vaihi nang ce la honi täre aety te thung-a qa ö te by vi dy.