Filemon 1 - Caekäcai Kangthae (Lemi)

¹ Isu Khrista üng Angthang thui te phüng-a, thawng thung-a pä-ung hethang kae saite kai, Pawlae, hai mä-ai üng äpy Timothe lä kai ce kätyng Khrista tähang kälu sa saite rawijae ma nang Philemon tea cae tärü te dy.

² Mä-ai üng ticaw kätyng awng saite Aphi hai mä-ai hai mangtä täre tea aety saite Akhipa hai nang üng ing-a aekäcö saite Khristen kangkawng tea la kai ni cae tärü te vi dy.

³ Mä-ai üng Pä-ai Säthaw hai Areng Isu Khrista lä nang ce tea tähang kähawi hai awngneng saite py sy.

Philemon üng bälung aevaw te hai yng saite

⁴ Kai lä nang Philemon tähang aetang te qütä kai üng Säthaw tea kawng te lo thui jawjaw te vi.

⁵ Ätephüng-a mei nädylä nang lä Areng Isu tea yng te hai Säthaw üng khimi na tea la bälung aevaw näte thai te phüng-a vi.

⁶ Kai aetang te lä nang lä Areng Isu tea yng saite khimi ce hai rawijae aesa te phüng-a, Säthaw lä mä-ai tea Khrista üng phüng-a py saite kähawi angxynlyng na tea mäny hai king haw vi ai.

⁷ Äby ä, nang lä khimi ce tea bälung aevaw te phüng-a, kai lä anghawtho bärai te hai aethaw dang dy. Nang lä Säthaw üng khimi na tea aethaw py te phüng-a vi.

Onesimae tähang thui pa te

^8-9 Hokäte phüng-a kai lä nang tea kähawi haetä sa hai hethang tähang mäkai he ngai te vi. Kai lä Khrista üng aenae hai nang tea kälu mätaw hethang dang haw te vi. Tungaila nang hai kai lä lawngtä tea lawngtä bälung aevaw saite awng te phüng-a, nang tea mäkai hethang ngai te vi. Kai, Pawlae, lä vaihi mätawng kha Isu Khrista üng kälu sa te phüng-a, thawng thung mang awng kha nang tea lä mäkai hethang ngai te vi.

¹⁰ Kai üng cäpaw kätyng-a lawng saite Onesimae tea nang ma säbawng pa hethang kai lä mäkai te vi. Kai lä thawng thung-a awng te thüng-a, Onesimae bung Khrista tea yng hethang säbawng te phüng-a, äni üng äpä-ai kätyng lawng te vi dy.

¹¹ Jangni-a äma lä nang üng tähang äte haetä la tawng hethang dang te y. Vaihi lä mä-ai ni üng tähang tawng hethang dang lae vi dy.

¹² Kai üng bälung aevawky saite Onesimae bung lä nang tea kai mätaw tyng te dy ba.

¹³ Isu Khrista üng Angthang Kähawi thui te phüng-a, thawng thung-a pä-ung te thüng-a, kai tea säbawng hethang äni bung kai lä khai jawjaw he ngai te vi. Äni lä nang üng jüng-a kai tea säbawng haw te vi dy.

¹⁴ Tungaila kai lä nang bälung aengai y dylä, Onesimae bung hi-a khai y lyng. Nang lä kai tea bälung kähawi hai säbawng hethang ngai hai ky te vi. Kai ma kälu mätaw te y käla ma säbawng saite tea kai lä ngai te vi.

¹⁵ Nang hai mangtä awng jawjaw hethang tähang-a, Onesimae lä nang hai tänaetä aeprei te daila awng ai.

¹⁶ Vaihi üng hai aetawng kha äni lä nang üng mawsawng lawng te cang y, äni lä mawsawng qawng-a aesangky te vi dy. Äni lä vaihi nang bälung aevaw hethang kae saite Khristen kangby lawngtä-a aelawng te vi dy. Kai la äni tea tengxyng y bälung aevaw te vi. Nang lä äni tea kai qawng-a cang y, mäteng ma bälung aevaw hethang hawi te by vi. Ätephüng-a mei nädylä äni lä nang üng mawsawng la vi. Khristen kangby la vi dy.

¹⁷ Tukätephüng-a nang lä kai bung kälu sa te rawijae tätang näkha dawng dylä, kai tea bälung anghawtho bärai te hai lady te kätyng Onesimae bung la lady hethang kae te by vi.

¹⁸ Äni lä nang tea sa tämang saite hae haetä awng law dylä, y käla nang tea kälai hung hethang awng law dylä, kai ma hung haile tyng pa ai mang.

¹⁹ Onesimae ma py hethang awng saite lä kai, Pawlae, ma py haile tyng ai mang näte kai üng kö hai nang tea cae tärü te vi ba. Nang lä kai phüng-a dungtäsa hing saite dang te hai kai tea kälai awng vi näte tämang hang ba.

²⁰ Kai üng kangby ä, Areng üng phüng-a kai mäkai saite na nang lä sa pa khü jo. Mä-ai ni lä Khrista hai aesui hawi te phüng-a, kai üng bälung anghawtho hai kü jo ba.

²¹ Kai cae tärü kha mäkai saite na qawng-a cang y nang lä sa pa ai näte kai lä ae-y khü te vi. Kai mäkai te qawng-a cang y nang sa pa ai näte kai lä mäny dy.

²² Kai thui hethang vaihi haetä awng vi rawng. Kai aehae hethang tähang nang üng ing-a awng nae haetä khai rüng pa kü ba. Nang ce ma aetang pa saite na phüng-a, Säthaw lä kai tea nang ce hai aeting hethang py ai näte kai lä aethang khai te vi.

Pawlae üng kawng bärai sa saite älo

²³ Isu Khrista üng Angthang Kähawi thui te phüng-a, kai hai mangtä thawng thung-a pä-ung saite Epaphra la nang tea kawng bärai sa te lo thui te by vi.

²⁴ Kai hai kälu sa saite äpy na Marka, Aristaku, Dema hai Luka ce ma la nang tea aedawng ö te by vi.

²⁵ Areng Isu Khrista lä nang ce angxynlyng tea tähang kähawi py jawjaw sy, Amen.