Ephesi 5 - Caekäcai Kangthae (Lemi)

Kaevang-a hing saite

¹ Nang ce lä Säthaw ma bälung aevaw bärai saite äma üng caw nade na vi te phüng-a, äma kätyng täthei-a awng hethang aethawsa ö.

² Khrista lä mä-ai tea bälung aevaw kha mä-ai tähang dü pa te kätyng-a khimi kälang na tea la bälung aevaw ö lawi. Khrista lä äma üng hing saite lä löci aesa hethang Säthaw tea py pa te vi dy. Honi löci lä Säthaw tähang ämui hawi te vi.

³ Nang ce thung-a täkü bäjang sa saite na, cai y saite na, ae-aw saite bälung na phüng cy nae awng y hethang kae. Hini na lä Säthaw üng khimi käcai na hai aeteng khaw te vi.

⁴ Paesu paenai phüng na, rang saite lo na hai aenui aepai-a käcai y thui saite lo na la nang ce lä aepe ö hang. Hini na lä nang ce thui hethang hawi saite lo na y vi. Hini jüng-a Säthaw tea kawng saite älo na phai thui ö kae.

⁵ Täkü bäjang sa saite khimi na, cai y saite na, ae-aw te bälung awng saite na lä Säthaw hai Khrista üng pre-a kung haw y lyng näte nang ce lä mäny hethang kae. Ae-aw te bälung awng saite na lä mimi tea cäphaw te kätyng by vi.

⁶ Älo pawngpang na hai-a nang ce tea kaeling kaemae sa te na tea lä yng ö hang. Äqawng-a thui saite na kätyng hunghö na sa te phüng-a, Säthaw ma äma üng lo tängai y saite na tea lä qae y tea ma dengpy vi ai.

⁷ Tukätephüng-a nang ce lä hini khimi ce üng hunghö sa saite na thung-a qa ö hang.

⁸ Jangni-a nang ce lä käving thung-a awng ö vai saite na vi. Tungaila vaihi lä Säthaw üng khimi-a aelawng kha kaevang-a awng ö te na vi dy. Tukätephüng-a nang ce lä kaevang-a awng saite khimi na kätyng sa ö.

⁹ Ätephüng-a mei nädylä, nang ce thung-a awng saite kaevang lä nang ce tea hawi saite na, cüng saite na hai mitang khaw saite na sa hai ö te vi.

¹⁰ Säthaw üng kawng hai saite na äte mei näte tea lä aetu ö.

¹¹ Käving thung-a awng saite khimi na lä ävang käting y sa ö te vi. Nang ce lä äni ce üng sa saite na thung-a qa ö hang. Honi jüng-a hikä käsi sa saite na tea lä täphawng pa ö.

¹² Säthaw üng lo tängai y saite na lä kangru-a sa saite na phüng thui hethang mäteng ma saerae he hawi te vi.

¹³ Kaevang tho te kätü-a, hawi y saite na tea khimi ce lä nung haw ö king vi ai.

¹⁴ Ätephüng-a mei nädylä, kaevang lä äte angxynlyng na tea täphawng king pa te vi. Tukätephüng-a khimi ce ma ae-awi hai thui ö te lä, “I saite ä, i aelaw lawi. Dü saite ä, aetha lawi. Khrista üng kaevang lä nang tea aevang vi ai” näkha nä vi.

¹⁵ Tukätephüng-a nang ce üng sa saite na tea lä sädi khai ö. Khimi kaerö na kätyng y käla bälunghae saite na kätyng sa ö lawi.

¹⁶ Vaini kätü-a khimi ce lä käsi sa phi te phüng-a, nang ce üng sa haw te kätü-a kähawi sa ö lawi.

¹⁷ Tukätephüng-a nang ce lä khimi kangthö na-a lawng y käla, Säthaw üng aely kängai na mäny hethang aethawsa ö lawi.

¹⁸ Nang ce üng aeme aeqa te tea pra hai saite jö na tea lä nei ngae ö hang. Honi jüng-a Muilaw Käcai üng haidae lä nang ce tea pyng jawjaw sy.

¹⁹ Lawng lawngtä tea Sam ae-awi na, Säthaw tea bälaw saite ae-awi na hai Säthaw üng Angthang hai ae-awi na thui ö. Nang ce üng bälung mäke angxynlyng na hai ätüng ätang na hai Säthaw tea bälaw ö.

²⁰ Mä-ai üng Areng Isu Khrista ämüng hai-a äte angxynlyng na tähang mä-ai üng Pä-ai Säthaw tea kawng te lo thui ö jawjaw ba.

Nawngpui hai nawngpaw

²¹ Nang ce lä Khrista tea tämö khai te phüng-a, nang ma ce tingtawi üng älo na aetängai ö.

²² Nawngpui na ä, nang ce lä Areng üng pyng saite täkui-a awng te kätyng, änawngpaw na üng täkui-a awng ö.

²³ Isu Khrista lä kangkawng üng älö-a aelawng te kätyng nawngpaw lä änawngpui üng älö kätyng-a aelawng te vi. Khrista lä äma üng ätabung kätyng lawng saite kangkawng tea aeqang te vi.

²⁴ Nawngpui na ä, honi kangkawng lä Khrista üng pyng saite täkui-a awng te kätyng-a, äte angxynlyng na-a nang ce lä änawngpaw üng pyng saite täkui-a awng ö.

²⁵ Nawngpaw na ä, Khrista lä kangkawng tea bälung aevaw kha kangkawng tähang dü hai pa te kätyng, änawngpui tea bälung aevaw hethang kae te by vi.

²⁶ Mä-ai tea cai hai hethang Khrista lä hikä sa te vi dy. Tui hai-a mäse te kätyng-a Säthaw üng lo hai Khrista lä kangkawng tea mäcai te by vi dy.

²⁷ Areng lä äma üng kangkawng tähang dü pa te vi dy. Tukätephüng-a äni lä äma üng kangkawng angxynlyng na tea ämaw äcae hawi hai bawi kha äma üng maw-a nähai bawi haw te vi dy. Hikä sa te phüng-a äma üng kangkawng lä khimi üng mimai kätyng aeje te, pawprae te la awng y vi ai dy. Honi kangkawng lä caiping kha cungrü bawi vi ai.

²⁸ Hini kätyng-a nawngpaw lä äma üng ätabung tea bälung aevaw te kätyng-a änawngpui tea la bälung aevaw hethang kae. Änawngpui tea bälung aevaw saite lawngtä lä äma tea bälung aevaw te vi.

²⁹ Ämi la mä-ai ma üng ätabung tea lä esäre te y. Honi jüng-a Khrista lä kangkawng tea rui te kätyng-a äni lä äma üng ätabung tea rui kha mäcaw te by vi.

³⁰ Mä-ai angxynlyng na lä Khrista üng ätabung kaepreng na vi.

³¹ Tukha Caekäcai thung-a “Nawngmäcaw lä nä-awi pä-ai ni bung khaisö kha nawngpui hai aepawng ea awng hawi te vi. Tudylä änini lawng netä lä bungtä-a lawng vi ai” näkha nä vi.

³² Hini lä ho saite älo käleng vi. Tungaila kai lä Khrista hai kangkawng aesui saite phüng nang ce tea thui te vi.

³³ Tudylä nawngmäcaw qütä lä äma tea bälung aevaw te kätyng änawngpui tea la bälung aevaw hethang kae. Nawngpui qütä la änawngpaw tea tämö khai hethang kae.