Ephesi 2 - Caekäcai Kangthae (Lemi)

Säthaw lä mä-ai tea hing saite kangthae py pa

¹ Jangni-a nang ce lä Säthaw üng lo tängai ö y kha hunghö sa te phüng-a, khimi kädü na kätyng vi dy.

² Nang ce lä hini älawngpre üng khimi na kätyng hunghö sa ö te vi dy. Khösang-a awng kha haidae awng te angra na bung pyng saite Setan angra tea hui ö vi dy. Hini Setan angra lä Säthaw lo tängai y saite khimi na bung hawi y saite mang-a bähawi jawjaw vi.

³ Jangni-a Khrista tea yng y te kälang-a, mä-ai angxynlyng na lä hini kätyng awng ö te by vi. Mä-ai üng ngaiphi tüng y saite hai hawi y kaedawng saite na tea mä-ai lä hui ö vi dy. Mä-ai la hunghö sakaw saite khimi-a aepeng te phüng-a khimi kälang na kätyng Säthaw üng dengpy hethang aeteng khaw te na by vi.

⁴ Tungaila Säthaw lä mä-ai bung bälung aevaw phi kha mä-ai tea lä bäheng bärai te vi.

⁵ Tudylä mä-ai lä Säthaw üng lo tängai y te phüng-a dü saite khimi na kätyng awng te kätü-a, äni ma mä-ai bung lä Khrista hai mangtä hing hai te vi dy. Säthaw lä tähang kähawi hai-a nang ce bung aeqang te vi dy.

⁶ Säthaw lä mä-ai bung Isu Khrista hai mangtä kädü thung üng mätha ea Känipre-a Khrista hai mangtä aety kha pyng hai te vi. Mä-ai lä Khrista hai bungtä te phüng-a Säthaw lä hikä sa te vi dy.

⁷ Ätephüng-a mei nädylä äni lä vaimaw mang üng khimi na tea Säthaw üng tähang kähawi leng bärai saite mäteng ma mätü haw hethang tähang vi. Säthaw üng tähang kähawi lä äte kälang angxynlyng na qawng-a lengky te vi. Äni lä mä-ai hai Isu Khrista tea bungtä bälawng te hai-a äma üng tähang kähawi leng bärai saite mä-ai tea mätü te vi dy.

⁸ Khrista tea yng te phüng-a äma üng bäheng saite hai-a, Säthaw ma nang ce bung aeqang vi dy. Nang ce üng aethawsa saite phüng-a, äni lä nang ce bung aeqang te y. Äni lä nang ce bung äjawng-a aeqang te vi.

⁹ Nang ce ma kähawi sa phüng-a, Säthaw lä nang ce bung aeqang te y lyng. Tukätephüng-a ämi la aethaw haw y lyng.

¹⁰ Säthaw lä mä-ai bung khimi kangthae kätyng-a sa te vi dy. Mä-ai lä hawi saite kälu na sa hethang Isu Khrista hai bungtä-a lawng hai te vi. Honi hawi saite kälu na lä jangni-a Säthaw üng mawlang kaedawng kätyng sa te vi dy.

Khrista hai-a bungtä lawng saite

¹¹ Nang ce lä Judae ceng thung üng aepeng saite na y. Nang ce makä awng mei näte aedawng haile ö ba. Judae khimi na lä lengkhüng täke ö te vi. Nang ce tea lä lengkhüng täke y saite khimi na näkha nä ö te vi. Lengkhüng täke te lä khimi ce üng äkö hai sa saite ätabung ärang mang üng äsäny kae.

¹² Jangni-a nang ce lä Khrista hai aesui ö te y. Nang ce ceng kälang na lä Isrelae khimi thung-a qa ö te y vi. Säthaw ma Isrelae khimi na hai mangtä älo aenai saite na thung-a nang ce lä qa ö y vi. Tukätephüng-a nang ce lä Säthaw tea mäny y te hai aethang khai te awng y käla ma hini älawngpre-a awng ö te vi.

¹³ Jangni-a nang ce lä Säthaw hai hanglaw ngaila vaihi lä Isu Khrista hai bungtä awng ö te vi dy. Säthaw lä Isu Khrista üng äthi hai-a äma teng-a nang ce bung nähai te vi dy.

¹⁴ Khrista äma khekhe lä Judae na hai ceng kälang na säla-a aede nae sa pa vi dy. Jangni-a Judae khimi na hai ceng kälang na lä aekäsi ö tingtawi te vi. Hini lä äni ce säla-a baesung kätyng awng te vi. Khrista ma honi baesung bung täphra kha ceng känetä tea lä ceng haetä-a bälawng pa vi dy.

¹⁵ Khrista ma Judae na üng reitae hai ubädi na tea äma üng dü saite hai-a aenae awng y rung khytä sa pa vi dy. Äni üng mawlang kaedawng lä Judae khimi na hai ceng kälang na tea äma hai bungtä lawng hai kha ceng kangthae haetä-a bälawng pa vi dy. Hini kätyng sa te hai-a ceng känetä tea lä aede hai pa vi dy.

¹⁶ Khrista lä thinglang qawng-a dü te hai-a, Judae na hai ceng kälang na tea aede haile tyng hai pa vi dy. Änini tea ätabung haetä-a bälawng kha Säthaw üng äpy-a aelawng hai pa vi dy. Vaihi änini lä äma ni tingtawi aekäsi hawi te y vi dy.

¹⁷ Khrista ly kha jangni-a Säthaw hai hanglaw-a awng saite nang ce ceng kälang na hai kaenai-a awng saite kai ce Judae na tea lä awngneng saite Angthang Kähawi thui te vi dy.

¹⁸ Khrista phüng-a nang ce hai kai ce lä haetä saite Muilaw Käcai hai-a mä-ai üng Pä-ai Säthaw tea ly haw te vi.

¹⁹ Tukätephüng-a ceng kälang nang ce lä pre kälang üng khimi na kätyng y vi dy. Angvüng angvaw kätyng la y. Nang ce lä Säthaw üng khimi na hai mangtä, märü haetä üng khimi na kätyng aelawng ö by dy. Säthaw üng engthung khaw üng khimi na by vi dy.

²⁰ Nang ce la angtawtha na hai buisaw na üng aenyng nae qawng-a sa saite ing haetä kätyng vi. Isu Khrista äma lä ing tähang aely lengky saite ing aeling kätyng vi.

²¹ Khrista hai-a ing angxynlyng na lä mangtä aesätawng bawi te vi. Äni phüng-a ing lä sang hai rae te vi. Tukätephüng-a honi Ing lä Areng tähang ingkäcai-a aelawng te vi.

²² Nang ce la Khrista hai bungtä lawng te phüng-a, äni lä nang ce hai aesätawng te by vi dy. Tukätephüng-a nang ce lä Säthaw üng Muilaw Käcai hai-a äni üng aeta nae-a aelawng ö vi dy.