Ephesi 1 - Caekäcai Kangthae (Lemi)

Angcü üng kawng saite lo

¹ Kai, Pawlae, ma Ephesi märü-a awng saite Säthaw üng khimi na tea cae tärü te dy. Isu Khrista üng angtawtha lawngtä-a khai hethang lä Säthaw üng aely kängai vi. Nang ce lä Isu Khrista hai bungtä awng kha äni tea yng ö jawjaw saite na vi.

² Mä-ai üng Pä-ai Säthaw hai Areng Isu Khrista ma nang ce tea tähang kähawi hai awngneng saite py sy.

Khrista hai-a dang saite tähang kähawi na

³ Mä-ai üng Areng Isu Khrista üng Pä-ai Säthaw tea bälaw ö si. Äni lä Khrista hai-a mä-ai tähang Känipre-a Muilaw Käcai aesui saite üng tähang kähawi angxynlyng na py vi.

^4-5 Hini khölawng pre sa y te kälang üng hai ma mä-ai bung lä Khrista phüng-a re pyng te vi dy. Mä-ai bung lä äni üng maw-a caiping kha cy haw y hethang re te vi dy. Säthaw lä mä-ai tea bälung aevaw kha Isu Khrista ma sa pa saite hai-a äma üng caw nade na kätyng bälawng hai hethang aedawng rüng te vi dy. Säthaw ma hikä sa te lä äma kawng hethang äma üng aely kängai vi.

⁶ Säthaw üng leng bärai saite tähang kähawi phüng-a mä-ai lä äni tea bälaw hethang kae te vi. Äma üng bälung aevawky saite Cäpaw üng sa te phüng-a, äni lä mä-ai tea hini tähang kähawi mäsai y käla py pyng te vi dy.

^7-8 Isu Khrista üng dü saite hai äthi phüng-a Säthaw lä mä-ai üng hunghö na bälawi kha mä-ai bung lawi hai te vi dy. Säthaw üng tähang kähawi lä tengxyng y leng bärai vi. Äni lä tähang kähawi hai-a mä-ai tea bälung kähae py kha äte angxynlyng na tea mäny hai king te vi dy.

⁹ Säthaw lä äma üng ho saite aely kängai mä-ai tea täphawng pa te vi dy. Äni lä honi ho saite mawlang kaedawng tea Khrista hai-a sa king hethang aedawng rüng te vi dy.

¹⁰ Khai rüng saite kätü tyng khaw tea äni ma Känipre-a hai älawngpre-a awng saite angxynlyng na tea lä Khrista üng aenae täkui-a mangtä khai ö ai näsaite lä äni üng mawlang kaedawng vi.

¹¹ Säthaw lä mä-ai bung Khrista hai bungtä awng hethang re te by vi. Jangni-a ma honi tea sa hethang äni lä aedawng rüng te phüng-a, mä-ai bung re te vi dy. Äte angxynlyng na tea lä äma üng mawlang kaedawng kätyng sa te vi.

¹² Khrista tea yng angcü saite na lä mä-ai Judae khimi na vi. Tukätephüng-a mä-ai lä Säthaw üng phung-ang käleng phüng-a äni tea bälaw ö vi ai.

¹³ Vaihi nang ce la aeqang saite Angthang Kähawi, lo mitang tea lä thai ö pyng te by vi dy. Nang ce lä Khrista tea yng kha äni hai bungtä awng ö te vi dy. Äni hai bungtä te phüng-a Säthaw lä älo aedo saite kätyng Muilaw Käcai bung nang ce tea py vi dy. Hini Muilaw Käcai lä nang ce tea Säthaw üng khimi vi näkha mätü saite äsäny vi dy.

¹⁴ Mä-ai lä Muilaw Käcai bung dang te phüng-a, Säthaw lä äma älo aedo saite kähawi na py ai näte mä-ai lä mäny haw khaw ai. Säthaw lä äma üng khimi lawng saite mä-ai bung aeqang king hethang kätü-a, äni lä mä-ai tea tähang kähawi na py king vi ai. Säthaw lä leng bärai te phüng-a äni tea mä-ai lä bälaw ö si.

Pawlae üng aetang pa saite

¹⁵ Areng Isu tea nang ce üng yng saite hai Säthaw üng khimi angxynlyng na tea nang ce ma bälung aevaw saite phüng na kai ce lä thai vi dy.

¹⁶ Tukätephüng-a nang ce tähang kai lä Säthaw tea kawng te lo thui kha aetang jawjaw te vi.

¹⁷ Kai lä mä-ai üng Areng Isu Khrista üng Säthaw, phung-ang aesang saite Pä-ai, tea aetang te vi. Nang ce tea Muilaw Käcai üng bälunghae saite hai täphawng saite py hethang äni tea kai lä aetang te vi. Nang ce lä äni tea mäny ö rae ai mang.

¹⁸ Äni lä lo mitang tea nang ce mänykaw hethang säbawng ai näte kai lä aetang te by vi. Tudylä nang ce bung ka te kätü-a, aedo kha aethang khai saite tea nang ce lä mäny ö ai. Äma üng khimi na tea py hethang älo aedo saite tähang kähawi käleng na nang ce mäny ö by hethang kai lä aetang te vi.

¹⁹ Äte angxynlyng na qawng-a awng saite äni üng haidae nang ce mäny hethang kai lä aetang te by vi. Hini haidae lä yng saite mä-ai üng bälung tea mäqa te vi.

²⁰ Hini haidae käleng hai-a Säthaw lä Khrista bung kädü thung üng mäning haile kha Känipre äma üng bangtang mang-a aety hai pa vi dy.

²¹ Haidae leng saite angra na hai Säthaw üng angtawtha angxynlyng na qawng-a lä aesangky saite Khrista ma pyng te vi dy. Äni üng ämüng lä haidae awng te sanphrang hai mätawngky angxynlyng na üng ämüng na qawng-a lengky vi. Vaihi pyng te mätawngky na tea qaitä cang y, vaimaw mang üng mätawngky na qawng-a la äni üng aenae lä lengky vi.

²² Säthaw lä äte angxynlyng na tea Khrista üng äkho täkui-a khai pa vi dy. Yng saite kangkawng angxynlyng na qawng-a älö kätyng äni bung khai pa vi dy.

²³ Yng saite kangkawng lä Khrista üng ätabung kätyng vi. Kangkawng lä Khrista üng hing saite hai kawi te vi. Khrista lä mityng qütä-a awng te angxynlyng na tea kähing py saite Kung vi.