Angtawtha 4 - Caekäcai Kangthae (Lemi)

Peterae ni Johan bung thawng thung-a khai pa

¹ Peterae ni Johan lä khimipui na tea älo thui saite kätü-a mäthykung na, Säthaw üng Ingkäcai ty saite na üng mätawngky hai Sadukai na lä tyng ö by vi.

² Angtawtha na lä khimi ce tea mätü kha Isu dü te üng aetha saite phüng na thui pa te phüng-a, mätawngky na lä kädawtho pa ö vi dy.

³ Äni ce lä Peterae ni Johan bung ne kha vaihi lä kädüng te phüng-a, kädang khytä thawng thung-a khai pa vi dy.

⁴ Tungaila angthang thai saite khimipui thung üng yng saite na lä awng mang pa vi. Tupyng-a Yng saite khimi nawngmäcaw na lä lawng sang bangtä tingtang awng pa vi.

⁵ Nitä pyng-a lä Judae kälengky hai mätawngky na hai Mosi üng Ubädi särae na lä Jerusalem märü-a aeting ö dy.

⁶ Äni ce lä mäthykung kälengky Ana hai aeting ö vi. Honi mityng-a Kaiafa, Johan Alesanda hai mäthykung mätawngky üng äkälang amäjy na la awng ö by vi.

⁷ Äni ce lä Peterae ni Johan bung äma ce maw-a nähai hai ea änini tea “Nang ni tea ämi üng ämüng hai hini sa hethang haidae py te mei” näkha düng pa dy.

⁸ Tukha Peterae lä Muilaw Käcai kawi te lolang mätü pa te hai äni ce tea “Judae na üng mätawngky na ä, ämi üng ämüng hai sa hawi te mei.

⁹ Vaihi nang ce ma kai ce tea düng saite phüng lä aeke haw y saite khimi bung mä-ai lä säbawng kha äni üng känaw käsaw hawi hai te vi. Äni lä makä sa kha aekei haw te mei näte nang ce lä mäny he ngai ö te mei.

¹⁰ Nang ce hai Isrelae khimi angxynlyng na te mäny hai he ngai te lä, nang ce ma thinglang qawng-a bädü saite Nazare märü üng Isu Khrista üng haidae hai-a hini aedaw saite khimi bung känaw käsaw hawi sa pa te vi. Nang ce ma bädü saite Isu bung lä Säthaw ma mätha haile tyng pa te vi dy.

¹¹ Caekäcai thung-a Isu phüng hini kätyng tärü vi. ‘Ing sa saite nang ce ma khaisö saite kälung lä aely kälengky kälung-a aelawng vi dy’ näkha nä vi.

¹² Honi Isu ma qaitä ni khimi ce bung aeqang haw te kae. Älawng qawng-a awng saite khimi na tähang Säthaw lä Isu lawngtä xyng bung mätaw te vi” näkha Peterae ma thui pa.

¹³ Peterae ni Johan lä ri te awng y käla sa te nung ea änini lä khimi rungrang kae kha cae la kaw phi saite khimi y, näte mätawngky na ma mäny ea lä, cangxei ö pa vi dy. Änini lä Isu hai mangtä awng saite khimi vi näte lä mäny ö vi dy.

¹⁴ Naw hawi saite khimi bung lä Peterae ni Johan hai mangtä aedaw kha awng te nung te phüng-a, äni ce lä ätemakä la käsi thui haw ö pa y vi dy.

¹⁵ Tupyng-a Judae mätawngky na lä Peterae ni Johan bung kawngci üng ärang mang-a mätho hai kha äma ce tingtawi älo aedüng ö dy.

¹⁶ Äni ce lä “Hini khimi ni tea makä sa ö ai mei. Änini ma cangxei-a sa saite lä Jerusalem märü üng khimi angxynlyng ma mäny ö bawi vi dy. Mä-ai lä hini cangxei-a sa y näkha thui haw y lyng.

¹⁷ Tungaila hini angthang khimi qütä mäny y hethang tähang-a, mä-ai lä sa he kae. Äni ce lä Isu üng ämüng ämi tea la thui y hethang kätei te lo thui ö kae si.”

¹⁸ Tupyng-a Judae mätawngky na lä angtawtha lawng netä bung kähyng haile pa ea Isu phüng thui, mätu he kae y, näkha täru khi pa vi dy.

¹⁹ Tukha Peterae ni Johan ma “Säthaw üng lo tängai te qawng-a nang ce üng lo tängai dylä, Säthaw maw-a hawi ai mang mei näte dawng kae-e.

²⁰ Kai ni lä nung saite hai thai saite phüng thui y käla awng haw y lyng” näkha äni ce tea thui hawi pa vi dy.

²¹ Tupyng-a Judae mätawngky na lä angtawtha ni tea kätei kha bälawi hawi vi dy. Makä sa kha änini tea dengpy ai mei näte mäny ö pa y vi dy. Äte makäte phüng-a mei nädylä, khimi ce angxynlyng lä angtawtha ni sa saite kamarae phüng-a, Säthaw tea bälaw kha awng pa ö te vi.

²² Peterae ni Johan ma kamarae hai naw hawi sa pa saite khimi lä khösäning ruibälitä cang y awng pa vi dy.

Käyng na üng aetang pa saite

²³ Peterae ni Johan lä thawng thung üng aelawi pyng ea, änini üng rawijae na thung-a ly kha mäthykung käleng na hai, Judae mätawngky na thui te älo na thui pa haile hawi vi dy.

²⁴ Käyng na ma honi lo thai ea äni ce lä “Areng ä, nang lä käni, älawng, pangle thung-a awng saite na bung sa pa saite Kung vi.

²⁵ Nang lä nang ma üng mawsawng kai ce üng Pä-ai Davidae sanphrang tea Muilaw Käcai hai älo aepe hai te vi. ‘Ätephüng-a ceng kälang üng khimi na lä kädawtho kha, Isrelae khimi na la hawi y saite na dawng aetütü ö te vi mei.

²⁶ Älawng qawng üng sanphrang na hai mätawngky na lä, Areng hai äma üng Mesia tea täre sa he aekäcö ö dy’ näpa.

²⁷ “Tätang khü-a Herodae sanphrang hai Rom mätawngky Pontia Pilata lä ceng kälang üng khimi na hai Isrelae khimi na lä hini märü-a aekäcö ö vi. Nang ma re rüng kha nang üng caiping saite mawsawng Isu bung äni ce lä bädü hethang aedüng ö vi dy.

²⁸ Nang lä phung-ang käleng vi. Nang ma jangni-a aedawng te kätyng hai aely ngai te kätyng äni ce lä sa ö te vi.

²⁹ Areng ä, äni ce üng kätei saite na sämai kü jo ba. Nang üng mawsawng na ri y käla ma nang üng älo thui vawng hethang säbawng kü ba.

³⁰ Nang üng äkö bäjae kha Cäpaw Käcai Isu üng haidae hai-a, cangxei saite na hai kamarae na sa kha khimi ce üng känaw käsaw na hawi sa pa kü ba” näkha ätüng käleng hai aetang ö dy.

³¹ Äni ce aetang pyng ea äni ce awng saite mityng aehüng pa vi. Äni ce angxynlyng Muilaw Käcai hai kawi kha Säthaw üng älo thui vawng ö phi vi dy.

Käyng na üng awng saite

³² Käyng angxynlyng na lä bälung mangtä aedü kha awng ö vi. Ämi lawngtä la vyngsai angxynlyng na mäsai te awng y käla ma mangtä mäsung ö vi.

³³ Angtawtha na lä Säthaw ma Isu dü te üng mätha haile te phüng haidae käleng hai-a thui ö vi dy. Tukha äni ce tea Säthaw ma tähang kähawi awng mang-a py pa dy.

^34-35 Äni ce thung-a mätang saite ämi lä awng pa y vi. Ätephüng-a mei nädylä lai hai ing awng saite khimi na jaw kha tangkae na lä angtawtha na tea py pa ö te phüng-a vi. Tukha angtawtha na ma khimi qütä tähang aely ngai te kätyng bäri pa haile dy.

^36-37 Josefae näsaite khimi lawngtä la awng vi. Äni lä Levi ceng kaesui vi kha Saipära angrai sälawng üng ly te vi. Angtawtha na ma äni tea Banaba näkha ämüng kangthae mäthi pa dy. (Banaba näsaite ämüng üng phüng lä khimi ce tea aethaw py saite khimi näte vi.) Banaba lä äma üng lai jaw kha angtawtha na maw-a phawisae khai pa vi dy.