Angtawtha 16 - Caekäcai Kangthae (Lemi)

Pawlae ma Timothe bung kähyng pa

¹ Tupyng-a Pawlae lä Debe märü hai Lutara märü-a tyng vi dy. Lutara märü-a Timothe näsaite Yng saite khimi lawngtä awng vi. Äni üng änä-awi lä yng saite Judae nawngmädi vi. Tungaila äpä-ai lä Käri khimi lawngtä vi.

² Timothe lä Lutara hai Aikonia märü üng Yng saite khimi na ma kähawi thui pa te khimi lawngtä vi.

³ Pawlae lä Timothe bung khölawng-a äma hai mangtä nähai hethang ngai hai te phüng-a äni tea lengkhüng täke pa vi dy. Hini kätyng sa pa te lä äni üng äpä-ai lä Käri khimi vi kha honi mityng-a awng saite Judae khimi na lä mäny ö bawi pa te phüng-a vi.

⁴ Äni ce lä märü haetä pyng-a haetä cäqeng kha ly ö te kätü-a Jerusalem märü-a awng saite angtawtha na hai kangkawng üng mätawngky na ma Yng saite khimi na tängai hethang tähang Ubädi älo thui mäcai pa ö vi.

⁵ Tukätephüng-a kangkawng khimi ce üng yng cakhi rae kha käni qütä yng te khimi ce lä awng mang pa vi dy.

Troa märü-a Pawlae nung saite äsämai

⁶ Pawlae ni Saila lä Phrukia khö Kalatia khö na tea cäqeng ö vi. Muilaw Käcai lä äni ce tea Asia pre cäpi-a Angthang Kähawi thui hethang mäkhang pa vi.

⁷ Äni ce lä Musi khö khöri-a tyng ea Bethunia khö-a ly he ngai ö vi. Tungaila Isu üng Muilaw Käcai ma äni ce tea ly hethang mäkhang pa vi.

⁸ Tukätephüng-a äni ce lä Musi khö bung cäqeng kha Troa märü-a tyng ö vi dy.

⁹ Pawlae lä honi kärung üng äsämai thung-a Makedonia khö üng khimi lawngtä lä aedaw kha äni hai älo aepe te kai lä nung vi. Makedonia khimi na ma “Makedonia khö-a aekae kha säbawng kü” näkha mäkai pa.

¹⁰ Hini kä äsämai bung Pawlae nung pyng-a, qengtäma kai ce lä Makedonia khö-a ly hethang aerü ö vi dy. Ätephüng-a mei nädylä Makedonia khö üng khimi na tea Isu üng Angthang Kähawi thui hethang kai ce bung Säthaw ma mätaw te vi näkha kai ce lä aedawng ö te phüng-a vi.

Philipi märü üng Lidia yng te

¹¹ Tukha kai ce lä Troa märü üng hai Samothrae angrai sälawng mang-a tui sangphaw aedang kha khawngdang mang-a lä Neapoli märü-a tyng ö vi dy.

¹² Honi märü üng hai Philipi märü-a ly ö dy. Philipi märü lä Makedonia khö üng aely leng saite märü kaehaetä vi. Rom aecörae mätawngky na awng te mityng la vi. Honi märü-a kai ce lä käni bäraw y-a awng ö te vi.

¹³ Aehae te Käni-a lä märü üng hawngkhae ärang mang-a tho kha tävaw teng mang-a awng ö vi. Tupyng-a aetang hethang mityng awng ai müng näkha aedawng ö vi dy. Honi mityng-a kai ce lä aety kha aekäcö saite nawngmädi phütä na älo aepe kha awng.

¹⁴ Äni ce thung-a Lidia näsaite nawngmädi lawngtä awng vi. Äni lä Thetaria märü üng ly kha ävang ting saite äsae kangthing na rang kha jaw te nawngmädi lawngtä vi. Äni lä Säthaw tea cäphaw kha awng vi. Pawlae thui saite angthang na tängai khü hethang Areng Isu ma äni üng bälung tea mäny hai va pa vi dy.

¹⁵ Äni hai äma üng engthung na lä baptismae la ö vi dy. Tupyng-a Lidia ma “Kai lä Areng Isu tea yng tätang dy näte nang ce aepö dy cä-üng, kai ing-a kung kha aehae ö jo ba” näkha kai ce tea kähawi-a bähawi vi dy.

Pawlae hai Saila ni bung lä Philipi märü-a thawng thung-a bäla pa

¹⁶ Nitä-a lä, kai ce lä aetang saite mityng-a ly ö te kätü-a, angra ma kung kha ämaw mang tähang thuikaw saite nawngmädi mawsawng lawngtä hai aeting vi. Äni lä hikä ämaw mang tähang thui rüng pa te hai-a, äma üng ingkung tähang tangkae na dang hai mang pa te vi.

¹⁷ Honi nawngmädi mawsawng lä Pawlae hai kai ce leithung hui vi. Äni ma “Hini khimi ce lä aesangky saite Säthaw üng mawsawng na vi kha nang ce tea aeqang saite angthang thui pa” näkha ätüng käleng hai thui pa vi.

¹⁸ Honi nawngmädi tea lä käni bäraw y-a hani kä sa pa te phüng-a, Pawlae lä bälung hawi y vi dy. Kangkhüng-a lä aehawi kha angra tea “Nang lä hini nawngmädi thung üng tho la. Isu Khrista üng ämüng hai-a, kai ma thui te vi” näkha näpa. Tänaetäma angra lä tho pa vi dy.

¹⁹ Äni üng ingkung na lä äma ce üng tangkae dang saite älang awng y te mäny ö ea lä, Pawlae ni Saila bung ne kha mätawngky na awng saite märü thung üng mityng mang re ea nähai pa vi dy.

²⁰ Rom mätawngky na maw-a nähai kha “Hini khimi ce lä Judae khimi na vi. Mä-ai üng märü thung-a aepuilung rungtä sa pa ö te vi.

²¹ Kai ce üng reitae hai aetawng y saite änini lä mätu vi. Rom khimi na ma lä, honi raitae bäjui hethang ngai y vi” näkha näpa.

²² Khimi angxynlyng na lä Pawlae hai Saila ni tea sakälö khü he sa pa ö vi. Rom mätawngky na ma änini üng kä-o na sä-ei kha bo hai hethang täru pa ö dy.

²³ Reisae na ma Pawlae ni Saila tea bo täto kha thawng thung-a bäla pa ö dy. Märü üng mätawngky na ma la thawng üng äkälengky tea änini bung thawng thung-a kähawi-a rui hethang täru pa dy.

²⁴ Tukätephüng-a thawng üng äkälengky lä änini bung thawng thung üng äsäla-a mäkung kha äkho na tea lawngki hai khai pa vi dy.

²⁵ Kärung angnihü-a lä Pawlae hai Saila ni lä aetang te hai ae-awi na thui kha Säthaw tea bälaw hawi vi dy. Thawng thung-a awng saite khimi kälang na lä honi tüng na tängai ö pa vi dy.

²⁶ Qengtäma älawng-a lä tengxyng y pangtälü naw kha thawng üng aenyng nae lä aehüng pa by vi. Thawng kätho angxynlyng na la aepä-awng praw pa bawi vi. Thawng thung-a awng saite angxynlyng na üng äkö caecei üng singqy rui aela king pa vi dy.

²⁷ Thawng üng äkälengky lä aelaw kha thawng kätho na aepä-awng te nung ea lä thawng thung üng khimi na pryng king vi dy müng näkha aekei aemätho ea äma bung aebädü hethang sa pa vi dy.

²⁸ Tungaila Pawlae ma “Nang ma tea käsi aesa hang. Kai ce angxynlyng lä hini mityng-a awng bawi ö te vi rawng mang” näkha älo tüng käleng hai thui pa.

²⁹ Thawng üng äkälengky lä maito py hethang kähyng vi. Tukha äni ce lä thawng thung-a aehui ea kung pa ö king vi dy. Äni lä käsawtho kha Pawlae ni Saila üng maw-a kaibu kha awng pa vi.

³⁰ Tupyng-a äni ce bung ärang-a nähai kha “Särae na ä, kai lä aeqang saite dang hethang makä sa ai mei” näkha düng pa.

³¹ Änini ma “Areng Isu tea yng dylä, nang hai nang ma üng engthung rütä na lä Säthaw üng aeqang saite dang ai mang” näkha näpa.

³² Tupyng-a Pawlae hai Saila ni ma äma hai äma üng engthung rütä na tea Säthaw üng Angthang Kähawi lä thui pa hawi vi dy.

³³ Honi kärung-a raw ma thawng üng äkälengky lä Pawlae ni Saila üng tämaw na tea mäse pa vi dy. Tupyng-a qengtäma äni hai engthung rütä üng khimi na lä baptismae la ö vi dy.

³⁴ Äni ma Pawlae ni Saila bung äma ing-a nähai kha käcakänei na hai mäcaw pa vi. Äni hai äma üng engthung rütä na lä Säthaw tea yng te phüng-a, tengxyng y kawng anghawtho ö phi pa vi dy.

³⁵ Kädang khö aevang te kätü-a, märü üng mätawngky na lä änini bung thawng thung üng bälawi hethang reisae mätawngky na tea mätaw kha älo thui hai pa ö vi.

³⁶ Tukätephüng-a thawng üng mätawngky ma Pawlae tea “Märü üng mätawngky käleng na ma nang ni bung thawng thung üng bälawi hethang thui ö vi dy. Tukätephüng-a bälung derui te hai ma nang ni lä tho hawi lawi” näkha näpa.

³⁷ Tungaila Pawlae ma Reisae mätawngky na tea “Kai ni lä Rom khimi na vi. Tungaila äni ce ma kai ni tea älo cei y käla ma khimipui maw-a kai ni bung bo kha thawng thung-a pä-ung vi. Vaihi lä kai ni bung kangru-a mätho hethang ngai te mei. Honi lä aesyng te y lyng. Märü üng mätawngky na äma ce ly khe kha kai ni bung thawng thung üng mätho ö sy” näkha näpa.

³⁸ Reisae mätawngky na ma hini phüng bung märü üng mätawngky käleng na tea thui pa ö vi. Pawlae hai Saila ni lä Rom khimi na vi näte phüng äni ce thai ea lä, ri ö phi pa vi dy.

³⁹ Tukha äni ce lä ly ea, Pawlae ni Saila tea bäleng te lo na thui pa ö vi dy. Tupyng-a änini bung thawng üng mätho kha honi märü üng tho hethang aesi aebai kha thui pa ö vi dy.

⁴⁰ Tupyng-a, änini lä thawng thung üng tho kha Lidia üng ing-a ly hawi vi dy. Tukha Yng saite khimi na hai aeting kha äni ce tea aethaw py pa vi dy. Honi pyng dylä, honi märü üng änini lä tho hawi pa vi dy.