Angtawtha 13 - Caekäcai Kangthae (Lemi)

Banaba ni Sawlae bung kangkawng üng khimi na ma mätaw pa

¹ Antioh kangkawng thung-a lä buisaw na hai särae na awng vi. Äni ce lä Banaba, khimi kangnung näsaite Simon, Sarene khö üng Lucia, Herodae hai mangtä ryng saite Manen hai Sawlae ce vi.

² Äni ce lä Areng tea cäphaw kha böjae te hai awng ea, Muilaw Käcai ma “Sawlae hai Banaba bung kai üng kälu sa hethang tähang-a khai ö ba” näkha näpa.

³ Tukätephüng-a äni ce lä böjae kha aetang khüng ea lä, Banaba ni Sawlae üng älö qawng-a äni ce üng äkö na thyng pa ö vi dy. Tupyng-a änini bung Muilaw Käcai üng aely kängai kätyng sa hethang mätaw pa vi dy.

Saipära angrai sälawng-a Angthang Kähawi thui pa

⁴ Banaba ni Sawlae lä Muilaw Käcai ma mätaw te kätyng, Selucia märü-a tyng hawi kha honi märü üng hai Saipära angrai sälawng mang-a tui sangphaw aedang kha ly ö dy.

⁵ Äni ce lä Salami märü-a tyng te thüng-a, Judae na üng ingkäcai na thung-a Säthaw üng Angthang thui pa vi dy. Johan Marka ma änini tea säbawng pa te vi.

⁶ Äni ce lä honi angrai sälawng-a aeke kha Papho märü khytä ly pa vi dy. Honi märü-a lä Judae khimi angra buisaw lawngtä hai aeting pa dy. Äni üng ämüng lä Bar Isu vi kha kai lä Säthaw üng buisaw dy näkha thui pa vi.

⁷ Äni lä Rom aecörae mätawngky Serki, Pawlu üng rawijae, vi. Honi mätawngky lä bälunghae saite khimi lawngtä vi. Äni lä Säthaw üng Angthang tängai hethang ngai kha Banaba ni Sawlae tea kähyng hai pa vi dy.

⁸ Tungaila Käri lo hai-a Elima näsaite angra buisaw lä Banaba ni Sawlae hai älo ae-e tütü pa vi. Ätephüng-a mei nädylä mätawngky bung Isu tea yng hethang ngai pa y te vi.

⁹ Tupyng-a Pawlae näsaite Sawlae lä Muilaw Käcai hai kawi kha angra buisaw Elima tea kheng khü pa vi.

¹⁰ Äni ma “Nang lä Setan angra üng cäpaw, kätüng angxynlyng na üng täre. Nang lä Khimi ce tea kaeling sa jawjaw kha hawi y saite sa pa vi. Nang lä Säthaw üng kätüng sai phüng tea kaeling sa tütü vi.

¹¹ Vaihi ma Säthaw üng äkö lä nang qawng-a tyng kha, nang lä ämi bäjö vi ai dy. Nang lä käni bäraw y käni bung nung y vi ai” näkha näpa. Qengtäma angra buisaw ämi bäjö king pa vi dy. Tukha äni lä äma tea äkö süng kha lolang bähawi hethang khimi bung mäqang kae vi dy.

¹² Mätawngky lä hokä sa pa saite na nung ea lä, Isu üng angthang tea yng by vi dy. Äni lä Areng Isu üng angthang phüng thai ea lä cangxei pa vi dy.

Pisidia khö Antioh märü-a Säthaw lo thui hawi pa

¹³ Pawlae hai äma üng rawijae na lä Papho märü üng hai tui sangphaw aedang kha Pamphulia khö Peka märü-a tyng ö dy. Honi mityng üng hai Johan Marka lä äni ce hai aeprei kha Jerusalem märü-a vawi haile pa vi dy.

¹⁴ Tupyng-a änini lä Peka märü üng tho kha Pisidia khö Antioh märü-a tyng hawi vi dy. Tukha änini lä Aehae te Käni-a Judae na üng ingkäcai-a kung kha aety hawi vi dy.

¹⁵ Mosi üng Ubädi hai buisaw na tärü te cae na phai pyng ea lä, ingkäcai mätawngky na ma äni ce tea “By jä-ai na ä, khimi ce tea aethaw py hethang awng dylä, vaihi älo thui ö” näkha khimi bung mätaw kha äni ce tea thui hai pa dy.

¹⁶ Pawlae lä aetha kha sitäri-a awng hethang äma üng äkö hai mäkhang pyng ea lä, “Isrelae khimi na hai Säthaw tea cäphaw saite ceng kälang na ä, kai lo tängai ö e.

¹⁷ Isrelae khimi na üng Säthaw lä, kai ce üng kangsi kangjaw na bung re te vi dy. Aikuta pre-a angvüng kätyng awng hai ea, äni ce bung awng mang hai rae pa vi dy. Äma üng haidae hai-a, honi pre üng äni ce bung bähawi pa te vi.

¹⁸ Äni ce bung daithung kärang-a säning ruibälitä rytä änawngsa te hai-a rui pa te vi.

¹⁹ Tupyng-a Säthaw ma Kanan pre-a awng saite khimi äceng säritä na tea täphra pang kha honi pre tea lä äma üng khimi na pyng hethang py pa vi dy.

²⁰ Kai ce üng kangsi kangjaw na Aikuta pre-a tyng pyng te säning cungvai bälitä hai rui bangawtä qae pyng ea lä Kanan pre tea pyng hai pa vi dy. “Honi na pyng-a lä buisaw Samawila kätü khytä, älo cei saite mätawngky bung Isrelae khimi na tea Säthaw ma py pa vi dy.

²¹ Tupyng-a Isrelae khimi na lä sanphrang lawngtä bung mäkai pa vi. Tukha Säthaw ma Benjamin äpy äjae thung üng, Kisa üng cäpaw Sawlae bung äni ce üng sanphrang mityng-a re pa vi dy. Äni lä säning ruibälitä sanphrang sa pa dy.

²² Tupyng-a Säthaw ma Sawlae bung sanphrang mityng üng käsü pa ja kha Davidae bung Isrelae khimi na üng sanphrang-a khai pa vi dy. Säthaw ma ‘Jese üng cäpaw Davidae lä kai üng bälung hai aeting khaw saite khimi vi. Kai ngai saite angxynlyng na äni tea sa hai vi ai’ näkha Davidae phüng thui pa vi dy.

²³ Säthaw lä Davidae üng kaesui thung mang üng Isu bung Isrelae khimi na tähang Aeqangkung-a mätaw pa vi dy. Jangni-a Säthaw lä hini kätyng sa ai näte Davidae hai mä-ai üng kangsi na tea älo aedo pa vi dy.

²⁴ Isu tyng y te kälang-a, Baptismae Johan ma Isrelae khimi angxynlyng na tea ‘Aedawng mäkhüng kha baptismae la ö lawi’ näkha thui pa.

²⁵ Baptismae Johan ma äma üng kälu sa te khüng aetawng ea, äni ma ‘Kai tea ämi nä hethang aepö mei. Kai lä nang ce ma aering saite Mesia y vi. Äni lä kai üng leithung-a tyng vi ai. Kai lä Äni üng kho painai rui sö hethang mäteng ma aeteng y’ näkha näpa.

²⁶ “Isrelae kangby jä-ai na ä, Abraham üng kaesui hai Säthaw tea yng saite ceng kälang khimi na ä, Säthaw lä khimi bung makä sa kha aeqang mei näte angthang mä-ai tea mäny hai te vi dy.

²⁷ Jerusalem märü üng khimi na hai äni ce üng mätawngky na ma Isu lä Aeqangkung näte mäny ö pa y vi. Aehae te Käni qütä äma ce phai saite buisaw na üng cae, älo la mäny ö va y vi. Tungaila äni ce lä Isu bung bädü te hai-a buisaw na üng lo tüngkhaw te vi dy.

²⁸ Isu bung bädü hethang sa tämang te haetä mäteng ma awng y ngaila, äni ce lä bädü hethang Pilata mätawngky tea mäkai pa ö vi.

²⁹ Äni ce lä honi Isu phüng Caekäcai thung-a tärü pyng saite na kätyng Isu tea sa ö pyng tea lä, äma üng äkähui na ma äro bung thinglang qawng üng bärung kha täprawng-a aevui pa ö dy.

³⁰ Tungaila Säthaw ma Isu bung kädükhaw üng mätha haile tyng hai pa vi dy.

³¹ Tukha Isu lä äma hai mangtä Kalile khö üng Jerusalem märü-a ly saite khimi na lä Isu bung käni käqae-a nung ö vi dy. Äni ce lä vaihi Isrelae khimi na tea Isu bung nung te angthang phüng thui pa ö vi dy.

^32-33 Kai ce lä nang ce tea Angthang Kähawi thui hethang hi-a tyng dy. Säthaw ma mä-ai üng kangsi na tea py saite älo aedo te kätyng äni lä mä-ai tähang vaihi ma cungrü hai vi dy. Säthaw lä Isu bung kädükhaw üng aetha hai ea älo aedo saite cungrü hai te vi dy. Äbaeni üng Sam cae-u thung-a tärü te lä, ‘Nang lä Kai üng Cäpaw vi. Vaini Kai lä nang üng Pä-ai-a aelawng vi dy.’

³⁴ Säthaw ma äma üng Äcäpaw bung aetha haile tyng kha baeni dü haile tyng y vi dy. Tukätephüng-a Säthaw ma ‘Davidae tea tätang khü-a caiping te tähang kähawi na py hethang, älo aedo te kätyng nang tea py ai mang’ näpa.

³⁵ Honi phüng äkälang Sam cae-u thung-a ‘Nang lä Nang ma üng älo tängai khü saite Mawsawng bung täprawng-a rawng hai pa y vi ai’ näkha näpa.

³⁶ Davidae lä äma hing te thüng-a, Säthaw ma äni tea sa hai he ngai saite kätyng sa pyng ea, dü kha kangsi kangjaw na üng täprawng-a äni üng äro bung ö pa te vi. Äni üng äro la rawng pa vi dy.

³⁷ Tungaila Säthaw ma dü te üng aetha haile pa hai saite Isu üng ätabung lä honi kätyng rawng pa te y vi.

³⁸ Kai üng kangby jä-ai na ä, tängai ö. Honi Isu sa te phüng-a, Säthaw ma nang ce üng hunghö bälawi haw saite phüng na, kai lä nang ce tea mäny hai hethang ngai te vi.

³⁹ Isu tea Yng saite khimi angxynlyng na tea Säthaw ma kätüng-a nung vi dy. Mosi üng Ubädi hai-a, nang ce tea Säthaw ma kätüng-a nung y lyng.

⁴⁰ Buisaw na üng Caekäcai thung-a tärü te kätyng, Säthaw ma nang tea sa y hethang sädi khai ba.

⁴¹ ‘Buisaw ma kai thui saite älo tea käsi prawng saite khimi na tängai ö. Nang ce lä cangxei te hai pra ö ai. Kai ma ri hethang kähawi sa pa ai. Khimi kälang na ma thui mäcai ngaila, nang ce lä yng ö y lyng’” näpa.

⁴² Judae na üng ingkäcai thung üng Pawlae ni Banaba tho hawi te kätü-a lä, khimi ce ma änini tea ämaw mang üng Aehae te Käni-a, hini phüng na thui haile pa hethang mäkai ö vi.

⁴³ Judae na üng ingkäcai üng mätawngky na ma khimi ce bung vawi hai te kätü-a, Judae khimi na hai Judae na üng Säthaw tea cäphaw saite khimi na lä Pawlae ni Banaba leithung hui pa ö vi dy. Pawlae ni Banaba lä äni ce hai älo aepe kha Säthaw üng tähang kähawi phüng thui ea yng jawjaw hethang aethaw py pa hawi dy.

⁴⁴ Ämaw mang üng Aehae te Käni-a, Säthaw üng lo tängai hethang märü angxynlyng tingtang üng khimi na lä ly pa ö vi dy.

⁴⁵ Tukä ea Judae khimi na lä khimipui na bung nung te kätü-a, aepä-e te bälung awng ö phi vi. Pawlae thui saite älo tea ae-e kha äni tea käsi prawng pa ö vi.

⁴⁶ Tupyng-a Pawlae ni Banaba lä ri y te hai ma, thui vawng hawi te lä “Kai ni lä Säthaw üng lo Angthang nang ce tea thui mang hethang Säthaw ma kai tea täru te vi. Tungaila nang ce lä Säthaw üng Lo Angthang bung kädesö vi. Nang lä dungtäsa kanghing dang hethang aeteng näkha mätü vi. Tukha kai ni lä nang ce te üng tho kha ceng kälang khimi na tea ly vi ai dy.

⁴⁷ Säthaw ma kai ni tea hini kätyng täru vi. ‘Nang ni ceng kälang ce tea ly kha kaevang mätü hethang nang ni bung mätaw te vi. Älawngpre angxynlyng-a awng saite khimi na tea äni ma aeqang te dang hai ai näte nang ce ma thui he kae’” näpa.

⁴⁸ Ceng kälang khimi na ma honi Älo angthang thai te kätü-a lä, anghawtho te hai ma Säthaw üng Angthang tea bälaw ö vi dy. Säthaw ma dungtäsa hing saite dang hethang re saite khimi na lä yng ö vi dy.

⁴⁹ Honi kätü-a Areng Isu üng Älo angthang lä honi pre mityng qütä-a aepreng dü pa vi dy.

⁵⁰ Tungaila Judae khimi na lä Säthaw tea cäphaw saite nawngmädi areng na hai märü üng mätawngky khimi na ma Pawlae ni Banaba tea kädawtho rung khytä sa ö pa vi. Äni ce lä Pawlae ni Banaba tea sakälö khü kha äma ce pre üng mäthoja ö pa vi dy.

⁵¹ Pawlae ni Banaba la äma ni üng khodi na täkhy hawi pa vi dy. Honi kä sa te lä Säthaw ma äni ce bung khaisö te vi näte sämai nae sa te vi. Änini lä Aikonia märü-a ly hawi vi dy.

⁵² Antioh märü üng Yng saite khimi na lä Muilaw Käcai kawi te hai anghawtho kha awng ö jawjaw vi dy.