Angtawtha 11 - Caekäcai Kangthae (Lemi)

Jerusalem märü üng kangkawng tea Peterae älo thui pa

¹ Ceng kälang khimi na lä Säthaw üng Angthang Kähawi yng ö te vi näte phüng lä angtawtha na hai Judae khö üng Yng saite khimi na ma thai ö vi dy.

² Peterae lä Jerusalem märü-a tyng saite kätü-a, ceng kälang na tea lengkhüng täke hethang ngai hai saite Judae na ma äni sa te lä tämang vi dy näkha Peterae tea käsi thui pa ö vi.

³ Äni ce ma “Nang lä ceng kälang khimi na tea dawnghang ly kha äni ce hai mangtä ca te vi be tu” näpa.

⁴ Tukätephüng-a Peterae ma äni ce tea honi phüng angcü üng hai käteng khytä tätang khü-a thui mäcai pa vi dy.

⁵ Peterae ma “Kai lä Jopa märü-a aetang te thüng-a, hini äsämai mang nung te vi. Känih phei haetä kätyng ätäki bälitä tea süng kha Känipre üng hai bäla käthu saite na kai lä nung vi. Tukha honi na lä kai awng saite teng-a tyng vi dy.

⁶ Honi na thung-a kheng saite kätü-a lä, äkho bälitä awng saite ing üng tawngbawi na hai daithung üng tawngbawi na, älawng qawng-a kaw-va saite na hai tävaw amäjy cawngkhang na tea kai lä nung te vi.

⁷ Tupyng-a ‘Peterae ä, aetha lawi. Honi na ra kha ca lawi’ näsaite ätüng kai lä thai te vi.

⁸ Tungaila kai ma ‘Areng ä, aesyng y lyng. Kai lä cai y saite ätete käcakänei tea manila ca vai te y’ näkha näpa.

⁹ Tupyng-a Känipre mang üng äbaeni ätüng lä ‘Säthaw ma caiping vi näsaite tea nang lä cai y näkha thui hang baw nä vi’ näpa.

¹⁰ Hokä qeng thungtä tyng pyng ea lä, honi angxynlyng na bung Känipre mang-a lawngtä ma la haile king pa vi dy.

¹¹ Honi kätü khaw-a kai awng saite ing-a khimi lawng thungtä na lä, tyng vi dy. Äni ce lä Kesari märü üng hai, kai tea mätaw saite khimi na vi.

¹² Muilaw Käcai ma ‘Äni ce hai mangtä hui praw kha äte lä aedawng näpi y ma’ näkha nä vi. Jopa märü üng Yng saite khimi lawng tärutä lä kai hai mangtä hui ö te vi. Kai ce angxynlyng lä Konelia ing-a aehae ö bawi te vi dy.

¹³ Konelia lä äni üng engthung-a Säthaw üng angtawtha bung aeting kha honi phüng kai ce tea thui vi dy. Säthaw üng angtawtha ma ‘Jopa märü-a khimi mätaw kha Peterae näsaite Simon bung ka lawi.

¹⁴ Äni lä nang ma hai nang ma ce engthung rütä Säthaw ma aeqang hethang Angthang Kähawi thui vi ai’ näpa.

¹⁵ Tupyng-a kai lä älo aepe te aetawng angcü-a, Muilaw Käcai lä kai ce tea tyng te kätyng äni ce qawng-a la tyng ö te by vi.

¹⁶ Tukha Areng Isu üng älo kai lä aedawng haile tyng vi. Äni ma ‘Baptismae Johan lä tui hai baptismae py dy. Tungaila nang ce lä Muilaw Käcai hai-a baptismae dang ö ai mang’ näkha näpa.

¹⁷ Säthaw ma Areng Isu Khrista tea yng saite mä-ai tähang py te lasawng kätyng ceng kälang khimi na tähang la py te by vi näte lä aenysy te vi dy. Tukätephüng-a kai lä Säthaw tea mäkhang haw y vi” näkha näpa.

¹⁸ Honi älo thai ea, äni ce lä käsi thui ö y käla ma, Säthaw tea bälaw ö vi dy. “Säthaw lä ceng kälang khimi na tea hing te kangthae dang hethang äni ce tea ae-ui hai pa te vi” näkha näpa.

Antioh märü üng kangkawng

¹⁹ Isu tea Yng saite khimi na lä Stephen tea sakälö khü kha bädü pa te phüng-a mityng qütä-a, pryng ö xhixae vi dy. Äni ce phütä na lä Phonecia khö, Saipära angrai sälawng hai Antioh märü khytä tyng ö vi dy. Äni ce lä Isu üng angthang Judae khimi na ma qaitä tea thui pa ö vi dy.

²⁰ Tukä ea la äni ce thung-a, Saipära angrai sälawng üng hai Sarene khö üng khimi phütä na la Antioh märü-a ly kha Käri lo aepe saite khimi na tea la Areng Isu üng Angthang Kähawi na thui ö pa vi dy.

²¹ Äni ce lä Areng Isu üng haidae na dang te hai-a, khimi awng mang te na lä Areng Isu tea yng kha äni leithung hui ö vi dy.

²² Hini angthang lä Jerusalem märü üng kangkawng na ma thai kha Banaba bung Antioh märü-a mätaw pa dy.

²³ Äni lä honi märü-a tyng ea Säthaw üng tähang kähawi nung te kätü-a lä, anghawtho vi dy. Äni lä Areng Isu tea bälung mitang hai yng jawjaw hethang mätu pa vi dy.

²⁴ Banaba lä khimi mitang pa vi kha Muilaw Käcai kawi te hai-a yng saite la cakhi te vi. Tukha khimi awng mang te na Areng Isu tea yng hethang tähang-a, äni lä säbawng bärai pa vi dy.

²⁵ Tupyng-a Banaba lä Sawlae bung ha hethang Tasu märü-a ly vi dy.

²⁶ Äni hai aeting tea lä Antioh märü-a, kähyng pa. Änini lä säning jungtä kangkawng üng khimi na hai aeting kha khimipui na tea mätu pa ö vi dy. Yng saite khimi na tea angcü-a Khristen näkha mäthi mang saite mityng lä, Antioh märü vi.

²⁷ Honi thüng-a buisaw phütä na lä, Jerusalem märü üng hai, Antioh märü-a ly ö dy.

²⁸ Honi na thung üng Akäbu näsaite khimi lawngtä lä, aetha kha Muilaw Käcai ma thui te kätyng “Älawngpre mityng qütä-a lä täkang tho ai näkha thui rüng” pa vi dy. Hini thui rüng saite phüng lä Rom Sica sanphrang Kalodia dung-a lä, tyng pa khaw vi dy.

²⁹ Yng saite khimi na lä äma ce bäja te rytä Judae khö-a awng saite kangby jä-ai na tea säbawng hethang aedüng aethui ö vi dy.

³⁰ Hikä bälung aedü kha thui saite lo kätyng lä säbawng hethang tangkae na tea Banaba ni Sawlae te mang hai-a, Jerusalem märü üng kangkawng mätawngky na tea py pa vi dy.