Angtawtha 10 - Caekäcai Kangthae (Lemi)

Peterae ni Konelia

¹ Kesari märü-a Konelia näsaite khimi lawngtä awng vi. Äni lä Rom täre üng mätawngky vi kha Itali täre kangkawng lawng cungvaitä na bung pyng saite lawngtä vi.

² Äni lä Säthaw tea dawngrütü saite khimi vi. Äni hai äni üng engthung rütä na la Säthaw tea tämö khai ö bärai vi. Khimi kangtang na tea tangkae py kha säbawng leilae vi. Säthaw tea la aetang jawjaw kha awng te vi.

³ Känitä üng käni aekai te naeri thungtä kätü-a lä, äsämai mang nung vi. Säthaw üng angtawtha lä äni tea ly pa kha “Konelia ä” näkha näpa.

⁴ Äni lä ri te hai-a Säthaw üng angtawtha tea kheng kha “Areng ä, äte mei” näkha näpa. Säthaw üng angtawtha ma “Nang üng aetang leilae te hai khimi kangtang na tea tangkae hai py vävawi saite na lä, Säthaw ma kawng hai vi dy.

⁵ Vaihi ma Jopa märü-a, khimi mätaw kha Peterae näsaite Simon bung ka lawi.

⁶ Äni lä raebawi phö kälu sa saite Simon üng ing-a aehae vi. Honi ing lä pangle pyng-a awng mang” näkha näpa.

⁷ Honi Säthaw üng angtawtha vawi pyng ea lä, Konelia lä äma üng mawsawng lawng netä hai Säthaw tea bälung aepy saite reisae lawngtä bung kähyng kha,

⁸ Hini aeting saite phüng angxynlyng na äni ce tea thui pa pyng ea lä, äni ce bung Jopa märü-a mätaw pa vi dy. Peterae lä äsämai nung pa dy.

⁹ Äni ce khölawng tho pyng te üng kädang mang käni anghung-a lä, Jopa märü teng-a tyng ö dy. Käni anghung-a, Peterae lä aetang hethang ing üng äqawng-a paw pa vi dy.

¹⁰ Äni lä äjo aelang phi kha ätete hae haetä ca hethang ngai pa vi. Äni tähang ca nae aerü sälö te kätü-a, äni lä äsämai mang nung pa vi.

¹¹ Känipre aepä-awng te na läsy, känih phei haetä kätyng ätäki bälitä tea süng kha Känipre üng hai älawng qawng-a lawngtä ma bäla käthu saite na nung vi.

¹² Honi na thung-a lä, äkho bälitä awng saite tawngbawi amäjy cawngkhang na, älawng qawng-a kaw-va saite na hai tävaw amäjy cawngkhang na la qa pa vi.

¹³ Tupyng-a “Peterae ä, aetha lawi. Honi na ra kha ca lawi” näte ätüng lä thai pa vi dy.

¹⁴ Tungaila Peterae ma “Areng ä, aesyng y lyng. Kai lä cai y saite ätete käcakänei lä manila ca vai te y” näkha näpa.

¹⁵ Äbaeni üng ätüng lä “Säthaw ma caiping vi näsaite tea nang lä cai y näkha thui hang baw” näpa.

¹⁶ Hokä qengthungtä ätüng na thai pyng ea lä, qengtäma känih phei lä Känipre mang-a lawngtä ma la haile king pa vi dy.

¹⁷ Peterae lä äsämai mang üng älawngsai phüng mäny hethang aedawng kha awng vi dy. Honi kätü-a Konelia ma mätaw saite khimi na lä Simon üng ing tea düng kha ha ea thokhae kung-a äni lä aedaw kha awng pa vi dy.

¹⁸ Äni ce ma “Simon näsaite Peterae lä hini ing-a awng mei” näkha hyng ea düng pa ö vi.

¹⁹ Peterae lä äsämai mang üng phüng dawng mäsüng kha awng te thüng-a, Muilaw Käcai ma Simon tea “Khimi lawng thungtä na lä nang bung ha ö vi.

²⁰ Aetha kha aerung pa lawi. Kai ma äni ce bung mätaw te vi kha aedawng näpi y ma ätemakä läsy äni ce hai mangtä hui praw lawi” näkha näpa.

²¹ Tukätephüng-a Peterae lä äni ce tea cäqa pa kha “Nang ce ha saite khimi lä kai dy. Ätemakä hethang nang ce lä, hi-a ly ö te mei” näkha düng pa.

²² Äni ce ma “Konelia näsaite täre mätawngky ma, kai ce tea mätaw te vi. Konelia lä khimi mitang vi kha Säthaw tea tämö khai ea ri kha awng saite khimi vi. Judae khimi angxynlyng na üng tämö khai saite khimi la vi. Säthaw üng angtawtha käcai lawngtä lä Konelia tea nang bung kähyng hethang täru pa vi. Nang thui saite na äni tängai hethang tähang vi” näkha näpa.

²³ Tupyng-a Peterae ma äni ce bung ingthung-a ka kha honi düngtä i hai pa dy. Kädang mang-a, Peterae lä äni ce hai mangtä hui pa te kätü-a lä, Jopa märü üng Yng saite khimi phütä na lä hui pa ö by vi.

Peterae Konelia ing-a awng te

²⁴ Honi pyng üng känitä-a lä, Peterae lä Kesari märü-a tyng vi dy. Konelia lä äma kähyng saite äpy na hai rawijae aesa saite na hai mangtä äni tea aering kha awng pa ö vi dy.

²⁵ Peterae engthung-a kung te kätü-a lä, Konelia lä äni üng khokung-a bü kha cäphaw hethang ngai pa vi dy.

²⁶ Tungaila Peterae ma “Aetha lawi. Kai lä nang kätyng khimi rungrang by kae baw” näkha Konelia tea aetha hai pa dy.

²⁷ Tupyng-a Konelia hai mangtä älo aepe kha äni ce ingthung-a kung te kätü-a, khimi awng mang-a aekäcö kha awng te tea nung pa ö vi dy.

²⁸ Tupyng-a Peterae ma äni ce tea “Judae khimi na lä ceng kälang na hai aede he kae y. Äni ce tea dawnghang ly he kae y. Mosi üng Ubädi ma mäkhang saite nang ce lä mäny ö khü te vi. Tungaila Säthaw ma ‘“Ämi tea la cai y” näkha aedawng he kae y,’ näte kai tea Säthaw ma thui mäcai vi dy.

²⁹ Tukätephüng-a nang ma kai bung ka te kätü-a, kai lä ae-e y käla ma hui praw te vi dy. Ätephüng-a kai tea kähyng te mei näte phüng kai tea thui ö jo” näkha näpa vi.

³⁰ Konelia ma “Jandüng aetawi käni bälitä käni anghung pyng üng naeri thungtä üng vaihi kätyng kätü-a, kai lä ing-a aetang kha awng te kae vi. Hokä ea aecang phrung saite kä-o aelawng saite khimi lawngtä lä kai üng maw-a aedaw praw vi dy.

³¹ Äni ma ‘Konelia ä, nang üng aetang saite tüng lä Säthaw ma thai vi dy ecy. Nang ma kangtang na tea tangkae hai py leilae saite na lä Säthaw ma mäny te vi dy.

³² Tukha Jopa märü-a khimi mätaw kha Peterae näsaite Simon bung ka lawi. Äni lä raebawi phö kälu sa saite Simon üng ing-a aehae vi. Honi ing lä pangle pyng-a awng mang’ näkha nä vi.

³³ Tukätephüng-a kai lä qengtäma nang tea khimi bung mätaw praw te vi. Nang ly pa te phüng-a tengxyng y kai lä kawngphi vi. Nang te mang hai Areng ma thui hai saite angthang tängai hethang tähang-a, kai ce lä Säthaw üng ämaw-a tyng te vi dy” näkha näpa.

Äceng kälang na tea Angthang Kähawi thai hai te

³⁴ Tupyng-a Peterae lä “Tätang khü-a ma, Säthaw lä khimi kaeneng kaesang tea kheng te y, näte kai lä vaihi mäny vi dy.

³⁵ Säthaw lä ceng angxynlyng na thung üng äni tea ri te hai tämö khai kha kätüng khaw-a sa saite khimi qütä bung ngai te vi.

³⁶ Säthaw lä Isrelae khimi na tea mäny hai te angthang phüng, nang ce lä thai ö vi dy. Äte angxynlyng na üng Areng-a bälawng saite Isu Khrista lä khimi angxynlyng na tähang sa saite hai-a, mä-ai lä Säthaw hai aede haw vi dy. Honi lä Angthang Kähawi vi dy.

³⁷ Baptismae Johan ma baptismae angthang thui pyng pa te kätü-a, Kalile khö üng hai aetawng kha Judae khö qütä-a Isu ma sa saite angxynlyng na phüng nang ce lä mäny ö vi dy.

³⁸ Nazare märü üng Isu lä Säthaw te mang üng Muilaw Käcai hai haidae dang te phüng nang ce lä mäny ö vi. Säthaw lä äni hai mangtä awng te phüng-a, äni lä mityng qütä-a ly kha kähawi sa ea khimi ce bung naw hawi hai te vi. Angra kung te khimi ce thung üng mätho kha Setan angra üng haidae thung mang üng äni ce bung bälawi pa vi dy.

³⁹ Jerusalem märü hai Judae khö üng mityng qütä-a la, Isu ma sa saite phüng na kai ce lä nung kha thai khe saite äkung na vi. Tupyng-a khimi ce lä Isu bung thinglang qawng-a täheng kha bädü ö pa vi dy.

⁴⁰ Tungaila käni thungtä käni-a lä, Säthaw ma Isu bung kädü thung üng mätha haile kha khimi ce tea lä, äni bung nung hai pa vi dy.

⁴¹ Khimi qütä na ma lä, Isu bung nung ö bawi te y vi. Säthaw lä khimi ce tea thui hethang re rüng saite khimi na ni, äni bung nung te kae vi. Honi re saite na lä kai ce vi dy. Isu dü te üng hai, aetha pyng ea, äni hai mangtä ca nei saite na lä kai ce vi dy.

⁴² Kai ce ma nung khe saite hini na khimi ce tea thui hethang mätaw te vi. Säthaw ma Isu bung hing saite hai, dü saite khimi na tea tärae cei kha Areng-a awng hai hethang re pa te phüng-a, mä-ai lä honi phüng thui hethang kae te vi.

⁴³ Buisaw na angxynlyng ma, äni üng phüng thui rüng te vi. Isu tea Yng saite khimi angxynlyng na üng hunghö na Säthaw ma bälawi ai näte buisaw na ma thui te vi dy.”

Muilaw Käcai tea ceng kälang na dang pa

⁴⁴ Hikä Peterae thui ea Muilaw Käcai lä angthang thai saite khimi na tea tyng pa vi dy.

⁴⁵ Khimi ceng kälang na la Muilaw Käcai üng lasawng na dang pa vi te phüng-a, Peterae hai mangtä ly saite käyng Judae khimi na ma lä, cangxei ö phi pa vi dy.

⁴⁶ Ätephüng-a mei nädylä khimi ceng kälang na lä Muilaw Käcai ma aepe hai saite älo cawngkhang hai Säthaw tea bälaw ö te phüng-a vi. Tukha Peterae ma äni ce lä

⁴⁷ “Kai ce kätyng Muilaw Käcai dang saite khimi na by vi. Tukätephüng-a ämi ma lä baptismae la hethang ämi la mäkhang haw y vi ai” näkha näpa.

⁴⁸ Tupyng-a Peterae lä äni ce tea Isu Khrista üng ämüng hai-a baptismae py hethang thui pa dy. Tukha Peterae tea äma ce hai käni käqae-a mangtä awng hethang äni ce lä mäkai pa dy.