2 Timote 4 - Caekäcai Kangthae (Lemi)

¹ Säthaw hai Isu Khrista üng maw-a, kai lä nang tea mäci te dy. Isu Khrista lä Sanphrang kätyng pre pyng hethang ly haile tyng te kätü-a lä, hing saite khimi na hai dü saite hai khimi na tea tärae cei ai.

² Angthang Kähawi thui ba. Kätü na hawi te läsy, hawi y te läsy, nang lä Säthaw üng lo thui hethang aerü rüng lawi ba. Khimi ce üng sa tämang te kätü-a, nang lä äni ce tea thui pa. Käsi sa te khimi na tea pring pa. Kätüng sa saite khimi na tea aethaw py pa. Honi kälu angxynlyng na tea nang lä änawngsa bärai te hai mätu te hai-a sa ba.

³ Khimi ce lä kätüng mätu te na tea tängai hethang ngai y te kätü lä tyng ai rawng. Äni ce lä äma ce üng ngaiphi tüng y saite mang-a hui ö ai. Tukha äni ce lä thai hethang ngai saite lo mätu te särae rangpui na tea ha ö vi ai.

⁴ Khimi ce lä älo mitang tea tängai hethang ngai ö y ai. Tukha äni ce lä tüng y saite cäkae kangrüng na tea tängai ö ai.

⁵ Tungaila, Timothe ä, nang ma tea nang ma kätü qütä aeküng hethang kae. Mätang bälai te kätü-a, nang lä änawngsa ba. Angthang Kähawi thui ba. Säthaw ma py saite kälu angxynlyng na tea nang lä sa king ba.

⁶ Mäthykung lä löci sa pyng te kätü-a, Cäpje tui hai bälawng te vi. Kai üng hing saite lä honi Cäpje tui bälawng te hai aetawng vi. Hini älawngpre üng kai tho hethang kätü lä aenai vi dy.

⁷ Kai lä kähawi-a aety pyng te vi dy. Aehui saite pawi-a la kai lä kangteng khytä aehui te khüng pyng te vi dy. Kai lä yng saite tea aekhaw khü te vi dy.

⁸ Kai lä kawng te hai äni üng lo tängai te phüng-a vaihi Säthaw ma kai tähang ävang käting khai rüng pa vi dy. Khimi angxynlyng na tea kätüng-a tärae cei saite Areng lä äma ly haile te honi Käni-a lä kai tea hini ävang käting py ai. Kai ma qaitä tea py hethang kae y. Äma ly haile te kätü tea aethang khai te hai aering saite khimi angxynlyng na tea la ävang käting py pa ö by ai.

Pawlae lä Timothe bung äma tea ly hai dawde hethang thui pa

⁹ Nang lä kai tea ly dawde haw hethang aethawsa ba.

¹⁰ Dema lä hini älawngpre-a awng saite cawngkhang na tea bälung aevaw te phüng-a, kai bung khaisö kha Thesalonika märü-a ly ja vi dy. Kriski lä Kalatia khö-a ly kha Tita lä Dalamatia khö-a ly vi dy.

¹¹ Luka ma qaitä ni kai hai mangtä awng te kae. Marka bung lä mäqang kha nang hai mangtä nähai ba. Ätephüng-a mei nädylä äni lä kai üng kälu tea säbawng haw ai te phüng-a vi.

¹² Kai lä Tukhika bung Ephesi märü-a mätaw vi dy.

¹³ Nang ly kätü-a Troa märü üng Kaipa ing-a khai saite kai üng kä-o hai, cae-u na hai aely leng te cae tärü saite na tea nähai pa jo ba ä.

¹⁴ Pething särae Alesanda lä kai üng kälu tea elekhei sa te awng mang vi dy. Äni sa saite käsi tähang Areng lä äni tea tärawitha ai.

¹⁵ Nang la äni tea sädi khai ba. Mä-ai üng mätu saite lo angxynlyng na tea äni lä tengxyng y elekhei sa phüng-a vi.

¹⁶ Kai tea tärae cei te kung ma angcü üng tärae cei te kätü lä, ämi lawngtä la kai tea säbawng hethang awng y. Khimi qütä ma kai bung khaisö te vi dy. Kai tea khaisö te phüng-a, äni ce üng sa tämang saite na Säthaw ma bälawi hethang kai lä aetang pa te vi.

¹⁷ Tungaila Areng Isu lä kai äteng-a mangtä awng hai kha aethaw py te vi dy. Tukätephüng-a Khrista üng Angthang Kähawi tea honi mityng-a awng saite ceng kälang khimi angxynlyng na thai hethang kai lä thui king haw vi dy. Khrista ma kai bung lä kädü khaw üng aeqang pa te vi dy.

¹⁸ Areng lä kai bung khimi ce üng käsi sa te angxynlyng na thung üng aelawi hai pa ai. Äni lä äma üng pyng saite Känipre-a kai bung kähawi-a nähai ai. Äni tea mä-ai lä cäphaw kha dungtäsa bälaw ö khü si. Amen.

Pawlae üng kangkhüng kawng bärai sa te älo na

¹⁹ Precila ni Akuila tea hai Onesiphora üng engthung rü tea la kai üng kawng bärai sa te lo thui pa jo ba.

²⁰ Erastus lä Korin märü-a awng te vi dy. Trophima lä naw te phüng-a, kai lä Mile märü-a äni bung khaisö vi dy.

²¹ Säding tho y te kälang-a nang lä hi-a tyng hethang aethawsa ba. Ebula, Puden, Lina, Kaladia hai hi-a awng te yng saite angxynlyng na ma nang tea kawng bärai sa te lo thui ö by dy.

²² Areng lä nang hai mangtä awng jaw sy. Säthaw lä tähang kähawi lä nang ce angxynlyng tea py jo sy.