2 Timote 2 - Caekäcai Kangthae (Lemi)

Isu Khrista üng reisae kähawi

¹ Timothe ä, nang, lä kai üng cäpaw kätyng vi. Isu Khrista ma nang tähang py saite tähang kähawi hai aethaw aela ba.

² Nang lä kai ma khimi awng mang saite na maw-a mätu saite Isu Khrista üng Angthang Kähawi tea thai pyng te vi dy. Nang lä khimi kälang na tea mätu hai hethang ae-y haw nae hawi saite khimi na tea hini angthang a ba.

³ Nang lä Isu Khrista üng reisae kähawi lawngtä kätyng kai ce hai mangtä mätang bälai hai jo ba.

⁴ Reisae lawngtä lä kälu kälang tea sa haw y lyng. Ätephüng-a mei nädylä äni lä äma üng reisae mätawngky tea kawng hai hethang ngai te phüng-a vi.

⁵ Honi kätyng-a, khimi lawngtä lä aehui te pawi-a qa dylä, honi aehui saite pawi üng älang na tängai y dylä, äni lä bäja saite ävang käting dang haw y lyng.

⁶ Aethaw rae ea lai sa te khimi lawngtä lä angcü-a cawbi cawthai na dang hethang kae te vi.

⁷ Kai thui saite na phüng aedawng ba. Hini angxynlyng na tea mäny hai hethang Areng lä nang tea säbawng ai.

⁸ Sanphrang Davidae kaesui kaebeng lawng saite Isu Khrista bung kädü thung üng Säthaw ma mätha haile vi dy näte tea aedawng haile jawjaw ba. Hini lä khimi ce tea kai üng thui saite Angthang Kähawi vi.

⁹ Hini Angthang Kähawi mätu te phüng-a, kai lä mätang bälai hai te vi. Käsi sa saite khimi lawngtä kätyng thawng thung-a singqy rui na hai mäteng ma kai tea khimi ce lä mäkhing te vi. Tungaila Säthaw üng lo tea lä ämi ma la mäkhing haw y lyng.

¹⁰ Tukätephüng-a Säthaw ma re saite khimi na üng yng hethang tähang kai lä mätang bälai te angxynlyng na tea khung jawjaw te vi. Honi hai-a khimi ce lä Isu Khrista tea yng kha dungtäsa phung-ang hai aeqang saite dang haw ö ai.

¹¹ Hini lä ae-y nae hawi saite älo vi “Khrista hai mangtä mä-ai dü vi dylä, Äni hai mangtä mä-ai lä hing haile tyng ö by ai.

¹² Äni tähang mä-ai mätang te aeting jawjaw dylä Äni hai mangtä mä-ai la pre pyng ö by ai. Mä-ai ma Äni bung aephae dylä äni la mä-ai bung aephae by vi ai.

¹³ Khrista tea mä-ai ae-y khi y ngaila Äni lä mä-ai üng ae-y khü nae-a awng jawjaw ai. Ätephüng-a mei nädylä Äni lä äma üng aedo saite lo tea täphra haw y te phüng-a vi.”

Säthaw kawng hai hethang kälu sa te khimi lawng he kae

¹⁴ Hini mätu saite na yng te khimi na tea aedawng haile hethang thui pa. Älo älawngsai na phüng lawngtä hai lawngtä ae-e y hethang Säthaw üng maw-a äni ce tea sädi py pa ba. Honi ae-e saite lä aetütü kae. Tängai saite khimi na üng yng te tea täphra hai xyng te kae vi.

¹⁵ Nang lä Säthaw üng maw-a aedaw ea äni üng kawng hai hethang aethawsa ba. Nang ma üng kälu tähang aejae y käla sa saite khimi-a lawng ba. Lo mitang tea kähawi-a mätu khü saite khimi-a lawng ba.

¹⁶ Nang lä Säthaw tea tämö khai y saite lo, aetütü ävang ting y saite lo thui saite na tea aehi ba. Hokä thui saite khimi na lä Säthaw tea mäny y saite khimi na kätyng lawng rae ö vi ai.

¹⁷ Äni ce üng älo na lä angvawi käsi haetä kätyng aepreng ö ai. Honi kätyng mätu te khimi na thung-a lä Humenai hai Phileta ni la qa hawi te by vi.

¹⁸ Änini lä älo mitang hai hanglaw hawi te vi dy. Änini lä “Säthaw lä yng saite khimi na bung kädü thung üng mätha haile pyng te vi dy” näkha mätu hawi te vi. Honi hai-a khimi phütä na üng yng saite tea täphra hawi te vi.

¹⁹ Tungaila Säthaw tea yng khü te khimi na üng yng saite lä ingkäleng haetä üng aenyng nae ca te kätyng cakhi te vi. Säthaw üng tärü saite na lä “Areng lä äma tea yng saite khimi na bung mäny vi” näte hai “Khimi lawngtä ma kai lä Areng leithung hui te vi näkha thui dylä, käsi sa saite tea khaisö hethang kae te vi” näte awng vi.

²⁰ Ingkäleng pui haetä-a lä sui, tangkae hai sa te pangkae na awng vi. Älawng ngang, thingkawng na hai sa saite pangkae hai kaephi na la awng te by vi. Sui, tangkae hai sa saite na tea lä pawi käleng-a ävang käting na khai hethang khimi ce ma tawng ö dy. Tungaila älawng ngang, thingkawng na hai sa saite pangkae hai kaephi na tea lä pawprae saite na thae kha khimi ce ma tawng ö te vi.

²¹ Khimi lawngtä lä äma ma tea pawprae saite üng aemäcai pang dylä mangkri, äni lä pawi käleng-a ävang käting na khai saite kaephi hai aetawng vi dy. Äni lä käcai-a awng te phüng-a äni üng Areng lä äni tea kälu kähawi sa hethang tawng haw ai.

²² Nang lä särai anglaw na sa hethang ngaiphi tüng y saite na tea aehi ba. Bälung käcai hai Areng tea cäphaw saite khimi na hai mangtä cüng saite, yng saite, bälung aevaw saite, awngneng saite awng hethang aethawsa ba.

²³ Ae-e aetütü saite lo hai älo kangthö na tea thung-a lä qa hang ba. Ätephüng-a mei nädylä honi lo na hai khimi ce lä aejaw aemang hai saite vi näte nang lä thaikaw te phüng-a vi.

²⁴ Säthaw üng mawsawng na lä aejaw aemang he kae y. Honi jüng-a äni lä khimi qütä tea bäheng kha Säthaw üng lo mitang kähawi-a mätu haw hethang kae.

²⁵ Hini kätyng-a elekhei thui saite khimi na tea lä änawngsa te hai, älo käneng hai kätüng thui pa hethang kae. Äni ce tea ae-ui haile he Säthaw ma py hethang aethang khai ba. Älo mitang mäny hethang äni ce tea säbawng pa.

²⁶ Tudylä äni ce lä tüng te, tüng y te na mäny kha Setan angra sa saite mäthang thung üng aelawi ö ai. Setan angra lä äni ce tea äma ngai te kätyng sa hethang mäthang-a aemang hai ö te vi dy.