2 Timote 1 - Caekäcai Kangthae (Lemi)

Pawlae ma angcü üng aethaw py saite lo

¹ Hini cae lä kai, Pawlae, te üng vi. Säthaw lä äma ma üng kängai-a Isu Khrista üng angtawtha-a lawng hai hethang kai bung re te vi dy. Isu Khrista tea yng saite khimi na tea lä dungtäsa hing saite py hethang Säthaw ma älo aedo saite phüng thui hethang kai bung mätaw te vi dy.

² Hini cae lä kai üng cäpaw khekhe kätyng bälung aevaw saite Timothe, nang, tea tärü te vi. Mä-ai üng Pä-ai Säthaw hai Areng Isu Khrista ma nang ce tea tähang kähawi, bäheng saite hai awngneng saite py sy.

Aethaw py saite lo

³ Kai lä kai üng kangsi kangjaw na kätyng käsi kähawi mäny saite bälung käcai hai Säthaw tea cäphaw kha nang tähang kawng hai te vi. Kärung käni nang tea ämaw aedawng te hai kai lä nang tähang aetang jawjaw te vi.

⁴ Mä-ai ni aeprei hawi te thüng-a, nang üng minaw tui aeqa saite na tea aedawng haile kha kai lä nang hai aeting tyng hethang ngaiphi te vi. Tukä dylä kai lä tengxyng y anghawtho haw ai.

⁵ Nang üng yng tätang saite tea kai lä aedawng haile te vi. Nang üng kangsi nä-awi Lo-i, hai nang nä-awi Euni ni lä Isu Khrista tea yng te cakhi hawi te vi. Nang la vaihi änini kätyng yng te cakhi by vi näte kai lä ae-y khü te vi.

⁶ Hikäte phüng-a kai üng äkö na nang qawng-a thyng kha aetang te kätü-a, Säthaw ma py te sakaw saite tea tawng haile king hethang nang tea kai lä sädi py te vi.

⁷ Säthaw lä mä-ai tea ri saite bälung py te y vi. Honi jüng-a haidae awng te bälung, bälung aevaw saite hai mä-ai ma tea aeküng saite bälung py te vi.

⁸ Tukätephüng-a mä-ai üng Areng Isu phüng khimi ce tea thui hethang aejae hang ba. Äni üng tähang thawng thung-a pä-ung saite kai tähang la aejae hang. Angthang Kähawi tähang mätang bälaica saite thung-a kai hai mangtä mätang hethang awng rüng ba. Säthaw lä nang tea haidae py ai mang.

⁹ Säthaw lä mä-ai bung aeqang kha käcai-a hing hethang ka te vi dy. Äni lä mä-ai üng kähawi sa saite na phüng-a ka te y lyng. Äma ma üng mawlang kaedawng hai tähang kähawi phüng-a vi. Älawng sa y te kälang-a ma, Säthaw lä äma üng tähang kähawi mä-ai tea mätü hethang Isu Khrista bung mätaw te hai-a sa rüng te vi dy.

¹⁰ Vaihi Säthaw lä hini tähang kähawi mä-ai tea caiping-a täphawng hai pyng te vi dy. Mä-ai üng Aeqangkung Isu Khrista lä hi älawngpre-a ly kha mä-ai bung aeqang te phüng tea mätü te vi. Äni lä kädü mi tea täphra kha dungtäsa hing hethang Angthang Kähawi hai-a mä-ai tea täphawng te vi dy.

¹¹ Säthaw lä hini Angthang Kähawi thui hai hethang kai bung angtawtha-a hai särae lawngtä-a re te vi dy.

¹² Tukätephüng-a kai lä thawng thung-a mätang bälai saite na aeting jawjaw vi. Tungaila kai lä aejae y lyng. Ätephüng-a mei nädylä kai ma yng saite Khrista bung kai lä mäny te phüng-a vi. Khrista lä äma ly haile te Käni khytä kai tea a saite Angthang Kähawi tea aedung hai haw ai näte kai lä ae-y khü te vi.

¹³ Kai üng kätüng mätu saite tea nang lä thai pyng te vi dy. Hini tea lä nang üng aetu nae kätüng kätyng khai khü ba. Nang lä Isu Khrista hai bungtä te phüng-a, yng jawjaw kha khimi kälang na tea bälung aevaw jawjaw ba.

¹⁴ Nang tea Säthaw ma a saite lo angthang kätüng tea aedung hai ba. Mä-ai thung-a awng saite Muilaw Käcai lä nang tea säbawng ai mang.

¹⁵ Asia pre cäpi-a awng saite yng te khimi awng mang te na ma kai bung lä khaisö te nang lä mäny te vi dy. Honi thung-a Phukela hai Hemokena ni mäteng ma qa hawi te vi.

¹⁶ Areng ma Onesiphora hai äni üng engthung na tea bäheng jo sy. Ätephüng-a mei nädylä äni lä kai tea aethaw py leilae kha kai bung thawng thung-a pä-ung saite kätü-a äni lä kai tea ly hethang aejae te y.

¹⁷ Hokä cang y äni lä Rom märü-a tyng te kätü-a, aethawsi y käla ma kai hai aeting y rytä kai tea mäqang vi dy.

¹⁸ Tärae cei saite Käni-a lä Areng ma Onesiphora tea lä bäheng sy. Ephesi märü-a äni lä kai tea makä tangtä säbawng mei näte nang lä kähawi-a mäny khe te vi.