2 Piter 2 - Caekäcai Kangthae (Lemi)

Käjüng sa saite särae na

¹ Jangni-a buisaw käjüng aesa kha thui saite na lä Säthaw üng khimi na thung-a awng ö by vi. Honi kätyng nang ce thung-a käjüng sa kha mätu saite särae na awng ö vi ai. Äni ce lä khimi ce üng yng saite na tea täphra hethang kangru-a sa tämang saite na mätu ö vi ai. Hini särae na lä äma ce bung hunghö üng aelawi hai saite Areng tea mäteng ma aephae ö vi ai. Äni ce tea la Säthaw ma täphra phraw pa ö vi ai

² Säthaw üng khimi awng mang saite na lä äma ce üng saerae hethang hawi saite lang-a hui ö ai. Tukha yng y saite khimi kälang na lä älang kätüng phüng tea käsi na thui ö vi ai.

³ Hini särae na lä ae-aw te bälung awng ö vi ai. Äni ce lä äma ce sa saite cäkae na thui te hai-a nang ce te üng tangkae dang hethang aethawsa ö ai. Jangni-a ma Säthaw lä äni ce tea tärae cei hethang sa rüng pa te vi dy. Säthaw lä äni ce tea täphra hethang aering vi ai.

⁴ Tukätephüng-a jangni-a Känipre üng angtawtha phütä na ma hunghö sa te kätü-a, Säthaw lä äni ce tea dengpy te vi. Säthaw lä äni ce bung ving saite angqaw khaw käthu-a kädephae kha pä-ung pa ö vi dy. Äni lä äni ma tärae cei te käni tyng te khytä äni ce bung honi thawng käving thung-a pä-ung ö vi ai.

⁵ Jangni-a Säthaw lä äma üng lo tängai y saite khimi na üng älawngpre tea täphra pa te vi dy. Säthaw ma äni ce tea lä tui cäqing hai täphra king pa te vi dy. Äni lä Novae hai äma engthung üng khimi lawng säritä xyngtä na tea aeqang pa kae vi dy. Novae lä khimi ce tea cüng saite phüng thui pa te vi.

⁶ Säthaw lä Sodom hai Komorae märü tea dengpy kha honi märü känetä tea baiphö-a lawng te khytä maikang hai king pa te vi dy. Äni lä hikä sa te hai-a, äma tea mäthi y saite khimi na tea lä makä sa kha dengpy ai mei näte mätü te vi dy.

⁷ Säthaw lä khimi käcüng Lawtae bung aeqang pa vi dy. Lawtae lä honi khimi ce ma Säthaw üng Ubädi tängai y kha lawng lawngtä täkübäjang sa te phüng-a, tengxyng y bälung hawi pa y vi dy.

⁸ Honi khimi käcüng lä khimi käsi na thung-a awng kha äni ce üng pawprae saite lo na, hunghö sa saite na käni qütä thai kha nung te phüng-a bälung mätang phi pa vi dy.

⁹ Säthaw lä äma üng lo tängai saite na üng bälung mätang bälai te thung üng aeqang hethang mäny jawjaw te vi. Äni lä älo tängai y saite khimi na bung kangkhüng üng tärae cei saite käni tyng te khytä dengpy jawjaw pa vi ai.

¹⁰ Äma ce üng ngaiphi tüng y saite mang-a hui saite na hai Säthaw üng aenae tea mäthi y saite na tea Äni lä tengxyng y dengpy khaw vi ai. Käjüng sa saite särae na lä ri y käla aethaw ö te vi. Äni ce lä Känipre üng phung-ang awng saite na tea mäteng ma mäthi y käla käsi thui vawng ö te vi.

¹¹ Känipre üng angtawtha na lä hini käjüng sa saite särae na qawng-a aethaw hai haidae awngky ö te vi. Tungaila äni ce mäteng ma, Känipre üng phung-ang awng saite na phüng Areng üng maw-a käsi thui hethang ri ö te vi.

¹² Tungaila hini khimi na lä äma ce mänykaw y saite na tea käsi thui ö te vi. Äni ce lä aedawng kaw y kha ngaiphi tüng y saite bälung xyngtä awng saite tawngbawi kärai na kätyng vi. Äni ce aepeng te lä khimi ce ma ne kha bädü ö hethang xyng kae. Hini särae na bung lä tawngbawi na kätyng Säthaw ma bädü ö by vi ai.

¹³ Äni ce lä khimi kälang na tea mätang bälai hai te phüng-a, Säthaw ma äni ce tea mätang bälai hai haile tyng ö vi ai. Hini käjüng sa saite särae na lä käni-a mäteng ma äma ce üng ngaiphi tüng y saite lang mang-a hui kha anghawtho ö te vi. Äni ce lä nang ce hai mangtä nei ca te thüng-a, käjüng sa kha äma ce üng käsi lang mang-a hui ö te vi. Äni ce lä nang ce tea saerae hai kha pawprae hai ö te by vi.

¹⁴ Äni ce lä nawngmädi na hai täkübäjang sa hethang xyng aedawng jawjaw ö te vi. Äni ce lä hunghö sa te tea manila mängae vai ö te y vi. Äni ce lä Khrista tea yng khi y saite khimi na tea hunghö mang-a bähawi pa ö te vi. Äni ce lä tengxyng y ae-aw tätang saite na lawng ö vi dy. Säthaw lä hini khimi ce tea täking te vi dy.

¹⁵ Äni ce la kätüng sa saite lang mang-a hui ö y vi dy. Äni ce lä lolang tämang ö te kätyng vi. Äni ce lä Beor üng cäpaw Balam üng lolang mang-a hui ö te vi. Balam lä tangkae ngaiphi te phüng-a tämang saite sa te vi.

¹⁶ Tungaila cäphö lä käsi sa saite Balam tea pring pa vi dy. Älo aepe haw y saite cäphö känawkhing käsa mäteng ma, khimi kätyng älo aepe kha bawlae kätyng sa saite buisaw tea mäkhang pa te vi dy.

¹⁷ Hini käjüng sa saite särae na lä kang saite tui cäpring hai aeli ma mäsaeja saite tämai na kätyng vi. Tukätephüng-a Säthaw lä äni ce tähang ving phi saite mityng khai pa te vi dy.

¹⁸ Äni ce lä aethaw kha aetütü saite lo na aepe ö te vi. Äni ce lä mimi na bung khaisö kha tänaetä Khrista tea yng saite khimi na tea ngaiphi tüng y saite bälung hai-a hunghö sa hethang the pa ö te vi.

¹⁹ Äni ce lä hini khimi na tea Säthaw üng Ubädi tängai jawjaw y käla ma aelawi haw te vi näkha älo aedo ö te vi. Tungaila käjüng sa saite särae äma ce khekhe lä äma ce tea täphra saite aeme aeqa te na üng mawsawng tangnae-a lawng ö te vi dy. Ätephüng-a mei nädylä, khimi lawngtä lä äma tea pyng saite üng mawsawng tangnae lawng te vi.

²⁰ Äni ce lä mä-ai üng Aeqangkung Areng Isu Khrista bung mäny te hai-a, hini älawngpre üng täphra saite käsi üng aelawi pyng-a, äni ce üng hini käsi dawng-a aemang kha pyng pa haile vi dylä, angcü üng Khrista tea yng y te kälang üng kätü qawng-a siky ö vi ai.

²¹ Äni ce lä älang käcüng tea mäny y dylä, hawiky te vi. Säthaw üng älang mäny pyng-a, äma üng äkähui na ma mätu saite caiping te särilo käcai khaisö haile vi dylä, äni ce lä tähang siky ö te vi.

²² Äni ce sa saite lä hini pelo känetä ma lä tüng tätang vi näkha mätü te vi. Hini lä, “Ui lä bälo kha äma üng anglo tea ly haile kha ca tyng te vi.” Honi kätyng, “Tui bähu ping saite o lä, angqo thung-a ly kha aelo haile tyng te vi” näkha näte vi.