2 Korin 9 - Caekäcai Kangthae (Lemi)

Jerusalem märü-a awng saite Khristen na tea säbawng saite

¹ Kai lä Jerusalem märü üng Säthaw üng khimi na tea säbawng saite phüng nang ce tea cae tärü hethang aely ngai te y.

² Nang ce lä säbawng hethang bälung awng ö vi näte kai lä mäny vi. Kai lä nang ce üng phüng hini Makedonia khö-a awng saite kangkawng na tea aethaw pyng te vi dy. Kai lä äni ce tea, “Jangni üng khösäning-a ma Käri pre üng Khristen na lä säbawng hethang aerü rüng ö pyng te vi dy” näkha näpa. Nang ce üng bälung aepy saite lä Makedonia khö üng Khristen na tea la bälung aethaw awng hai ö te by vi.

³ Tungaila nang ce üng phüng kai üng aethaw saite lä tätang vi näte mätü hethang hini yng saite kängby jä-ai na bung nang ce tea kai lä mätaw te vi. Kai ma thui pyng saite kätyng nang ce lä tangkae khai aecö rüng hethang kai ce ma äni ce bung mätaw ö te vi.

⁴ Kai hai mangtä Makedonia khö üng hai hui saite yng te khimi na ma nang ce üng aerü rüng y saite tea nung dylä, nang ce tea ae-y khü te phüng-a, kai ce la tengxyng y saerae ö by vi ai. Nang ma ce khekhe la saerae ö by ai.

⁵ Tukätephüng-a hini kängby jä-ai na bung nang ce tea mätaw rüng hethang aely ngai te vi näkha kai lä aedawng vi dy. Tukäte hai-a nang ce lä bäsai y käla py hethang aedo saite lasawng mätung rüng hethang äni ce lä säbawng ö he kae. Kai ma nang ce tea py hai aekhe kang hethang särilo thui te y käla, nang ma ce üng bälung kängai kätyng py saite lasawng lawng hethang kae.

⁶ Khimi lawngtä lä ämöti äje cäcaw xyng hi dylä, äni lä caw äje cäcaw xyng ae vi ai. Tungaila khimi lawngtä ämöti awng mang-a hi dylä, äni lä caw awng mang-a ae vi ai näte aedawng haile ö.

⁷ Nang ce thung-a khimi qütä lä, äma ce üng bälung thung-a aedawng te kätyng py hethang kae. Nang ce lä bäsai te bälung hai py hethang kae te y. Nang ce lä khimi phütä ma särilo hai thui te phüng-a, py hethang kae ö te y. Säthaw lä anghawtho te bälung hai py saite khimi tea lä bälung aevaw te vi.

⁸ Säthaw lä nang ce tea tähang kähawi cawngkhang na py haw te vi. Tupyng-a nang ce lä äly ngai saite angxynlyng na awng kha kälu kähawi cawngkhang na sa haw hethang awng mai vi ai rawng.

⁹ Caekäcai thung-a, “Khimi käcüng lä khimi kangtang tea bäsai y käla py te vi. Äni üng sa te kälu kähawi tea Säthaw lä manila tämang y lyng” näkha awng te vi.

¹⁰ Areng lä ämöti hi saite kung tea ämöti na py kha khimi ce tea käcakänei py hai te vi. Hini kätyng Areng lä nang ce tea vaihi awng saite qawng-a cang y py rae ai. Tukha nang ce lä khimi kälang na tea säbawng rae kha kälu kähawi na sa haw ö rae vi ai.

¹¹ Areng lä nang ce tea älang cawngkhang-a tawngnang hai ö ai. Tudylä nang ce lä kätü qütä-a bäsai y käla py haw ö te vi. Kai ce te mang hai-a nang ce üng py saite na khimi ce ma dang te kätü-a, äni ce lä Säthaw tea kawng te lo thui ö ai.

¹² Tukätephüng-a nang ce üng kälu kähawi sa te phüng-a, nang ce lä Säthaw üng khimi na üng aely ngai saite na tea sabawng ö te qaitä y. Khimi awng mang saite na la Säthaw tea kawng te lo thui ö by ai.

¹³ Nang ce lä Khrista hai aesui vi näte nang ce üng kälu kähawi sa te hai-a mätü ö te vi. Honi hai-a khimi awng mang saite na ma Säthaw tea bälaw ö ai. Nang ce lä Khrista üng Angthang Kähawi thui te qaitä y, äni tea hui hethang ngai saite bälung la awng vi näte nang ce üng bäsai y käla khimi qütä tea py te hai-a mätü ö te vi.

¹⁴ Säthaw ma nang ce tea py saite tähang kähawi käleng phüng-a, äni ce lä nang ce tea bälung aevaw phi kha nang ce tähang Säthaw tea aetang pa ö ai.

¹⁵ Mä-ai lä thui kha manila bynglei haw y saite Säthaw üng lasawng phüng-a, äni tea bälaw ö si.