2 Korin 8 - Caekäcai Kangthae (Lemi)

Bäsai y käla py ö

¹ Kangby jä-ai na ä, kai lä hini Makedonia khö üng kangkawng na tea Säthaw ma py saite tähang kähawi phüng nang ce tea mäny hai hethang ngai te vi.

² Äni ce lä tengxyng y mätang bälai saite na hai käny saite na aeting kha tengxyng y mätang ö te vi. Tungaila äni ce lä anghawtho phi kha Khristen kängby jä-ai na tea bäsai y käla py hethang ngai saite bälung awng ö te vi.

^3-4 Äni ce lä äma ce py haw te rytä py kha py haw te qawng-a cang y mäteng ma py ö te vi dy näte kai lä thui hethang ngai te vi. Äni ce lä äma ce üng kängai kätyng hikä sa te vi. Jerusalem märü-a awng saite Säthaw üng khimi na tea säbawng saite thung-a qa haw hethang kai ce tea mäkai ö leilae te vi dy.

⁵ Äni ce lä kai ce üng aethang khai saite qawng-a cang y sa ö vi dy. Angcüky-a äni ce lä Areng tea äma ce bung ae-a pyng-a, Säthaw üng aely kätyng kai ce tea la äma ce ma ae-a ö te by vi dy.

⁶ Tukätephüng-a hini kälu aetawng saite Tita tea nang ce thung-a hini bälung aevaw saite üng kälu tea sa khüng hethang kai lä mäci te vi dy.

⁷ Nang ce lä tengxyng y äte angxynlyng na-a tawngnang ö vi. Nang ce üng yng saite, älo thuikaw saite, mänykaw saite, säbawng he ngai saite bälung hai kai ce tea bälung aevaw saite na awng ö vi dy. Tukätephüng-a nang ce lä hini bälung aevaw saite üng kälu tähang bäsai y käla py hai hethang kai ce lä ngai hai ö te vi.

⁸ Kai lä nang ce tea särilo thui y ngaila, yng saite khimi kälang na üng säbawng hethang aethaw awng saite mätü te hai-a nang ce üng bälung aevaw saite lä tätang mei, tätang y mei, näte mäny hai hethang nang ce tea käny te vi.

⁹ Nang ce lä mä-ai üng Areng Isu Khrista üng tähang kähawi tea mäny ö te vi. Äni lä tawngnang ngaila, nang ce tähang kangtang-a aelawng te vi dy. Äni üng kangtang saite hai-a, nang ce lä tawngnang ö te vi dy.

¹⁰ Kai lä nang ce sa hethang kae saite tea thui he ngai te vi. Jangdüng üng khösäning-a nang ce lä angcü üng ae-a saite khimi na lawng te cang y, py hethang bälung awng ö tätang khaw saite na lawng ö vi dy.

¹¹ Tukätephüng-a nang ce ma aetawng kha tangkae käcö saite tea lä kaecyng-a sa ö. Nang ce lä hini tangkae käcö saite aetawng hethang bälung aethaw awng phi te kätyng, bälung aethaw awng phi te hai-a kaecyng-a sa ö. Nang ma ce tea awng te kätyng py ö.

¹² Nang ce lä säbawng he ngai saite bälung awng ö dylä, nang ce üng py haw saite tea lä Säthaw ma täla vi ai. Säthaw lä nang ce py haw y saite tea ngai te y.

¹³ Kai ce lä nang ce tea mätang bälai hai hethang ngai ö te y. Yng saite kälang na säbawng te dang hethang rae saite aeting hai he ngai ö te y vi. Kai ce ngai hai saite lä py saite khimi na hai dang saite khimi angxynlyng na lä mangtä aequng bawi ö he kae te vi.

¹⁴ Vaihi kätü-a nang ce lä nang ma ce üng tawngnang saite na hai äni ce üng aely ngai saite tea säbawng ö te vi. Kangkhüng-a lä äni ce üng tawngnang saite lä nang ce üng aely ngai saite na tea säbawng haw ö ai. Hini kätyng py saite na hai dang saite na lä mangtä aequng bawi ö vi ai.

¹⁵ Caekäcai thung-a, “Awng mang-a mätung saite khimi na lä bälai te awng ö y. Äje cäcaw mätung saite khimi na lä aelo ö vi dy” näkha tärü te vi.

Tita hai äma üng kängby jä-ai na

¹⁶ Kai ce lä nang ce tea säbawng hethang ngai te kätyng Tita lä nang ce tea la säbawng hai hethang Säthaw ma sa te phüng-a kai ce lä Säthaw tea kawng te lo thui ö te vi.

¹⁷ Tita lä kai ce üng mäci saite lo tängai te qawng-a cang y sa te vi dy. Äni lä äma üng kängai kätyng nang ce tea säbawng hethang ngai saite bälung awng te hai ly te vi.

¹⁸ Angthang Kähawi thui te phüng-a kangkawng angxynlyng na ma bälaw saite kängby jä-ai lawngtä bung la Tita hai mangtä kai ce lä mätaw te by vi.

¹⁹ Hokä cang y rawng, kai ce lä Jerusalem märü-a awng saite yng saite khimi na tea säbawng hethang lasawng nähai te kätü-a, honi kängby jä-ai bung lä kai ce hai mangtä ly hai hethang kangkawng na ma äni bung re te vi dy. Hini phüng-a, Areng üng phung-ang lä aesang vi ai. Kai ce lä säbawng he ngai saite bälung awng vi näkha mätü ö te by vi.

²⁰ Kai ce lä Jerusalem märü üng yng saite khimi na tähang bäsai y käla py saite lasawng na kai ce ma makä süng ai mei näte tea khimi ce ma cy te awng y hethang ngai ö te vi.

²¹ Kai ce lä Areng üng maw-a qaitä aeteng khaw saite sa hethang aethawsa ö te y. Kai ce lä khimi ce üng maw-a la aeteng khaw saite sa hethang aethawsa ö te by vi.

²² Kai ce lä Tita hai mangtä kängby jä-ai kälang bung nang ce tea mätaw ö te vi. Kai ce lä äni tea kätü awng mang-a käny pyng te vi dy. Äni lä khimi ce tea säbawng hethang bälung awng phi te vi. Vaihi äni lä nang ce tea ae-y khü kha säbawng rae hethang mäteng ma ngai te vi.

²³ Tita lä kai üng kängby jä-ai kähawi vi. Äni lä nang ce tea säbawng hethang kai hai mangtä kälu sa te vi. Äni hai mangtä hui saite kängby jä-ai kälang lawng netä lä kangkawng na üng khimi na ma re kha mätaw hawi saite vi. Äni ce lä Khrista üng phung-ang tähang kälu sa ö te vi.

²⁴ Tukätephüng-a hini khimi ce tea nang ce üng bälung aevaw saite na mätü ö lawi. Hikä sa dylä, nang ce phüng kai ma aethaw saite kätüng tea kangkawng angxynlyng na ma nung ö ai.