2 Korin 7 - Caekäcai Kangthae (Lemi)

¹ Kangby jä-ai na ä, Säthaw üng hini aedo saite na lä mä-ai tähang vi te phüng-a, mä-ai ma tea ätabung hai bälung üng ngaiphi tüng y saite angxynlyng na tea lä aemäcai pang ö si. Mä-ai lä Säthaw tea ri kha tämö khai saite hai-a käcai ping-a awng ö si.

Pawlae üng anghawtho saite

² Kai ce tea nang ce üng bälung aevaw kha lady ö. Kai ce lä ämi tea la sa tämang ö te y. Yng saite tämang hai ö te y. Kaeling kaemae la sa ö te y vi.

³ Kai lä nang ce tea dengpy hethang ngai te phüng-a hikä thui te y. Kai ce lä nang ce hai mangtä dü te läsy, hing te läsy nang ce tea bälung aevaw phi te vi näte angcü mang-a thui rüng ö pyng te vi dy.

⁴ Kai lä nang ce tea bälung ae-y phi kha nang ce phüng tengxyng y aethaw te vi. Mätang bälai saite aeting te kätü-a, nang ce ma kai ce tea aethaw py kha tengxyng y anghawtho te vi.

⁵ Kai ce lä Makedonia khö-a tyng te kätü-a, aehae haw ö te y vi. Älang cawngkhang-a, kai ce lä mätang bälai saite na aeting ö te vi dy. Khimi ce hai aejaw aemang kha kai ce üng bälung thung-a lä ri ö te vi dy.

⁶ Tungaila Säthaw lä bälung aethawsi saite na tea aethaw py pa te vi. Äni ma Tita tyng te hai-a kai ce tea aethaw py te vi dy.

⁷ Kai ce lä Tita tyng te phüng-a qaitä anghawtho te y. Nang ce ma äni tea säbawng te phüng-a la anghawtho ö te by vi. Nang ce ma kai ce hai aeting hethang ngai phi vi näte phüng, kai ce üng mätang bälai saite phüng, nang ce lä bälungsi te hai kai ce tea säbawng hethang ngai ö te phüng, Tita ma thui pa te phüng-a, kai la tengxyng y anghawtho bärai te vi dy.

⁸ Kai üng cae ma nang ce tea bälungsi hai ngaila, kai lä honi cae tärü saite phüng-a, bälung hawi y te awng y lyng. Tungaila hini cae lä nang ce tea bälungsi hai te phüng-a, kai lä tänaetä bälung hawi y vi dy.

⁹ Vaihi kai lä anghawtho te vi. Nang ce lä bälungsi hai ö te phüng-a y lyng. Tungaila nang ce üng bälungsi saite hai-a, nang ce lä ae-ui ö te phüng-a vi dy. Säthaw lä nang ce üng bälungsi saite tawng kha nang ce tea hawi saite na-a mäqa pa te phüng-a, kai ce lä nang ce tea naw hai te y vi.

¹⁰ Säthaw lä nang ce tea bälungsi hai vi te phüng-a, nang ce lä ae-ui kha bälung aemäqa ea ni Säthaw ma nang ce bung aeqang haw vi ai. Tukätephüng-a ämi lawngtä la bälung hawi y hethang awng y. Tungaila älawngpre hai aesui saite bälungsi te kädü lang mang-a tha pa te vi.

¹¹ Säthaw ma bälungsi saite hai-a nang ce üng bälung thung-a äte sa mei näte aedawng ö. Nang ce lä Säthaw tähang aethaw rae ö phi te vi. Nang ce lä hunghö sa saite thung-a qa y näte mätü hethang aethawsa ö te vi dy. Nang ce lä hunghö sa saite khimi na tea kädawtho ö te vi. Nang ce lä Säthaw tea ri ö te vi. Nang ce lä kai tea aeting haile hethang ngai ö phi te vi. Nang ce lä kai tea awng mang-a säbawng hethang ngai ö te vi. Nang ce lä hunghö sa saite khimi tea bäjeng ö hethang ngai te vi dy. Nang ce lä honi hunghö sa saite na thung-a qa y näte mätü ö king te vi dy.

¹² Tukätephüng-a kai ma nang ce tea hini cae tärü ngaila hunghö sa saite khimi qaitä tähang y, naw hai saite khimi tähang la y. Kai lä Säthaw üng maw-a nang ce lä kai ce tea matangtä bälung aevaw ö mei näte nang ce tea mäny hai hethang ngai te phüng-a, hini cae tärü te vi dy.

¹³ Hini phüng-a, kai ce lä aethaw dang ö khü te vi dy. Kai ce lä aethaw dang te cang y vi. Tita tea nang ce ma säbawng vi näkha äni lä anghawtho te phüng-a, kai ce lä äni hai mangtä anghawtho ö te by vi dy.

¹⁴ Kai lä nang ce üng phüng-a Tita tea aethaw jawjaw te vi dy. Hini aethaw te phüng-a, nang ce lä kai ce tea saerae hai ö te y. Kai ce lä nang ce tea kätü qütä lo mitang thui pyng ö te vi dy. Hini kätyng Tita tea kai ce lä aethaw kha thui pyng saite na la tätang khaw vi.

¹⁵ Tukätephüng-a Tita lä nang ce tea tengxyng y bälung aevaw rae aevaw rae kha nang ce lä äni üng lo tea tängai ö vi näte aedawng haile te vi. Nang ce lä äni tea ri kha käsawtho te hai lady ö te vi dy.

¹⁶ Kai lä nang ce tea tengxyng ae-y khü haw te phüng-a, anghawtho phi te vi.