2 Korin 6 - Caekäcai Kangthae (Lemi)

Säthaw üng mawsawng na mätang bälai saite

¹ Kai ce lä nang ce hai Säthaw üng kälu mangtä sa saite kängby jä-ai na lawng te phüng-a, nang ce tea mäci he ngai ö te vi. Säthaw ma nang ce angxynlyng tea tähang kähawi py vi dy. Tukätephüng-a Säthaw üng tähang kähawi tea aetütü-a lawng hai hethang lä sa ö hang.

² Jangni-a Säthaw ma thui te lä, “Kai ma khai khü saite kätü tyng tea, nang ce mäkai saite na tea kai lä thai te vi dy. Kai lä nang ce bung aeqang hethang tyng te kätü-a, nang ce tea säbawng pyng te vi dy” näkha nä vi. Tängai ö. Säthaw ma khai khü saite kätü lä vaihi dy. Äni ma nang ce bung aeqang hethang kätü la vaihi dy.

³ Kai ce lä khimi ce ma hunghö sa kha Angthang Kähawi tea tängai y hethang äte la sa ö te y. Ätephüng-a mei nädylä kai ce tea Säthaw ma py saite kälu phüng khimi ce ma käsi thui hai hethang ngai ö te y vi.

⁴ Kai ce lä Säthaw üng mawsawng na lawng vi näte älang cawngkhang hai-a mätü ö te vi. Kai ce lä mätang bälai saite, rae saite na, xhuxa saite na hai aeting te kätü-a, änawngsa kha khung ö te vi.

⁵ Khimi ce lä kai ce tea bo kha thawng thung-a pä-ung ö vi dy. Kai ce lä aepuilung saite na aeting kha mäsae qa saite kälu na sa ö vi dy. Kai ce lä i haw y käla, ca haw y käla awng ö te vi dy.

⁶ Kai ce lä bälung cai saite, mänykaw saite, änawngsa saite hai khimi ce tea säbawng saite bälung hai-a Säthaw üng mawsawng na näte mätü ö te vi dy. Muilaw Käcai lä kai ce üng äthung-a aeta kha kai ce üng tätang bälung aevaw saite hai la vi.

⁷ Kai ce lä lo mitang thui kha Säthaw üng haidae hai-a kälu sa ö te vi dy. Cüng saite lä kai ce üng maiphaw maicae vi. Kai ce lä hini maiphaw maicae hai täre na tea aety kha mä-ai ma tea aedung ö te vi.

⁸ Khimi ce lä kai ce tea bälaw kha kai ce üng phüng käsi thui saite, cy saite hai hawi saite na thui ö te vi. Äni ce lä kai ce tea kaeling kaemae sa saite na vi näkha dawng ngaila, kai ce lä lo mitang tea qaitä thui ö te vi.

⁹ Kai ce tea khimi ce ma mäny hethang ngai y ngaila, khimi qütä lä kai ce bung mäny ö king te vi. Kai ce lä dü saite hai aenai ngaila, hing jawjaw ö te vi. Khimi ce ma kai ce tea sakälö khü ngaila, äni ce lä kai ce bung bädü haw ö te y vi.

¹⁰ Kai ce lä bälungsi ngaila, anghawtho haw ö jawjaw te vi. Kai ce lä tangkae awng y ngaila, khimi awng mang saite na tea Säthaw üng tähang kähawi tha haw ö te vi. Kai ce lä äte haetä la awng ö y ngaila, Säthaw lä kai ce tea äte angxynlyng na py te vi dy.

¹¹ Korin märü üng kängby jä-ai na ä, kai ce lä nang ce tea thui tätang khaw pyng te vi dy. Kai ce lä nang ce tea bälung mäke hai aevaw kha lady ö bawi te vi.

¹² Kai ce lä nang ce tea bälung aevaw ö tätang te vi. Tungaila nang ce üng bälung aevaw saite lä kai ce tähang deqang vi dy.

¹³ Kai lä äpä-ai ma äma üng caw nade na tea älo aepe te kätyng nang ce tea thui hethang ngai te vi. Kai ce lä nang ce tea bälung aevaw kha lady ö khaw te vi. Tukätephüng-a nang ce la kai ce tea bälung mäke hai aevaw kha lady ö jo.

Khrista tea mäny y saite khimi na hai kängby jä-ai sa ö hang

¹⁴ Khrista tea mäny y saite khimi na hai kängby jä-ai aesa ö hang. Khimi käcüng na hai Säthaw üng lo tängai y saite khimi na lä kängby jä-ai aesa haw y. Kaevang hai käving lä mangtä awng haw y lyng.

¹⁵ Khrista hai Setan lä bälung mangtä aedü haw y. Khrista tea yng saite khimi hai Khrista tea yng y saite khimi lä bälung mangtä aedü haw y lyng.

¹⁶ Säthaw üng Ingkäcai hai Säthaw bung mäny y saite khimi na üng cäphaw saite mimi na lä aesui te y vi. Mä-ai lä hing saite Säthaw üng Ingkäcai vi. Säthaw ma, “Kai lä kai ma üng khimi na thung-a aeke kha awng ai. Kai la äni ce üng Säthaw-a lawng kha äni ce la kai üng khimi na-a lawng ö ai” näkha näte vi.

¹⁷ Areng ma, “Kai tea yng y saite khimi na thung üng tho ö la. Nang ce lä äni ce hai kängby jä-ai sa ö hethang kae y. Säthaw bung mäny y saite khimi na üng pawprae saite na tea lä aehi ö. Hini kätyng sa dylä, kai lä nang ce bung lady ai.

¹⁸ Kai lä nang ce üng Äpä-ai-a lawng ai. Nang ce la kai üng cäpaw cänung na lawng ö ai” näkha äte angxynlyng na sa haw saite Areng ma thui te vi dy.